Te mau uiraa e te mau pahonoraa
E mea fifi ia haavî i to tatou mau mana‘o, areʻa râ e nehenehe te reira ia ravehia e e hopoi mai hoʻi i te mau haamaitairaa : « A haapii noa ai outou ia haavî i to outou mau mana‘o, e upooti‘a outou i ni‘a i te tahi mau peu, e tae noa’tu i te mau peu haʻiriiri. E roaa mai ia outou te itoito, e upootiʻa outou i ni‘a i te riʻariʻa e e roaa ia outou te hoê oraraa oaoa ».1
A feruri atoa i teie mau haamaitairaa i muri nei :
-
E tauturu te mau mana‘o mâ i « to outou ti‘aturiraa ia puai roa i mua i te aro o te Atua », e « e riro te Varua Maitai ei apiti no outou i te mau taime atoa » (PH&PF 121:45-46).
-
E tauturu te mau mana‘o mâ ia outou ia ite i te faaûruraa, no te mea e parau mai te Varua Maitai i to outou aau e i to outou feruriraa (hi‘o PH&PF 8:2-3).
-
E tauturu te mau mana‘o mâ ia outou ia haapa‘o i te faaueraa rahi matamua : hinaaro oe i to Atua ma to aau atoa, e ma to varua’toa, e ma to mana‘o atoa (hi‘o Mataio 22:37).
Ua rahi te mau mea ta outou e nehenehe e rave ia roaa mai te mau mana‘o mâ a‘e, mai ta outou e ite atu i te mau mana‘o i ni‘a i teie api parau. Tera râ, te hoê o te mau mea matamua roa a‘e ta outou e nehenehe e rave—e e haere noa te reira i te rahi—o te upootiʻaraa ïa i ni‘a i te « taata tino nei ». E mea au na te taata tino nei te mau mana‘o havahava. O teie te rave‘a no te upootiʻa i te reira : « No te mea te taata tino nei, o te enemi ïa o te Atua… e e enemi hoʻi a muri e a muri noa’tu ; areʻa ia auraro oia i te parau a te Varua Maitai, e ia faaruʻe i te mau peu a te taata tino nei, e ia riro ei taata mo‘a na roto i te taraehara a te Mesia ra te Fatu, e ia riro hoʻi mai te tamarii ra i te marû, e i te mamahu, e i te haehaa, e i te faaoromai, e i te î i te aroha, e ma te hinaaro ia auraro i te mau mea atoa ta te Fatu e hinaaro ia tuu i ni‘a ia’na, mai te tamarii e auraro hoʻi i to’na metua » (Mosia 3:19).
E aha te hoê mea ta outou e nehenehe e rave i teie mahana no te titau i te Taraehara o te Faaora no te faatae mai i te tauiraa i roto i to outou oraraa ?
Te rave‘a haaparareraa e te mau hoa
Te hoê vahi e ti‘a ia haamata, o te ma‘itiraa ïa i te mau hoho‘a mata‘ita‘i maitai, te pehe maitai e te buka maitai. A ma‘iti i te mau hoa e aparau atu outou i te parau mâ e e ha‘uti atu outou i te ha‘uti ti‘a. A rahi noa ai ta outou mau ohipa maitai e feruri atu, e ite rahi atoa mai outou e, e mea ohie ia faaore i te mau mana‘o iino, e e varavara atoa’tu te reira.
Amber S., 18 matahiti, British Columbia, Canada
Pure
Te haafatata nei te pure ia’u i to tatou Metua i te Ao ra ma te tauturu ia’u ia tutonu i ni‘a i te mau mana‘o maitai. Te haapuai nei te tuatapaparaa i te papa‘iraa mo‘a i te mau mahana atoa i to’u ti‘aturi i roto i te upootiʻaraa i te mau faahemaraa ; tei roto i te mau papa‘iraa e ite ai au i te mau hi‘oraa o te mau pĭpĭ haapa‘o a te Mesia. Ia horo‘a vau i to’u iteraa papû, e tauturu atoa te reira ia’u ia tape‘a i te mau mana‘o mâ.
Dasha M., 17 matahiti, Kiev, Ukraine
Maitai e aore râ tano ?
Eita ta outou e nehenehe e arai noa i te mau mana‘o e tae mai, e nehenehe râ ta outou e hi‘o atu eiaha te reira ia vai noa mai. E nehenehe ta outou e ui : E roaa anei te maitai i teie mana‘o ? E tauturu anei te reira ia’u ia haere i ni‘a i te aveiʻa tano ? Ia hiti noa mai te tahi mana‘o faahema, a himene i te hoê himene maitai, a feruri i te hoê ohipa au tei tupu e aore râ a pure. Ia monohia te mau mana‘o iino i te hoê mea maitai, tirara’tu ai.
Lisa P., 17 matahiti, Dânemâta
Papa‘iraa mo‘a
Te tuatapaparaa i te mau papa‘iraa mo‘a i te mau poʻipoʻi atoa na mua i te haapiiraa, e tauturu te reira. Ia hiti noa mai te hoê mana‘o ino, oioi roa vau i te mono i te reira e te hoê mea maitai a‘e. Eiaha e parau noa, « Aita, eiaha tera mana‘o » (e ohipa maitai ihoa ïa), e mono ra te reira i te hoê mana‘o maitai. A haamana‘o, no outou iho to outou feruriraa, e ere na Satane. E mau tamaiti itoito e e mau tamahine itoito tatou na te Metua i te Ao ra, e tei roto tatou i te hoê misioni no te haamaitairaa ia tatou.
Nick C., 16 matahiti, Arkansas, te mau Hau Amui no Marite
Te hi‘oraa o Lehi
I roto i te 1 Nephi 15:27, te parau nei Nephi i to’na nau taea‘e e, i roto i ta’na orama no te tumu raau no te ora, ua faaatihia Lehi i te viivii. Aita râ Lehi i haapa‘o i te reira viivii no te mea ua tamau « to’na mana‘o i ni‘a i te mau mea eê ». Ua tano atoa te reira no tatou i teie mahana. Mai te peu e hinaaro tatou ia î tatou i te parau-ti‘a, e pure ana‘e no te reira ma te tutonu i ni‘a i te mau mea parau-ti‘a, ei reira to tatou feruriraa e î roa ai i te parau-ti‘a e te viretu, e aita atura to te mau mana‘o havahava e mana no te vai noa mai.
Hattie W., 16 matahiti, Arizona, te mau Hau Amui no Marite
Te mau himene
E ti‘a i te mau himene ia tauturu ia tatou ia roaa te mau mana‘o mâ a‘e. E faateitei te pehe maitai i te varua. Ia ti‘a ana‘e ia‘u ia faaroo i te mau himene, e faateitei noa te reira ia’u i te hoê ao hau e te tiretiera. Te tauturu nei te reira ia’u ia haamana‘o i te here o te Metua i te Ao ra no tatou paatoa, e e mea ohie atura ia ape i te mau faahemaraa.
Amanda A., 18 matahiti, Amazonas, Beresiria
Te tuatapaparaa papa‘iraa mo‘a a te utuafare
Ia tae noa mai te mau mana‘o havahava i roto i te feruriraa, e tamata vau i te haamana‘o i te mau papa‘iraa mo‘a ta matou to’u utuafare i tai‘o i te poʻipoʻi. I te mau poʻipoʻi atoa, i te hora 6:00, e tai‘o amui to’u utuafare i te mau papa‘iraa mo‘a. I te poʻipoʻi roa, tera râ, e haamaitairaa te reira e te haapuai nei te reira ia’u i te roaraa o te mahana.
Elena W., 16 matahiti, Helevetia
Oro‘a mo‘a
Te parau nei te pure no te oro‘a mo‘a e, ia rave tatou i ni‘a ia tatou i te i‘oa o te Mesia, ma te haapa‘o i Ta’na mau faaueraa e ma te haamana‘o noa Ia’na, e vai noa To’na Varua i roto ia tatou. Na roto i te haamanaʻoraa Ia’na, te tautoo nei tatou no te turaʻi i rapae i te mau mana‘o o te tino ma te tutonu i ni‘a i te mau mana‘o mure ore. Mai te mea e, e haamana‘o noa tatou Ia’na, e taui to tatou mau mana‘o, to tatou mau hiaai e ta tatou hoʻi mau ohipa ei mea maitai a‘e.
McKay M., 18 matahiti, Utah, te mau Hau Amui no Marite