Parau poroʻi na te mau tuahine hahaere
Te misioni hanahana a Iesu Mesia : Te pane ora
A tuatapapa na roto i te pure i teie materia ma te imi ia ite e aha te faa‘ite atu. Nahea te maramaramaraa i te oraraa o te Faaora e i Ta’na misioni i te faarahi i to outou faaroo Ia’na e i te haamaitai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
Tuhaa no te hoho‘a Ei haamanaʻoraa Ia’u, na Walter Rane
Ua parau Iesu, « O vau te pane ora o tei pou mai mai te rai : o te amu i teie nei pane, e ti‘a ïa i te oraraa » (Ioane 6:51). « Te haapii nei Iesu ia tatou, Ta’na mau pĭpĭ e, e ti‘a ia tatou ia hi‘o i te Atua i te mau mahana atoa no te pane—te tauturu e te maa—ta tatou e hinaaro no taua mahana ra », te na reira mai ra Elder D. Todd Christofferson no te Pŭpŭ no te Tino Ahuru Ma Piti Aposetolo. « Te parau nei te titauraa a te Fatu… no te hoê Atua here, tei ite i te hinaaro naʻinaʻi atoa o Ta’na mau tamarii i te mau mahana tata‘itahi, e o te hiaai roa nei ia tauturu ia ratou, ratou tata‘itahi. Te parau nei Oia e, e ti‘a ia tatou ia ani na roto i te faaroo i teie Taata « tei horo‘a hua mai i te maitai i te taata’toa ra, ma te pato‘i ore ; e e horo‘ahia mai ta’na’ (Iakobo 1:5) ».1 A maramarama noa ai tatou e, na Iesu Mesia e pahono i to tatou mau hinaaro, e fariu tatou Ia’na ra no ta tatou maa varua.
Te ani manihini mai nei Elder Jeffrey R. Holland no te Pŭpŭ no te Tino Ahuru Ma Piti Aposetolo ia tatou, « ia amui mai i roto i te opuaraa rahi a te mau pĭpĭ matamua no te Mesia, tei faa‘ite atoa i to ratou hiaai no te pane ora—ratou tei ore i hoʻi i muri, tei haere mai râ Ia’na ra e tei faaea Ia’na ra e tei ite e, aita’tu e taata ta ratou e nehenehe e haere no te parururaa e te faaoraraa ».2
Te tahi atu mau papa‘iraa mo‘a
No roto mai i te mau papaʻiraa moʻa
Ua haapii Iesu Mesia i te naho‘a rahi hau i te 4 000 taata. I te maʻiriraa e toru mahana, ua parau Oia i Ta’na mau pĭpĭ : « Te aroha nei au i teie nei feia rahi, i te mea… aita a ratou maa ia amu ;
« E ia tuu porori noa vau ia ratou i to ratou utuafare, e matapourihia ratou i te eʻatiʻa…
« Ua na ô maira ta’na mau pĭpĭ ia’na, Ei hea ïa maa e noaa’i ia tatou i teie nei medebara, e ati ai teie nei feia ?
« Ua ui atura [Iesu] ia ratou, E hia a outou pane ? Ua na o maira ratou, E hitu ».
Ei reira, « rave ihora [te Mesia] i taua na pane e hitu ra, haamaitai atura i te Atua, vavahi ihora, tuu atura i ta’na mau pĭpĭ ra, ia tuu atu ratou i mua i te aro o te mau taata ra…
« E e pue iʻa rii hoʻi ta ratou : ua haamaitai atura oia i te Atua, e ua faaue atura ia tuu-atoa-hia i mua ia ratou ra.
« Amu ihora ratou e paʻia roa a‘era, ohi ihora ratou i te huahua rii maa toea ra e hitu ete ». (Hi‘o Mareko 8:1-9.)