O Le Mau Sao i le Taimi Sao

Ao ou galue o se faifeau fesoasoani i le Falepuipui o le Itumalo o Maricopa i Arisona, ISA, ou te asiasi ma faasoa atu se mau ma se tatalo mo pagota o e o talosagaina se taiala a le Au Paia o Aso e Gata Ai. Sa fai e se tamaitai talavou sea talosaga i se tasi taimi.

Sa ou alu i lana itu o le falepuipui, lea sa i tua atu o le tele o faitotoa o loo lokaina. Sa i ai i le eria e tali ai malo ni laulau se lua e pei o se fale e aai ai ma e tofu laulau ma nofoa uumi ma sa i ai ma se kesi se tasi ma se leoleo. Sa ou tuuina i le leoleo le pepa talosaga, nofo i lalo i se tasi o nofoa umi, ma faatali ai mo le tamaitai talavou.

Sa ou tu i luga ao ia ulufale mai i le eria faatalitali, faafeiloai ia te ia, ma talosagaina ma te saofafai i le laulau. Sa foliga faanoanoa o ia ma e lei selua lona ulu ma na foliga mai o le a tagi. Ao ia talanoa mai e uiga i lona tulaga, sa ou mafaufau po o le a le mau o le a ou faasoaina atu. Sa ou faalogo ma le alofa i ona popolega, ma ao ia faamatalaina mai ona faafitauli sa i ai i le tele o ni amioga na avea ma mausa faapea ma ni filifiliga le lelei, sa ou manatu i le mau tonu lava e mafai ona fesoasoani ia te ia: Mosaea 3:19.

Sa ou susueina le Tusi a Mamona i le Mosaea 3:19, tulei atu ia te ia, ma fai atu e na te faitauina. Sa foliga mai sa i ai si ona faagaulemalie i le taimi muamua ma amata ai loa ona faitau i se leo vave ma pei o usuina se pese lea e faaali mai ai se le fiafia i le fai atu e faitau le mau. Ina ua maea ona ia faitauina le fasi fuaitau muamua, “Ona o le tagata natura o se fili i le Atua,” sa ou faasalavei atu ina ia faamalamalama le uiga o le “tagata natura.” Ina ua ia malamalama i le mea lea sa taua, sa faaauau lana faitau. Sa amata ona suia lona leo, ma faalemu [lana faitau] ina ua amata ona ia malamalama i upu.

Ina ua amata ona ia faitau i le lisi o uiga lelei faatamaitiiti “o se tagata paia” sa atili ai ona faalemu lana faitau. Sa mafai ona ou iloa atu lona fiafia i uiga o amioga taitasi o loo lisiina i totonu o le fuaiupu. Ina ua ia faitauina le “usiusitai, agamalu, lotomaualalo, onosai,” sa amata ona ou lagona le siomiaina o i maua e le Agaga. Ao ia faitauina ia upu “tumu i le alofa, loto ia usitai,” sa ou molimauina se suiga ia te ia. Na susulu mai ona foliga ma na pei ua aafia ona uiga, leo, ma lona tulaga atoa e le Agaga. Sa mafai ona ou iloa atu ua i ai se faamoemoe ao aoaoina o ia e le Agaga po o le a le uiga o nei upu ia te ia ma pe faapefea ona ia faia ia suiga lea o loo faamatalaina mai i le mau.

Sa ou faia se tatalo ma faatalofa atu ma le alofa i le tamaitai talavou. Sa ou tuua le falepuipui ma se agaga musuia. Ou te le’i lagonaina lava muamua sea ituaiga aafiaga faafuasei, mamana, ma le matagofie mai tusitusiga paia. Sa ou iloaina le Mosaea 3:19 aua e masani lava ona ou vaai i ai ao ou faitauina ia tusitusiga paia, peitai ou te lei malamalama muamua lava i le loloto o le i ai o se aafiaga i se tagata.