Mauruuru, e te taea‘e Jay

« E sabati ananahi », ua parau vau i ta’u tamahine e pae matahiti, tei mohi i ni‘a i to’u na turi avae. E ata tei itehia i ni‘a i to’na hoho‘a mata.

« Maitai roa ïa », ua parau mai oia. « E ite ïa vau i te taea‘e Jay ».

Aau mehara a‘era to’u. Auê to’u mauruuru rahi i roto ia’u no teie orometua Paraimere, e orometua here e te aupuru tei faaohie mai i to matou taeraa mai i roto i teie paroisa apî. Ua huehue roa hoʻi to te utuafare taatoa mana‘o no te faaruʻeraa matou i te fenua ropu no Marite no te haere mai i ô nei, 1 350 maile (2 173 km) te atea, o te tamarii rii ihoa râ tei pe‘ape‘a maitai, ta maua tamahine o Season. No to’na mamahu, e mea taiâ na’na te mau mea apî e nehenehe e hiti mai, e ua taiâ atoa oia i te haere i te pureraa i tera hepetoma matamua ra.

Auaʻe râ te taea‘e Jay, to’na marû e to’na huru pûpû ia’na, ua tano rii maitai noa ta’na mau parau arearea e to’na here no te faahoa ia Season. I tera ihoa sabati matamua, ua piʻo ona i ni‘a ia’na, ma te rave i to’na rima e ma te hi‘o i roto i to’na mata, e ua parau oia, « Haere mai e te potii. E au roa oe i ta tatou piha haapiiraa ».

A maʻiri noa ai te mau hepetoma, ua anaanatae roa Season ia tae mai te sabati, hau atu i te tahi noa’tu mahana. Ia tae matou i te pureraa, e hi‘o haere oia na roto i te amuiraa no te ite atu i to’na orometua. E ata mai oia.

Na roto i te mau matahiti, ua haamana‘o te taea‘e Jay i te mau piahi atoa ma te horo‘a i te tahi tao‘a i te mau mahana taa ê e i te mau oro‘a fanauraa. Ia fatata mai te oro‘a fanauraa o Season, o te taea‘e Jay te manihini faufaa roa a‘e ta’na e hinaaro ia haere mai.

Ua ite anei oia i te huru o ta’na faaûruraa i te oraraa o ta maua tamahine iti ? Ua ite a‘enei oia i te ohipa i tupu i roto i teie mau piahi Paraimere pae matahiti, na roto i ta’na mau parau e ta’na mau ohipa ? E ti‘a anei ia’na ia ite i te faufaa o te reira no’u, te metua vahine, to’na riroraa ei tuhaa i roto i te oraraa o ta’u tamahine ?

I muri iho, ua taui Season i te piha haapiiraa, tei roto atura i te piha a te taea‘e Edward, e ua tamau noa â teie ohipa faahiahia. Auê to’u mauruuru rahi i teie mau tane e mau vahine tei haapa‘o maitai i ta ratou ohipa, tei faaineine maitai ia ratou, tei vai haehaa noa, e ua faatupu ratou i te faaûruraa pae varua, te faaûruraa maitai i roto i te oraraa o Season.

Ua haamaitaihia to matou nei utuafare taatoa na roto i teie mau taata tei pûpû ia ratou, tei tavini atoa ia matou i ni‘a i ta matou eʻa nuuraa i te pae varua. Te haamana‘o nei au i te hoê tia‘i « Scout », te hoê tauturu pŭpŭ tahu‘a faaoroma‘i noa, te hoê orometua « Séminaire » faaoroma‘i, te hoê peresideniraa faahiahia no te Feia Apî Tamahine e te hoê episekopo aupuru.

Ua haamaitaihia to matou nei utuafare, ua ite râ vau e ere o matou ana‘e. E au te « taea‘e Jay » i te mau taata e rave rahi, i te mea e, e rave rahi mau taea‘e e mau tuahine haapa‘o ua haaputapu ta ratou taviniraa i te oraraa o te mau utuafare mai ia matou nei. Auê to matou mauruuru rahi i to ratou varua, to ratou fafauraa ia ratou, ta ratou faaineineraa e to ratou here.

Mauruuru i te mau tavini papû e rave rahi i roto i te Ekalesia tei tauturu i to matou nei utuafare.