Te pŭpŭ utuafare
Te ora nei te taata papa‘i i Alberta, i Canada.
E mea ohie a‘e ia upootiʻa mai te mea e, e rave amui tatou i te ohipa.
« Nous aidons tous avec joie » (Chants pour les enfants, 108).
Ua topa te morare o Ammon a faaruʻe ai raua to’na metua tane i te haʻutiraa tue popo. « Aita vau e taa ra », ua parau oia. « Ua puʻe noa ta tatou mau taata haʻuti maitai. No te aha aita tatou e re nei ? »
E taata tuʻe popo aravihi to’u papa. Peneiaʻe e nehenehe ta’na e tauturu mai.
« I to’u mana‘o, ia haapii outou e haʻuti ei pŭpŭ », ua parau papa. « Ua hinaaro pauroa outou ia ô ta outou popo, e ere ? »
« E », ua parau Ammon. « Aita râ e ti‘a ia matou paatoa ia faaô atu. Tera anei ta oe e parau ra ? »
Haʻuti noa te upoo o papa. « Eita e roaa ia oe ia tito i te popo o oe ana‘e. A tahi, e ti‘a i te feia paruru ia haru mai i te popo a te tahi atu pŭpŭ, e ere ? »
Ua ata noa Ammon. « Eita ihoa ïa e ô te popo mai te peu aita ta matou e popo ».
« Ua tano oe », te parau a papa. « I muri iho, e horo‘a te feia paruru i te popo i te taata e nehenehe e tito. Eita e haere ia’na ana‘e ».
« Mai te reira ihoa paha », ua parau atu Ammon.
Tapae atura ratou i te fare, te tape‘a ra mama ia pêpe e te faaineine ra i te maa. « E aha te huru te haʻuti ? » ta’na ïa aniraa.
« Ua pau faahou matou », pahono mai nei Ammon. « E tamata matou ia haamaitai atu â i te tahi haʻuti ».
« E mana‘o maitai tera », te parau a mama.
« Ua poʻia roa vau ! » Te tuô haere ra Miguel a horo ai ratou Samuel e o Lucas i roto i te fare.
« Tamaroa ma, e nehenehe anei ta outou e faaineine i te airaamaa, e ohi atoa i te mau haʻuti na raro ? » Ua ani mama.
Ua amuamu na tamaroa e maha.
« E ere hoʻi na’u i rave i teie mau haʻuti », te parau ïa a Samuel.
« Eita ïa e oti oioi ! » Te amuamu maira Miguel.
Ua ata o papa. « I to’u mana‘o, hoê â to tatou fifi e to te pŭpŭ a Ammon ».
« E aha te reira ? » Ua ani Samuel.
« Aita tatou e rave amui nei i te ohipa », ua parau Ammon. « Ua hinaaro pauroa tatou e rê no te amuraa i te maa. Tera râ, te vaiiho nei tatou ia Mama ia rave pauroa i te ohipa ».
« Tera ihoa ! » Te reo ïa o papa. « Nahea tatou e nehenehe ai e rave i te ohipa mai te hoê pŭpŭ ? »
E mana‘o to Ammon. « Na Samuel paha ïa e na’u e faaineine te airaamaa ? E e ohi te tahi mau tamaroa i te mau haʻuti na raro ».
« Mana‘o maitai roa ! » Te reo ïa o papa.
Aita i maoro roa, ineine mai nei te maa. Ua tufene Ammon i to’na rima no te pure. Ua oaoa oia ua rave to’na utuafare i te ohipa ei pŭpŭ. Maitai pai e na reira atoa mai ta’na pŭpŭ tuʻe popo.
Faahoho‘araa na Mark Jarman