Manatu mo Afiafi Faaleaiga
O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nisi nei o faataitaiga.
“Faalavelave Faalenatura—E Le Tatau Ona Tatou Fefefe,” itulau e 30: Faitau muamua le tusiga ma mafaufau loloto i mea e mafai ona fai e lou aiga ia saunia lelei ai mo faalavelave faalenatura i lo outou eria. Ona, e pei ona fautuaina mai e Elder Ellis, faaaoga lea o le afiafi faaleaiga e faatino ai lau fuafuaga. Atonu e te filifili e tapena ni ato mo faalavelave faafuasei, toe faatumu lau kapoti o loo teu ai meaai, pe talanoa i ni auala e saunia ai faaleagaga. Ia faamamafa atu le savali faamalosiau a Elder Ellis e faapea, “a tatou saunia, e mafai ona tatou taulimaina soo se faafitauli.”
“Faatumauina o le Faatuatua i se Lalolagi o le Le Mautonu,” itulau e 42: Mafaufau e faasoa atu le aafiaga o Epikopo Caussé i le potuaoga o loo maua i le amataga o le tusiga. Ona fai atu lea i tagata o le aiga po o le a se mea latou te ono faia i lena tulaga. Atonu e te manao e toe faamanatu ia mataupu faavae na mulimuli ai Epikopo Caussé e tumau mausali ai i lana molimau.
“E Faapefea Ona Ou Iloa Ua Faamagaloina A’u?” itulau e 46: Amata i le fesili atu i tagata o le aiga, “Afai ua uma ona e salamo, e faapefea ona e iloa ua faamagaloina oe?” Ona e faitauina atu lea o le tali a Elder Callister i le parakalafa e lua o le tusiga. Faasoa atu ni vaega faaopoopo o le tusiga e talafeagai mo lou aiga.
“Aoao e Auauna Atu i Isi,” itulau e 66: Faitau atu i lou aiga le tala i le taimi a o laitiiti ia Peresitene Monson. Atonu o le a e manao tou te faia ma lau fanau laiti ia gaoioiga e faatatau i ai. Faaiu i le tuuina atu o lau molimau o Thomas S. Monson o le perofeta soifua.
O Se Ata–O Se Afiafi Faaleaiga Atoatoa
O taimi uma lava sa ou moemiti ai i le faia o ni afiafi faaleaiga e pei o afiafi faaleaiga sa ou vaaia i ata a le Ekalesia. Ae ina ua ma vaetamaina ma lo’u toalua se teineitiiti laitiiti lalelei, sa le’i fia auai o ia. O lea na ma iloa ai sa tatau ona ma faia ni suiga i a matou afiafi faaleaiga ina ia aapa atu ia te ia.
Ou te matuai faafetai mo manatu mo afiafi faaleaiga o loo lolomi i le Liahona. O le taimi nei, o lo ma afafine lava le tagata e muamua manao e fai afiafi faaleaiga ma moomoo maimau pe ana fai i aso uma lava.
O se tasi o lesona e sili ona matou fiafia i ai sa faatatau i le ala e taiala ai i tatou e le Agaga Paia. Sa ma fai atu i lo ma afafine e alu i totonu o lona potu. Ina ua uma ona ma faitau e oo i le tolu, ona mafai lea ona toe sau i le potu malolo ma taumafai e su’e se ata o le Faaola. Ina ua taulalata atu i ai, sa fai mai o ia, sa ia lagona le mafanafana, ae a mamao, fai mai, sa maalili o ia. Sa fiafia tele o ia ina ua ia maua le ata. O se mea ofoofogia le vaaia o lona malamalama i le taua o le usiusitai ma le mulimuli i le Agaga ina ia mafai ai ona tatou latalata atu i lo tatou Faaola.
Sa matou faaiuina i le faitauina o le Mataupu Faavae ma Feagaiga 11:12. O le tuuina o lo matou “faalagolago i lena Agaga lea na te taitai ia fai mea lelei,” ua matou iloa ai o afiafi faaleaiga o se faamanuiaga.
Moema Lima Salles Broedel, Pasila