Ua faaroo vau i te mau tamarii

Hōho’a

illustration of child praying by his bed

Ua riro te faaturumaraa tino maʻi (dépression clinique) i te hoê mea ta’u i ore i hinaaro ia faaruru faahou. Areʻa râ, i muri mai e 12 matahiti aita teie maʻi, ua hoʻi faahou mai te reira.

Ua riʻariʻa roa vau e ua faahuehue te aau. Ua ani au i te Metua i te Ao ra e ua pure au ia roaa mai te puai no te faaruru i ta’u mau tamataraa. Ua taparu atoa vau Ia’na e, ia ore ta’u faaturumaraa ia haere roa i te pae matahiti, mai tei matamua ra.

E toru ta maua tamarii, e piti tamaroa e hoê tamahine, e ua haamaitai mai ratou ia maua na roto e 13 mootua. Ua ite ta’u tamahine i te hepohepo ta’u e faaruru ra, e no reira ua faanaho oia i te hoê mahana haapaeraa maa e mahana pure no te utuafare. Ua hinaaro pauroa te mau mootua, mai te faito matahiti 1 haere roa i te 10, ia pure no mamaʻu, e tera na mootua e toru tei bapetizohia, ua hinaaro atoa ïa ia haapae i te maa. E tamahanahanaraa rahi ia ite e, e pure e e haapae ta’u tane, ta’u mau tamarii e ta’u mau mootua i te maa no’u.

I te mahana no muri iho, ua taʻotooto rii au e i te araraa vau, aita te mana‘o faaturuma i puai roa. Te mahana no muri iho atu, ua mâmâ faahou atu. I te paeraa o te mahana, ua moʻe roa to’u faaturumaraa. I tera ra pô, te faahiahia ra vau i te huru o teie semeio, tae mai nei te hoê reo i roto i to’u varua te na ô ra, « Ua faaroo vau i te mau tamarii ». Ua faaroo te Metua i te Ao ra ia ratou i roto i to ratou vairaa hara ore e ua pahono mai i ta ratou mau pure haehaa, mau pure faaroo e mau pure no te here.

Ua haapii te Faaora :

« Ia ore outou e faahuru-ê-hia, e ia riro mai te tamarii-rii ra, e ore roa outou e ô i te basileia ra o te ao.

« E teie nei, o tei faahaehaa ia’na iho e mai teie nei tamaiti iti, oia te rahi i te basileia o te ao ra » (Mataio 18:3-4).

Ua papa‘i au i te rata i ta’u mau mootua no te haamauruuru ia ratou i te haapaeraa i te maa e i te pureraa no’u. Ua parau vau i to’u here rahi ia ratou. Ua parau vau ia ratou e, ua faaroo te Metua i te Ao ra ia ratou e ua pahono mai Oia i ta ratou mau pure.

A tupu noa ai ta’u mau mootua i roto i te evanelia, e mea maitai ia haamana‘o ratou i te taime ua parau mai te Metua i te Ao ra i to ratou tupuna vahine, « Ua faaroo vau i te mau tamarii ». E maitai atoa e, e haapuai teie ohipa i to ratou iteraa papû ma te tauturu ia ratou ia vai puai noa i roto i te evanelia.