Te pure faaroo

Hōho’a

A young woman kneeling by her bed in prayer. There is a copy of the Book of Mormon on the bed in front of her.

E ohipa hau atu â te pure i te tahi noa mau parau e parau atu i te Atua. E rave‘a te reira no te faa‘ite atu e no te farii mai i te parau, i rotopu i te Atua e Ta’na mau tamarii.

Ia faa‘ohipahia te pure mai tei titauhia, e faa‘ite atu tatou i te mana‘o o to tatou aau na roto i te mau parau ohie. E e pahono pinepine mai te Metua i te Ao ra na roto i te tuuraa i te mana‘o i roto i to tatou feruriraa e to tatou aau. Te faaroo noa nei Oia i te pure aau tae ta tatou e pûpû nei a pure noa ai tatou ma te fafauraa mau ia haapa‘o i Ta’na mau parau, noa’tu â Ta’na pahonoraa e noa’tu â te taime e tae mai te reira.

Teie te parau fafau a te Fatu i te mau taata atoa e taiʻo e e pure no ni‘a i te Buka a Moromona.

« E o teie ta’u a‘o ia outou na, ia itea teie nei mau parau ia outou, e ui atu i te Atua, i te Metua mure ore ra, i te i‘oa o Iesu Mesia e, e parau mau anei teie mau parau, e aore anei ; e ia ui atu outou ma te aau hinaaro mau, ma te mana‘o papû, e ma te faaroo i te Mesia, na’na ïa e faaite mai i te parau mau ia outou na roto i te mana o te Varua Maitai ».

« E na roto i te mana o te Varua Maitai e ite ai outou i te parau mau i te mau mea atoa ra » (Moroni 10:4-5).

E parau fafau papû teie. Ua tamata e rave rahi mirioni taata i te reira e ua ite-papû-hia mai te reira parau fafau faahiahia no ni‘a i te pure na roto i te fariiraa i te hoê haamaitairaa tei faaî i to ratou oraraa i te popou e te oaoa morohi ore. E tano teie parau fafau no ta tatou mau pure atoa, no te ite mai i te mana‘o e te hinaaro o te Atua ia tatou. E ti‘a ia tatou ia faa‘ohipa i te reira i te taime atoa e farii tatou i te hoê parau aʻo mai roto mai i te hoê tavini a te Atua tei haamanahia no te horo‘a ia tatou i te arata‘iraa. Ei hi‘oraa, e ti‘a ia tatou ia turuʻi i ni‘a i te reira a faaroo ai tatou i te hoê aʻoraa i roto i te amuiraa rahi. E ti‘a ia tatou ia faa‘ohipa i te reira i te taime a haapiihia ai tatou e na misionare haehaa tei piihia e te Atua na roto i te peropheta ora. E tano atoa te reira no te parau aʻo ta tatou e farii nei mai roto mai i to tatou episekopo e aore râ to tatou peresideni amaa.

E mea ohie roa te mau ture e ohipa ai te pure i roto i to tatou oraraa. Titau-roa-hia ia tatou ia ite i te parau mau na roto i te pureraa i te Metua na roto i te i‘oa o Iesu Mesia. Titau-roa-hia ia tatou ia ani ma te aau hinaaro mau, te auraa ra, titau-roa-hia ia roaa to tatou mana‘o mau no te haapa‘o i te mau pahonoraa e te mau titauraa ta te Atua e tuu mai i ni‘a ia tatou. E e ti‘a i to tatou mana‘o papû ia mahiti mai mai roto mai i to tatou faaroo ia Iesu Mesia.

Te taata imi e tai‘o i te Buka a Moromona na mua i to’na bapetizoraa e to’na haamauraa, e farii oia i te haapapûraa e, e buka mau te reira e e farii atoa oia i te iteraa papû e, ua iriti Iosepha Semita i te reira na roto i te mana o te Atua. I muri iho i to tatou haamauraahia ei melo no te Ekalesia, e nehenehe ta tatou e farii i te Varua Maitai ei hoa no tatou no te haapapû mai i te tahi atu mau parau mau. Ei reira, ia pure noa’tu tatou na roto i te faaroo, e ti‘a atura ia tatou ia tia‘i i te Varua Maitai ia faa‘ite papû mai ia tatou e, o Iesu te Mesia, e te ora nei te Metua e ua here Raua ia tatou, e i te mau tamarii atoa a te Metua i te Ao ra.

O te hoê te reira o te tumu te vai ra te hoê parau fafau i roto i te Buka a Moromona, e roaa te aroha i to tatou nei aau ia faa‘ite papû mai te Varua Maitai ia tatou e, o Iesu te Mesia : « O te marû e te haehaa te aau, e te faʻi oia na te mana o te Varua Maitai e, o Iesu o te Mesia ïa, ia vai atoa te aroha i roto ia’na e ti‘a’i » (Moroni 7:44).

E rave‘a rahi e vai ra i roto i te mau sabati haapaeraa maa atoa no te tupu te taata i te pae varua. E ti‘a i te sabati haapaeraa maa ia haafatata ia tatou i te ohipa i tupu i ni‘a ia Alama e i na tamaiti a Mosia, tei pure e tei haapae i te maa no te ite mai i te parau mau mure ore, ia ti‘a ia ratou ia haapii i te mau ati Lamana ma te mana e te haamanaraa e te here (hi‘o Alama 17:3, 9).

I te sabati haapaeraa maa, e amui tatou i te pure e te haapaeraa maa. No te haamaitai i te feia veve, e horo‘a rahi tatou i te ô haapaeraa maa i te episekopo ra e aore râ i te peresideni amaa ra, i te faito a‘e o te haamauʻaraa no na tamaaraa e piti e haapaehia. E fariu to tatou mau mana‘o e ta tatou mau pure i te Faaora e i te feia Ta’na e hinaaro ia tavini atu tatou ma te pahono i to ratou mau hinaaro i te pae varua e i te pae tino.

E riro atura ta tatou mau pure e to tatou mau hiaai i te fatata rahi atu â i te mau pure e te mau hiaai o te Faaora, i te mea te haapae nei hoʻi tatou i te maa no te riro ei taata marû, ei taata ohie ia haapii e ei taata here rahi. E mai Ta’na i rave, e pure atu tatou no te ite mai i te hinaaro o te Metua no tatou, e no te rave roa i te reira.