Haapii rahi atu â no ni‘a i te mea e vai ra
Te ora nei te taata papa‘i i Oslo, Norway.
No te feia apî i Oslo, i Norevetia, ua faaineine ratou i te hoê mahana taatoa no te hoê misioni rave tamau.
Mai te taime mai â ua faaara te peresideni Thomas S. Monson i te tauiraa o te faito matahiti no te taviniraa misionare, ua pahono anaanatae mai te feia apî na te ao atoa nei, eiaha no te titauraa noa ia tavini, no te titauraa atoa râ ia faaineine no te tavini. E te hoê rave‘a no te faaineine, o te haapiiraa ïa no ni‘a i te mea e vai ra no te riroraa ei misionare rave tamau.
E te reira mau ta te tahi feia no Norevetia i rave i roto i te hoê « ohipa misionare » ta te paroisa no Fredrikstad no te tĭtĭ no Oslo Norevetia i faatupu.
Te tomoraa i roto i te pû haapiipiiraa
Ua putuputu te feia apî i te fare pureraa, i roto i te hoê piha tei faarirohia ei pû haapiipiiraa misionare. « Ua horoʻahia mai ia matou te titauraa ia haapii no ni‘a i te hoê nunaa fenua », te parau ra Jakob R. no te paroisa no Moss. « Ua horo‘a mai te reira ia matou i te huru mana‘o e tae mai ia farii oe i te piiraa misionare, oia mau hoʻi, e nehenehe oe e piihia i te hoê vahi ta oe i ore i mâtau ».
Te farereiraa i te « peresideni misioni »
« I muri iho, ua haere matou i roto i te tahi atu piha, tei reira te hoê misionare tei ho‘i mai, o ona tei haʻuti i te ti‘araa peresideni misioni », te parau ra Simon W. no te paroisa no Oslo. Ua parau mai teie misionare e te tahi atoa mau puʻeraa tei ho‘i mai no ni‘a i te mau ohipa e itehia i roto i te misioni. « Ua mana‘o roa vau e, e ohipa maitai ia haapii mai roto mai i te mau misionare tei ho‘i mai no ni‘a i te mau mea e itehia i roto i te misioni rave tamau », te parau ra Simon. Ua farii matou i te hoê tareta iʻoa, ua haere apipiti matou, e ua faauehia mai ia vai apipiti noa i te mau taime atoa.
Te haamaitairaa i te aravihi
Ua itehia i roto i te mau piha raveraa ohipa i te haapiiraa no ni‘a i te haamaitairaa pae varua, no ni‘a atoa hoʻi i te faanahoraa i te mau titauraa pae tino, mai te pu‘araa ahu, te haapa‘oraa i te hoê tapura haamauʻaraa, e ia vai noa te ea maitai.
« Ua au taa ê au i te piha raveraa ohipa no ni‘a i te haamataraa i te hoê aparauraa no ni‘a i te evanelia », te parau nei Inger Sofie J. no te paroisa no Oslo. « E ohipa teie ta’u e nehenehe e rave i teie nei â taime ».
« Ua au vau i te aparauraa no ni‘a i te faa‘ohiparaa i te Ia Poro Haere i Ta‘u nei Evanelia, » te parau nei Karl Frederik O. no te paroisa no Fredrikstad. « I mana‘o noa na vau e, e mau irava taa ê ta te mau misionare e tamau, e ere, ua taa atura ia’u e, te mea ta’u e rave ra i te Séminaire, e riro te reira i te tauturu mai ia’u ei misionare e na reira atoa te mau mea ta’u e tuatapapa a‘ena nei i roto i te buka Ia Poro Haere i Ta‘u nei Evanelia ».
E rave rahi tamaroa tei parau e, hoê o te mau piha raveraa ohipa eita roa e moʻe, o te tamataraa ïa i te auri i te ahu uouo. « Ua faahaamanaʻo te reira ia’u e, e rave rahi â ohipa i te pae no te aravihiraa ta’u e ti‘a ia rave no te faaineine no te hoê misioni rave tamau », te parau ra Jakob.
« Ua haapii au e, e rave rahi mau mea ta’u e nehenehe e rave i teie nei no te amui atu i te mau misionare rave tamau e tavini nei i ô nei, ia riro matou i roto e hoê â pŭpŭ » te parau nei Sarah R. no te paroisa no Sandvika. « E mau misionare atoa hoʻi te mau melo ».
No te faahaamanaʻoraa e, e tavini te mau misionare na te ao atoa nei, ua faaineinehia te tahi mau maa no tera e tera fenua no te mau amuamuraa. « Ua faahaamanaʻo te reira ia’u e, e tano ia tamatamata i te tahi mau maa apî, ia haamâtau vau i te tamataraa i te maa aita vau e amu rahi nei. E tauturu te reira ia’u ia haamâtau vitiviti mai te peu noa’tu e piihia vau i te hoê vahi tei reira te maa aita vau i mâtau », te parau nei Simon.
Te faaineine-roa-raa
« I te pae hopea o te mahana, ua faaroo matou i na iteraa papû o na feia apî e piti e o na e piti misionare tei ho‘i mai, no faaoti noa mai nei i ta raua misioni, e ua himene matou i te himene, ‘Ma‘itihia e te Atua ra’ », te parau nei Liss Andrea O. no te paroisa no Fredrikstad. « Te mana‘o i tae mai i roto ia’u, oia hoʻi, mai te peu e tamau noa vau i te himene i teie himene pauroa te taime, e haamana‘o tamau atoa ïa vau e, ia tavini tatou ei misionare, te tavini ra ïa tatou i te Metua i te Ao ra, e e haamaitai mai Oia ia tatou ».
I te hoperaa taua mahana ra, ua maramarama te feia apî o te tĭtĭ e, aita ratou e faaineine noa ra no te riroraa ei misionare rave tamau, e nehenehe atoa râ ia roaa mai ia ratou te tahi ite no ni‘a i te ohipa misionare i teie nei, e i roto i to ratou oraraa taatoa.