Taliina o Fesili e uiga i lo Tatou Faatuatuaga
Sa na o ni nai aso talu ona avea a’u ma tagata o Le Ekalesia a Iesu Keriso o le Au Paia o Aso e Gata Ai ae liliu mai se talanoaga faasamasamanoa a se vaega o uo i lo’u faatoa liliu mai [i le Ekalesia].
O nisi sa fia iloa, ma maofa ai. Ae o nisi sa ese o latou lagona. O se tasi o tamaitai talavou ma te tupulaga sa matua le fia talitonu lava o a’u o se Kerisiano.
O le taimi muamua lea na ou tofo ai i le taumafai e faamalamalama atu o’u talitonuga ia i latou o e sa le iloaina. Ou te manatua lo’u matuai lagonaina o le le fiafia a o o’u taumafai e faaofi atu i se mafaufau ua matuai loka mau lava ma po o le a lava le tele o faamatalaga manino e le mafai lava ona matala ai.
A o tuputupu ae le Ekalesia o le a feagai pea ma le tele o suesuega, pei lava o soo se faatuatuaga autu, ma o lena mea o le a oo atu ai i le tele o talanoaga faafesaga’i po o luga o le initoneti i le va o o tatou tagata ma o latou aiga, uo, ma paaga e le auai i lo tatou faatuatuaga.
O le uai atu i nisi o mataupu faavae autu e mafai ona fesoasoani ai i le au paia e tali atu i fesili po o finagalo faaalia ma le mautinoa.
Ola i Lau Tapuaiga
O le tasi o itu e sili ona lelei o loo i ai i tagata faamaoni o le Ekalesia o le, faamalosiauina lea o i tatou e lo tatou faatuatua ia “ola i la tatou tapuaiga.” E i ai se lagona o le faamaoni lea e oo mai a o vaaia e uo ma paaga le sootaga i le va o faamatalaga a se tagata ma ana mea e fai.
Afai o le olaga o se tagata o le Au Paia o Aso e Gata Ai o lana lauga sili lea ona lelei, e tatau foi la ona faailoa atu, faamaoni a tatou talanoaga ma faia i se agaga o le agalelei, e tusa pe fai mai e tagata ni fesili le talafeagai pe faia mai i se agaga faauigalua. O a tatou folafolaga e avea o ni soo o Iesu Keriso e sili atu ona talitonuina pe a ogatasi a tatou amioga ma o tatou talitonuga. A tatou taliina fesili po o ni faitioga foi, o le a i ai taimi tatou te manaomia ai ona malolosi. Tatou te ono manaomia foi le agamalie.
I le 2007 i le sauniga o le faauuga mo le–aufaauu a le BYU Hawaii, na saunoa ai Elder M. Russell Ballard o le Korama a Aposetolo e Toasefululua, “Afai tou te ola i mataupu faavae o le talalelei [nai lo] na o le suesue i ai, o le tuufaatasiga faapitoa o le malamalama o le a mafai ai ona e lagona le mafanafana ma le saunia e aoao atu mea ua e iloa e moni—i soo se nofoaga lava.”
Faatulaga le Matalalaga
A tatou talanoaina ni fesili po o ni manatu faaalia e uiga i lo tatou faatuatuaga, e taua le faatuina o ni matalalaga mai le amataga.
Nai lo le na o le tali atu i soo se ituaiga o fesili, atonu e aoga le faaalu muamua o le 30 sekone e faatulaga ai se faavae. E mafai ona faigofie e pei o le faamalamalama atu tatou te talia Iesu Keriso o lo tatou Faaola ma talia aoaoga a le Tusi Paia e uiga i Lona fanau mai, soifuaga, galuega, Faasatauroga, ma le Toetu. Tatou te talitonu foi na o ese mai le lalolagi Kerisiano mai upumoni sa aoaoina e Iesu i le Tusi Paia ma o lea na tatau ai ona toefuataiina mai le Ekalesia sa Ia faavaeina.
O le faataatiaina o talitonuga faavae o le Ekalesia i lenei faiga e maua ai se tulaga e faatatau atu i ai a o liliu atu le talanoaga i isi aoaoga faavae o le talalelei.
Faafesootai Faamatalaga
A o faalogo le au paia i fesili, e mafai ona latou iloa le mataupu faavae o loo i le aano o le fesili ma faafesootai atu le tali i le Faaola.
Mo se faataitaiga, aisea tatou te auina atu ai faifeautalai i atunuu Kerisiano? Aua i Ona aso sa auina atu e Iesu ia Ana avefeau taitoalua “i le lalolagi uma.” Ma tatou te faia foi faapena i aso nei. Aisea tatou te le fautuaina ai le nonofo faapouliuli a o le’i faaipoipo? Aua na aoao mai e Iesu ma Ana Aposetolo le paia o le faaipoipoga ma mea uma e o faatasi ai.
Tatou te le manaomia ni finauga faigata, ma tauteuteu i faaupuga a le lalolagi pe afai o mataupu o loo tatou taumafai e ola ai e mai le Alo o le Atua.
Faasoa Atu Aafiaga Patino
O le taliina o fesili a a tatou uo e le faapea o le fai atu o ni tali ua taulotoina. O le faasoa atu o aafiaga moni patino e mafai ona valaaulia ai le Agaga e molimau atu ma molioo le savali i le loto o le tagata faalogologo.
O le tasi o maagao tele i le faasoaina atu o lo tatou faatuatuaga o le fefe ona tatou te le iloa ia tali. E toalaiti lava ni tagata o isi ekalesia ua atamamai i o latou lava talafaasolopito po o aoaoga faavae, ma ua faaalia i suesuega o tagata o le Au Paia o Aso e Gata Ai ua matuai lelei lava ona aoaoina i lo latou lava faatuatuaga pe a faatusa atu i isi.
A fesili mai se tagata e uiga i se aoaoga faavae po o se talafaasolopito o le Ekalesia ae tatou te le iloaina, e leai se afaina o le fai atu i ai, “ou te le iloaina.” Ae tatou te mafai uma lava ona faasoa atu ni aafiaga patino e faamalamalama ai o tatou lagona e uiga i lo tatou faatuatuaga.
A tatou faamatala atu o tatou lava aafiaga e uiga i le tatalo po o le anapogi po o fesootaiga lelei i o tatou aiga, o na aafiaga e le mafai ona luitauina. E a tatou, ma e leai se tasi e sili atu le malamalama i ai nai lo o i tatou.
Ia Nofouta i Lau Au Faalogologo
O isi tagata e le o atu i tagata o le ekalesia ma ni fesili aua latou te fefe i le saisaitia o i latou i se lauga e afa itula le umi. Afai latou te fesili atu i se fesili masani, ia nofouta i mea latou te fiafia i ai, mea ua masani ai, ma le maualuga o le malamalama. O le faailoa atu o lo tatou magafagafa i le amataga o le a faatoafilemuina ai i latou o e fiailoa.
Ia malamalama o le talanoaga e tasi e le aoga mo tagata uma ona e eseese tulaga e o mai ai—ekalesia, faalelalolagi, ma isi lava mea.
Faasoa Atu Mea Tatou te Talitonu I Ai
Ua i ai i tagata o le Ekalesia se avanoa maoae e avea ai ma malosiaga mo le lelei i le fesoasoani lea e faasa’o ni manatu sese e uiga i ituaiga tagata tatou te le o avea ai ma faateleina le malamalama o isi po o ai i tatou ma mea tatou te talitonu i ai.
A o aoao atili tagata e uiga i talitonuga o le Au Paia o Aso e Gata Ai, e mafai ona latou vaaia ni eseesega iloagofie ma maua ai foi ni mea tatou te tutusa ai, ia latou te le’i mafaufauina e mafai ona fausia ai ni mafutaga e lelei atu.
O le faamatalaina o aafiaga patino e mafai ona avea ma se auala e sili ona aoga i le taliina o fesili nai lo le taulotoina o tali.
Pe a tali atu i fesili a uo, ia tumau i lou tagata moni. O lou ituaiga tagata o le mafuaaga lea e tele ina latou fesiligiaina ai oe.