Tavini i teie nei no te tavini a muri a‘e

« E na mua vau ia oe i te fare pure ! » Ta Mórmon ïa i parau a toro ai to’na rima i ni‘a i te oe o te fare pure, tei na ni‘a mai i te mau tumu raau. Ei reira ua taumi oia i te horo ia hemo mai to’na teina, o Morian.

Hoê maile a‘ena ratou i te atea i to ratou fare, e te horo noa ra Mórmon raua Morian, e tapae a‘era raua i mua i te opani auri o te aua fare pureraa. Ua faafaaea rii raua no te huti i te aho.

Aita â raua i faaoti atura o vai tei upootiʻa, te tuô maira te hoê tamaroa ia raua, « E haʻuti tatou i te futebol [tuʻeraa popo] ? »

E mea au roa na Mórmon te futebol, teie râ, te haere ra ratou e tamâ i te fare pure no te pureraa i te mahana no muri iho.

Ua ueue Mórmon i to’na upoo. « Eiaha i teie nei—arauaʻe rii paha ! » ta’na i tuô atu.

E teie o Mórmon raua Morian, te haa ra. Ua turaʻi Mórmon e to’na papa i te mau parahiraa e puromu atu ai, e ua taahu Morian i te tahua e to’na mama.

I muri iho, ua horoi amui na tamaroa i te mau hiʻo i roto i te vahi haumitiraa. « Aita vau i mana‘o e, e au vau i teie ohipa tamâraa fare pure, e mea huru anaanatae », ua parau Morian. « Eaha to oe mana‘o, e Mórmon ? Tera anei te tumu oe i haere mai ai, e aita i haere e haʻuti i te futebol ? »

Ua feruri Mórmon i to’na papa. O oia te episekopo o ta ratou paroisa, noa’tu râ, e faataa ihoa oia i te tahi taime no te tauturu ia tamâ i te fare pure.

« Tei ô nei au no te mea ua hinaaro vau ia riro mai ia papa », ua parau Mórmon.

Ei reira, ua feruri oia i te mau misionare i roto i ta’na paroisa. Te rave ra raua i te ohipa patotoraa e te faa‘iteraa i te Buka a Moromona ia vetahi ê. E titau raua i te mau taata ia haere mai i te pureraa i teie fare pure ta teie na tamaroa e tamâ ra.

« Tei ô nei au no te mea te vai ra te mahana e haere atoa vau e tavini i ta’u misioni », ua feruri Mórmon. « E nehenehe ta’u e tauturu i te mau misionare na roto i te faaineineraa i te fare pure ».

Te feruri ra Mórmon i te mahana no ananahi, ia ti‘a mai raua to’na taea‘e i te hora 6:00 i te poʻipoʻi, e haere atu ai i te pureraa i roto i to raua ahu uouo e te taamu arapoʻa, no te faaineine i te mau parahiraa e te mau buka himene i roto i te piha o te Paraimere.

« Tei ô nei au no te mea ua hinaaro vau ia tavini i roto i te hoê piiraa na te Ekalesia », ua feruri oia.

Ua feruri Mórmon i te taime fatata roa e riro mai oia ei diakono. E riro oia i te opere i te oro‘a ma te rave i te tahi atoa mau mea ei taviniraa.

« Tei ô nei au no te mea, i teie matahiti i muri nei, e farii atu vau i te autahu‘araa, e te hinaaro nei au ia rave i te mea atoa e roaa ia’u no te faaineine ».

E ohipa ta Mórmon i rave a‘ena no te faaineine no te autahu‘araa : ua farii oia i ta’na fetiʻa no te faanahoraa Faaroo i te Atua. Ua haapii a‘ena ra oia ia ora i te evanelia e ia tavini ia vetahi ê.

E i te hopea, ua hi‘o oia i te hoho‘a o to’na taea‘e i roto i te hiʻo, e ua ata atura.

« Tei ô nei au no te mea ua here au i te Fatu », ua pahono atu oia, « e no te mea atoa hoʻi, e tauturu teie taviniraa ta’u ia faaineine no te tavini a muri a‘e ».