ʻAukai maʻa ha Palōfita
ʻOku nofo e tokotaha naʻá ne faʻú ʻi Hauaiʻi, USA.
Naʻe ʻofa ʻa Silioti ʻia Palesiteni Kimipolo. Naʻá ne fakaʻamu ke ne moʻui lelei.
“Ke ke fafanga homau laumālié, fakafonu homau lotó, pea tāpuekina ʻemau ʻaukaí, ʻoku mau kole” (Hymns, no. 138).
ʻI he tuku ʻa e akó naʻe lue ʻa Silioti ki ʻapi ʻo fakalaka atu ʻi he ʻulu lesí mo e ʻulu mango momohó. ʻI heʻene sio ki he fuaʻi ʻakaú, naʻá ne manatuʻi ʻene fiekaiá. Naʻá ne toe manatuʻi foki ko ha ʻaho makehe ʻeni. Ko e ʻaho ní naʻe ʻaukai ai e tokotaha kotoa pē ʻi hono siteiki ʻi Tongá maʻá e palōfita ko Palesiteni Sipenisā W. Kimipoló. Naʻe puke ʻa e palōfitá pea naʻe fie maʻu ke tafa ia. ʻE fakataha ʻa e siteikí he poó ni ke lotu mo vete ʻenau ʻaukaí.
ʻI he taimi naʻe aʻu ai ʻa Silioti ki ʻapí, naʻá ne nāmuʻi ʻa e meʻakai naʻe taʻo ʻi he ʻumú. Naʻe lea hono keté heʻene fiekaiá. Naʻe fiefia ʻa Silioti ʻi heʻene matuʻotuʻa feʻunga ke ʻaukaí, ka naʻe faingataʻa ange e ʻaukai ʻi he ʻaho akó ʻi he ʻaukai he ʻaho Sāpaté.
Naʻe feinga ʻa Silioti ke fakangaloki ʻene fekaiá. Naʻá ne maʻu ha vaʻa fefie pea naʻá ne tafi e ʻū laʻiʻakau naʻe fakaveve ʻi he lalo mei lahi naʻá ne fakamalumalu e loto ʻataʻataá.
Naʻe fakakaukau ʻa Silioti ʻi heʻene fanofano hono nimá hili ʻene ngāué, “ʻE mahino pē ki he Tamai Hēvaní kapau te u inu ha kiʻi meʻi vai siʻisiʻi pē.” Ka naʻá ne fakakaukau ki heʻene ʻofa lahi ʻia Palesiteni Kimipoló. Naʻá ne fakaʻamu ke toe moʻui lelei pē ʻa e palōfitá. Naʻá ne fakakaukau leva ke ne toe tatali pē.
Naʻe tangutu hifo ʻa Silioti ʻi he fakafaletoló pea ʻolunga hono ʻulú ki he funga ʻo ʻene faʻeé. Naʻá ne fuʻu helaʻia ʻaupito.
Naʻe pehē ange he Fineʻeikí, “Te ke lava pē ʻo vete hoʻo ʻaukaí, ʻo ka ke ka fie fai ia.”
Naʻe pehē ange ʻe Silioti, “Ka ʻoku ou fie ʻaukai pē au. Te u lavaʻi pē ia ʻe au.”
ʻI he foki mai e Tangataʻeikí mei he ngāué, naʻe tokoni ʻa e fāmilí ki hono fuke e ʻumú. Naʻa nau hiko ʻa e lū puaká, iká mo e mei loloʻi naʻe taʻó. Hili iá naʻa nau ʻufiʻufiʻi leva e meʻakaí ʻaki e konga tupenu pea nau ō mo ia ʻo tali pasi he veʻehalá.
Naʻa nau fetaulaki mo e ngaahi fāmili kehe ʻi he halá, naʻa nau toʻo meʻakai mo kinautolu. Naʻa nau talanoa fiefia ʻi heʻenau heka ki he pasí. Naʻe tangutu ʻa Silioti ʻi he tafaʻaki ʻo e Fineʻeikí. ʻI he lele ʻa e pasí ʻi he hala tokakoví naʻá ne nāmuʻi e namu ifo ʻa e meʻakaí.
Naʻe aʻu ʻa e pasí ki he fale lotú kuo fakapoʻuli. ʻI he loto fale lotú, naʻe tūʻulutui fakataha ʻa Silioti mo hono fāmilí mo e kāingalotu tokolahi ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe lotu fakalongolongo pē ʻa Silioti ʻi hono lotó lolotonga e lotú, “Kātaki fakamoʻui ʻa Palesiteni Kimipolo ke ne toe moʻui lelei.” Naʻá ne ʻiloʻi naʻe lotua ʻe he tokotaha kotoa pē ʻa e meʻa tatau. Naʻá ne ongoʻi ha ongoʻi nonga ʻiate ia ʻe moʻui lelei pē ʻa Palesiteni Kimipolo.
ʻI he taimi naʻe ʻāʻā hake ai hono matá naʻá ne sio ʻoku tangi ʻa e niʻihi ʻi hono tafaʻakí. Naʻá ne ʻaukai fakataha mo e kakai kotoa ko ʻení. Naʻe faingataʻa ia, ka naʻá ne lavaʻi ia!