Faatumauina o le Faatuatua i se Lalolagi o le Le Mautonu

Saunia e Epikopo Gérald Caussé

O Le Fesoasoani Muamua i le Au Epikopo Pulefaamalumalu

Ata

Elder Gérald Caussé

Ina ia faamalolosia a tatou molimau ma puipuia i tatou lava mai mea sese, e tatau ona tatou fafagaina pea ma faamalosia lo tatou faatuatua.

Sa ou fanau i sautesisifo Farani “i ni matua lelei” (1 Nifae 1:1) o e, mai le taimi a o ou laitiiti, sa fesoasoani ia te au e atiina ae le faatuatua ia Iesu Keriso ma se molimau o le talalelei toefuataiina. I le aoga, i le isi itu, sa faaalia ai e le tele o a’u faiaoga polofesa le masalosalo ma na oo ai lava i le feitai i soo se talitonuga faalelotu. O le tele o taimi sa ou faalogo ai i aoaoga a Korioa mai ia i latou o e na ulagia ou talitonuga:

“Faauta, o ni uputuu valea i latou a o outou tama. Tou te iloa faapefea ua moni ia mea?

“… Faauta, e le mafai ona outou iloa e uiga i ni mea tou te le vaai atu i ai” (Alema 30:14–15).

Ina ua 17 ou tausaga, sa amata ona ou aveina ni vasega faafilosifia i le aoga maualuga. I se tasi aso sa fai mai ai le faiaoga i le vasega, “E mautinoa lava e leai se tasi o iinei e talitonu sa i ai moni lava se Atamu!” Ona faasolo lea o lana vaai i totonu o le potu e pei o se tagata suesue, ma o loo sauni e osofai atu i soo se tagata e luiina o ia i le ioeina o lea ituaiga talitonuga. Sa ou fefe! Ae peitai, sa sili atu le malosi o lou naunautaiga ina ia faamaoni i la’u tapuaiga. Sa ou tilotilo solo ma ou iloa ai na o au lava mai na tamaiti aoga e toa 40 sa sii le lima. O le ofo o lo’u faiaoga na suia ai le mataupu.

O le a i ai nisi taimi i olaga o tagata uma o le Ekalesia o le a feagai ai ma ni tofotofoga o le faamaoni ma le malosi o a latou molimau. O le faaalia o le lototoa i nei taimi o le tofotofoina o lo tatou faatuatua o le a fesoasoani lea ia i tatou e tutu mausali ai i se lalolagi ua atili pau atu i le loloto o le le mautonu. Na manino lava le le mautonu i le oso solo mai o savali o loo siomia ai i tatou. O le oo mai o le Initoneti, mo se faataitaiga, ua le motu ai le tafe mai o ni manatu ma ni faamatalaga feteenai ma ua osofaia ai o tatou olaga o aso uma. O nei feteenaiga e mafai ona fenumiai ma faaumatia ai.

E mafai faapefea ona tatou iloa le eseesega o le upumoni ma le mea sese? E mafai faapefea ona tatou aloese mai le avea faapei o i latou o e ua “taofia mai le upumoni ona ua latou le iloa le mea e maua mai ai”? (MF&F 123:12).

O le faaiuga lava ua tuuina mai ia i tatou pe tatou te tumau mausali ai i a tatou molimau. Pe a ou mafaufau i lou olaga ua tuanai, ua ou iloa ai o le tulaga manuia o lau malaga faaletagata lava ia na faalagolago lea i ni nai mataupu faavae faigofie lea na faatumauina au i le ala. O nei mataupu faavae na faatagaina au ou te atiina ae au lava faaleagaga e ui i le “puao o le pogisa” (1 Nifae 12:17) ma mailei lea o loo siomia ai i tatou uma.

Saili Pea le Upumoni

Mo i latou o e faapea mai “e le mafai ona outou iloa” (Alema 30:15), ua fetalai mai ai le Alii, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou” (Mataio 7:7). O se folafolaga matagofie lena mea.

E fiaaai ma fia feinu i aso uma ia soo o Keriso i le atamai faaleagaga. Ua maua lenei faatinoga patino ona o le suesue, mafaufau, ma le tatalo i aso uma. Ua faatagaina ai i tatou e mulimuli i le faataitaiga a Iosefa Samita, o le sa “taunuu i le faaiuga o [lona] tumau pea i le pogisa ma le fenumiai, pe ou te faia e pei ona … ole atu i le Atua” (Iosefa Samita—Talafaasolopito 1:13).

O le suesueina o le afioga a le Atua ua puipuia mai ai i tatou mai faatosinaga o aoaoga faavae sese. Na fetalai mai le Alii, “Ona o ia o le na te taliaina o le a Ou tuu atu atili i ai; ae o i latou o e e fai mai, Ua lava mea ua matou maua, o le a aveesea mai ia te i latou e oo lava i mea ua latou maua” (2 Nifae 28:30).

Talia o Fesili e Lei Taliina

I la tatou sailiga mo le upumoni, ua mafai ona tofotofoina i tatou ina ia manao e malamalama i mea uma i le taimi lava lena. Ae peitai, e leai se gataaga o le atamai o le Atua ma “e le mafai e le tagata ona iloa ona ala uma” (Iakopo 4:8). E ao ona tatou taliaina le ola ai mo se vaitaimi e aunoa ma ni tali mo a tatou fesili uma. Faapei o Nifae, ua tatou faailoa atu ma le faamaoni o le Atua e “alofa o ia i ana fanau; e ui i lea, [tatou] te le iloa le uiga o mea uma” (1 Nifae 11:17).

Ae ui i lea, e aumai lava e le Alii ia i tatou se malamalama e manaomia mo lo tatou faaolataga ma le faaeaga. Ua Ia folafola mai, “Soo se mea tou te ole atu ai i le Tama i lo’u igoa ua tatau ai mo outou” (MF&F 88:64). Tatou te mauaina auauai nei tali, “i lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30), e fuafua lea i o tatou manaoga ma o tatou gafatia e malamalama ai.

Ua tuu mai ia i tatou ina ia filifili i le va o fesili ia e taua moni lava mo lo tatou alualu i luma e faavavau ma fesili ia e mafua mai ona o le faafiapoto, manao i se faamaoniga, po o se manaoga faamalieloto faaletagata.

Saili le Molimau a le Agaga

E mafai e i tatou taitoatasi ona aafia i ni vaitaimi o le le mautonu faaletagata. O nei masalosaloga e seasea ona tuuitiitia pe a suesue mo ni faamatalaga poto. Mo se faataitaiga, o nisi o mea na maua faatekinolosi po o le suesueina o le eleele e mafai ona faamalosia ai a tatou molimau e uiga i mau, ae e le mafai ona faamaonia le poto faaleagaga e ala i mafuaaga po o ni mea e vaaia faaletino.

O le malamalama i le upumoni ua faatatau lea i le molimau a le Agaga. E pei ona fai mai le Aposetolo o Paulo, “E faapea foi ona le iloa e se tasi mea a le Atua, ua na o le Agaga o le Atua” (1 Korinito 2:11).

Ua tatou maua le faamautinoaga faapea “aua e tautala mai le Agaga i le upumoni ma e le pepelo” (Iakopo 4:13). E mafai ona tatou maua mai le Agaga se aafiaga sili atu ona mamana nai lo o tatou lagona e galulue ai. I le Aposetolo o Peteru, lea sa faatoa faailoa atu lona faatuatua, na fetalai mai i ai Iesu, “Amuia oe Simona Paiona: Aua e le se tagata na ia faaali atu ai ia te oe, a o lo’u Tama o i le lagi” (Mataio 16:17). I le mavae ai o na mea uma, e toafia ni augatupulaga a Keriso latou te lei iloaina o Ia e ui sa vaai tino o latou mata ia te Ia!

Saili ia Upu a Perofeta ma Aposetolo

Talu ai nei sa ma talatalanoa ai ma se tasi tagata iloga o se isi ekalesia. O lona naunau ina ia iloa pe o i tatou o se ekalesia Kerisiano, sa ia fautuaina mai ai e faatulaga se tauvaga o le tetee i le va o ni tagata atamamai i aoaoga faavae o a matou ekalesia e lua.

Ae peitai, o le malosi ma le moni o le aoaoga faavae a Keriso, e le faalagolago lea i fetauaiga a tagata popoto ao le paia o molimau a Ona soo filifilia. Sa faailoa mai e le Perofeta o Iosefa Samita faapea, “O mataupu faavae autu o la tatou tapuaiga o le molimau lea a Aposetolo ma Perofeta, e faatatau ia Iesu Keriso, sa maliu o Ia, ma tanumia, ma toetu mai i le aso tolu, ma na afio ae i le lagi.”¹

Mo le tele o seneturi uumi o le Liliuese, e lei faaitiitia tagata popoto, ae na leiloloa ia molimau a Keriso. O se taunuuga, na suia e mafuaaga faaletagata le malosi o faaaliga faalelagi.

Pe a tatou oo i faafitauli, o la tatou tali atu muamua lava o le suesue lea i tusitusiga paia ma upu a perofeta soifua. O a latou tusitusiga o ni faailoilo ia e le mafai ona faaseseina i tatou: “O le mea lea, ua matou suesue ai i perofeta, ma sa matou maua faaaliga e tele ma le agaga o valoaga; ma o le mauaina o nei molimau uma na matou maua ai se faamoemoe, ma lē maluelue ai lo matou faatuatua” (Iakopo 4:6).

Fafagaina Lou Faatuatua

Tatou te le maua se “molimau seia uma ona tofotofoina o lo [tatou] faatuatua” (Eteru 12:6). Ua i ai le mana o le faatuatua e tatalaina ai le malamalama o upmoni e faavavau. O le tuleiga atu i lona atoaga, ua avea ai le malamalama ma se faamautinoaga mausali ma le atoatoa. Sa tusia e Moronae e uiga i le uso o Iareto faapea “ona o le malamalama o lenei tagata sa le mafai ai ona taofi o ia mai le vaai atu i totonu o le veli; … ma sa le toe ia te ia le faatuatua, aua ua ia mautinoa, ua le masalosalo i se mea” (Eteru 3:19).

O le faamalolosia o a tatou molimau ma le puipuia mai o i tatou lava mai mea sese; o lea e tatau ai ona tatou fafagaina pea e le aunoa ma faamalosia lo tatou faatuatua. O le amataina la, tatou te manaomia ai le i ai o ni loto mama ma le agamalu maoae. Sa lapataia e Iakopo le nuu o Nifae e uiga i le faamaualuga o i latou o e “pe a aoaoina i latou … manatu ua popoto i latou, ma … latou le faalogologo ai i le fautuaga a le Atua, ona ua latou tuueseina, i le manatu ua latou iloa mo i latou lava” (2 Nifae 9:28).

O le mea e sosoo ai, e tatau ona tatou faatinoina ni galuega. Na aoao atu le Aposetolo o Iakopo faapea “na galulue faatasi le faatuatua ma … galuega, o galuega foi ua atoatoa ai le faatuatua” (Iakopo 2:22). E le mafai ona tatou faamoemoe e maua se faaaliga patino seiloga tatou te amio faapei o ni soo moni o Keriso. O le faaaloalo i feagaiga na tatou osia ma le Atua tatou te agavaa mo le mauaina o le mafutaga ma le Agaga Paia, o le faamalamalamaina o tatou mafaufau ma mafua ai ona fua o tatou agaga.

Ou te molimau atu i le moni o nei mataupu faavae. Ou te iloa e ala i aafiaga afai tatou te faatatauina nei mea i o latou olaga, o le a faamautinoaina lo tatou saogalemu i se lalolagi lē mautinoa ma lē mautonu. E aumaia ai se folafolaga ofoofogia: “Ma ona o lou filiga ma lou faatuatua ma lou onosai i le afioga i lona tausiga, ina ia mafai ona mauaa i totonu ia te oe, faauta, e lata le aso o le a e tauina ai lona fua, lea ua sili ona pele, … ma o le a outou taumamafa fiafia i lenei fua seia oo lava ina outou maoona, o le a outou le fia aai, pe fia feinu ai” (Alema 32:42).