Auauna i le Toatasi

Ina ua amata lo’u tausaga muamua i le iunivesite, sa vave ona fatuina ni faigauo ma isi alii fou e toalua, o le tasi o se fai lafumanu ma le isi o se faifaatoaga. Sa matou faia se uitolu le tutusa—e toalua tama agamaulalo I.S. mai nuu maotua ma le tasi o se tagata o le taulaga e vave le tautala mai Talafatai i Sasae e le faamoemoeina. Ina ua matou faauu mai le iunivesite, sa toefoi atu i la’ua i o la aiga e fai lafumanu ma fai faatoaga, ae ou ulufale atu i le lalolagi o mea tau pisinisi.

O kata faaletausaga o le Kerisimasi ma valaau i telefoni mai lea taimi i lea taimi sa faatumauina ai le fesootaiga a o faagasolo o matou olaga. E oo mai i le taimi ua 30 ma ona tupu o’u tausaga, ua faalua ona avea au ma Taitai Sikauti. Mulimuli ane, a o faamaea la’u “taamilosaga” lona lua o se taitai fesoasoani o le vaega pepe, ua auauna atu a’u uo e toalua i au epikopo. A o gasolo le taimi, sa ou pa’u atu ai i se mailei o le faatusatusaina o o’u valaauga i valaauga o a’u uo, ma ou amata ai ona lagonaina le le manaomia ma le le amanaiaina o a’u.

E oo mai i le taimi ua 40 ma ona tupu o’u tausaga, o valaauga faaletaitai ua tuuina atu i isi ua avea ma faafitauli i ou mafaufauga mo le tele o aso. O taimi taitasi e valaau ai se tasi i se tofiga faaletaitai i le siteki, e musumusu mai ai Satani ia te au ou te le agavaa pe leai so’u faatuatua talafeagai mo ia valaauga. Sa mafai lava ona ou aveesea ma le atamai ia mafaufauga e ala i le tatalo ma le suesue, ae sa ou tauivi pea ma lo’u agavaa faaletagata lava ia. I le avea ai “na o se toeaina” ma laufali i taaloga pasiketipolo a le autalavou i le 50 o ou tausaga a o auauna atu a’u uo i au peresitene o siteki, e le o se mea lea sa ou mafaufauina o le a ou faia i lea matua.

Ona oo mai lea o se aafiaga na suia ai lou malamalamaaga i le talalelei. Sa ou fesoasoani i lo’u toalua i se tasi Aso Sa i lana vasega Peraimeri sa tumu i tamaiti malolosi ma tiotio tai fitu tausaga. A o amata le taimi o le fetufaaiga a le Peraimeri, sa ou matauina se tasi o le vasega o faagaulua i luga o lona nofoa ma sa iloagofie lava e le o malosi. Sa musumusu mai le Agaga ia te a’u o loo ia manaomia se faamafanafanaga, o lea sa ou nofo ai i ona autafa ma fesili lemu atu ia te ia po o le a se mea o tupu. Na te lei tali mai ae sa foliga mai o loo faanoanoa moni o ia, o lea na amata ai ona ou pese lemu atu ia te ia.

Sa aoaoina e le Peraimeri se pese fou, ma a matou usuina le, “A ou faalogo ma lo’u loto ou te lagonaina le leo o le Faaola,”¹ sa amata ona ou lagonaina le malamalama ma le mafanafana sili ona ofoofogia sa faatumulia ai lo’u agaga. Sa ou lagonaina le auiina o au i aao e faavavau o le alofa. Sa ou malamalama na faafofogaina e le Tama Faalelagi le tatalo a lenei teineitiiti ma sa ou i ai iina e tuuina atu le faamafanafanaga sa Ia finagalo e avatu ia te ia. Sa tatalaina lo’u malamalamaaga faaleagaga, ma sa ou mauaina se molimau patino o le alofa o lo tatou Faaola mo ia, mo Ana fanau taitoatasi, ma mo au. Sa ou iloa na Ia faatuatuaina au e auauna atu i se tasi o loo manaomia le fesoasoani, ma sa ou i ai i le mea sa Ia finagalo ou te i ai. Sa ou aoaoina o tatou o Ona aao pe a tatou auauna atu i le toatasi.

Ou te olioli i soo se avanoa e auauna atu ai, ma taumafai ia tumau le agavaa e lagona ai ia uunaiga a le Agaga ma ia i ai i le mea ua finagalo le Tama Faalelagi ou te i ai i le taimi e manaomia ai e Lana fanau se auaunaga.