Vaai Faalemafaufau ia te A’u i totonu o le Malumalu

Ao avea au ma se teineitiiti, sa ou miti i le avea ai ma se vaega o se aiga e faavavau. Sa 12 ou tausaga i le taimi sa faamau ai lou aiga i totonu o le Malumalu o São Paulo Pasila. Ou te manatua lelei lava lo matou tootutuli faatasi ma lou aiga i le fatafaitaulaga o le malumalu ma faamauina faatasi ma o’u tei i o matou matua mo le taimi nei ma le faavavau atoa. Sa ou iloaina i lena taimi o le ituaiga aiga lea ou te fia manao i ai. Sa ou tuuina se ata o le Malumalu o São Paulo i talaane o lo’u moega, ma sa ou tilotilo i ai i po uma, ma toe faafouina la’u tautinoga ou te le manao i se isi lava mea nai lo le aiga e faavavau.

O le tele o tausaga mulimuli ane sa ou faigaluega ai i le itu o fefaatauaiga a se kamupani tele lava. I se tasi aso sa faailoa mai ai ia te au e lo matou pule se tagata faigaluega fou. O ia o se alii talavou umi ma e lanumoana aulelei ona mata, e manaia lana ataata, ma e manaia foi ana sitali.

Sa ou tau le talitonu ina ua amata ona ia faatafai mai ia te au i se taimi mulimuli ane. Sa ou lagona le pei ua ou i ai i le tumutumu o le lalolagi! O le ma evaga muamua lava, sa ou fiafia ai i lou iloaina o ia o se alii e ta temupalau i se faili lea ua amata ona lauiloa. Sa ou iloaina ai foi e ulaula ma inupia, ae sa ou fetuunaia lena mea, talu ai e le auai o ia i le Ekalesia, e le o se mea sese la lea mea mo ia.

Ina ua ou taunuu i le fale i lena po, sa faatumulia ou mafaufauga i lena alii talavou aulelei. Peitai ina ua ou tootuli e tatalo, sa ou vaai i la’u ata o le malumalu, ma sa oo mai se lagona uiga ese ia te au. Sa ou le fia mafaufau i ai ma sa ou alu loa e moe.

O le aso na sosoo ai, ina ua ma tafafao, o le tulaga o lona inupia ma ulaula na aumaia ia te au se lagona le lelei. Sa ou ma e nofo i se laulau e i ai ni pia, e tusa lava pe ou te le pa’i atu i ai. Sa ou lagona i le taimi muamua le fiafia ona ita lea ina ua ia taumafai e kisi mai ia te au. Ina ua ou sosogiina le manogi sikareti ma le pia i lana manava, e lei mafai ona manuia lana taumafaiga e kisi mai!

Sa ou tootuli i autafa o lou moega e tatalo i lena po, ma tilotilo atu i le ata o le malumalu. Sa ou toe manatua ai, o lenei alii talavou e le o se ituaiga tagata e mafai ona aveina au i le malumalu mo se faaipoipoga e faavavau.

Sa ou taoto i lalo ma moe, ae ou te lei moe sa ou mafaufau ma le fiafia e uiga i au sini i le faaipoipo atu i se alii talavou agavaa lea e mafai ona ma fausia se aiga e faavavau.

E ui lava o loo aulelei pea le alii ta temupalau, ae ua ou le toe faamemelo atu i ona foliga faatosina. Sa ou iloaina le ituaiga faaipoipoga sa ou manao i ai.

O le tausaga mulimuli ane sa ou faaipoipo ai i le Malumalu o São Paulo i se alii agavaa e umia le perisitua o le ou te alofa i ai. Sa taua tele le faatalitali mo se alii talavou faamaoni o le e mafai ona ma mauaina lena faamanuiaga matagofie mai le Alii.