Tuliki ʻo e Fehuʻí
Te u ʻilo fēfē ʻoku ou matuʻotuʻa feunga ke ʻaukaí?
ʻI he Sāpate ʻaukaí, ʻoku tau faʻa taʻekai mo taʻeinu ʻo feʻunga mo ha houa kai ʻe ua. ʻOku tau foaki foki ʻa e paʻanga ʻo e ongo houa kai ko iá ke tokoni ki he kakai ʻoku nau fie maʻu iá. ʻOku ui ia ko e “foaki ʻaukai.” Lolotonga ʻetau ʻaukaí, te tau lava ʻo manatu ki heʻetau ngaahi tāpuakí, lotua e niʻihi kehé, pea ongoʻi vāofi mo e Tamai Hēvaní. Te ke lava ʻo kamata hoʻo ʻaukaí ʻi he taimi ʻokú ke ongoʻi ai mo hoʻo ongomātuʻá ʻokú ke mateuteu feʻungá. Kapau ʻoku ʻikai te ke lava ʻo ʻaukai koeʻuhí ko haʻo faingataʻa fakaesino, te ke kei lava pē ʻo lotu pea ongoʻi e Laumālie Māʻoniʻoní kae ʻaukai ʻa e niʻihi kehé.
Naʻá ku ʻiloʻi ʻeku matuʻotuʻa feʻunga ke ʻaukaí ʻi he taimi naʻá ku ongoʻi ai ʻoku ou fie ʻaukaí, pea naʻe talamai ʻe he Laumālie Māʻoniʻoní ʻoku ou fai ʻa e meʻa totonú. ʻI he taimi naʻá ku kamata aí, naʻá ku fakahoko māmālie ia. Ne u tomuʻa ʻaukai ʻi ha houa kai pē ʻe taha. Hili iá naʻá ku toki feinga leva ʻi he houa kai ʻe uá.
Ane D., taʻu 9, Nevata, USA
Te ke lava ʻo lotu ki he Tamai Hēvaní ke ke ʻiloʻi ʻa e taimi totonu ke ke kamata ʻaukai aí. ʻOku ou ʻiloʻi ʻoku lava ʻe he Tamai Hēvaní ʻo tali hoʻo ngaahi lotú.
Liami P., taʻu 7, ʻIutā, USA
ʻOku lelei ke ʻaukai ʻi he taimi ʻokú ke fie tokoni ai ki he niʻihi kehé mo ongoʻi e Laumālié. Ko ha taimi lelei ia ke kamata ai hoʻo ʻaukaí ʻi he hili hoʻo papitaisó.
ʻEti O., taʻu 9, Kalefōnia, USA
Te u ʻiloʻi ʻeku matuʻotuʻa feʻungá koeʻuhí he te u maʻu ha ongo mei he Laumālie Māʻoniʻoní ʻokú ne talamai kiate au ko e taimi totonu ʻeni ke ʻaukai aí. Pea hili iá te u ʻeke leva ki heʻeku ongomātuʻá pe ʻoku tonu ʻa e ongo ko iá.
Pulukilini R., taʻu 7, ʻAokalani, Nuʻusila
ʻI he taimi te u papitaiso aí, ʻoku ou fakakaukau te u ongoʻi mateuteu leva ke ʻaukai. Te u lava ʻo lotu ki he Tamai Hēvaní ke Ne tokoni mai mo fehuʻi kiate Ia ʻa e taimi mo e founga ke u kamata aí.
Palaieni K., taʻu 7, Uāsingatoni, USA