Mālohi ʻi he Uiké Kakato

ʻĪmisi

young woman taking the sacrament

Ko e pō Sāpate ʻeni. ʻA ia ko e Mōnite ʻapongipongi—hoko atu e ngāue fakaako mei ʻapí, ngāué, vaʻinga ʻakapulú, kalasi tā pianó, mo e alā meʻa pehē. ʻOku lahi moʻoni pē ʻa e meʻa ke fai he uike ní! Ka te ke lavaʻi pē ia ʻe koe. Te ke lava pē koe ʻo ʻosiki hoʻo lisi ngāue ki he uike ní.

Te ke fie ʻilo nai ki he foungá?

ʻOkú ke maʻu ha mālohi fakalaumālie ke ne tokoniʻi koe. ʻI he Sāpate kotoa pē, te ke lava ai ʻo maʻu ʻa e sākalamēnití mo fakafoʻou e ngaahi fuakava kuó ke fakahokó. ʻI hoʻo fai iá, ʻoku talaʻofa atu kapau te ke toʻo kiate koe ʻa e huafa ʻo Sīsū Kalaisí, manatuʻi Ia, mo tauhi ʻEne ngaahi fekaú, ʻe ʻiate koe maʻu ai pē ʻa Hono Laumālié (vakai, T&F 20:77, 79). ʻOku ʻuhinga ia te ke lava ʻo ongoʻi hono fakaivia fakalaumālie koé ʻo tatau ai pē pe ko e hā te ke fekuki mo ia ʻi he uike ní.

Naʻa mau kole ki ha toʻu tupu ʻe niʻihi ke vahevahe ʻenau ngaahi aʻusia ʻi he sākalamēnití mo e founga kuó ne fakamālohia kinautolu ʻi he uiké kakato ʻi heʻenau manatuʻi ke tauhi ʻenau ngaahi fuakavá. Vakaiʻi ha niʻihi ʻo ʻenau ngaahi talí. Mahalo pē kuó ke aʻusia ha meʻa tatau!

ʻOku tokoni ʻeku manatu maʻu pē ki he Fakamoʻuí ke u maʻu ha lototoʻa neongo e ngaahi faingataʻá. ʻI he vaeuaʻanga ʻo ʻeku taʻu fakaʻosi mei he ako māʻolungá, naʻe foki hoku fāmilí ki he ʻIunaiteti Siteití, ka naʻá ku nofo tokotaha pē ʻi ʻAositelēlia ke fakaʻosi ʻeku taʻu fakaakó. ʻI he hili haʻaku ʻaʻahi kiate kinautolu lolotonga e tutukú, naʻá ku foki ki ʻAositelēlia pea naʻá ku ongoʻi tuenoa moʻoni. Ka naʻe fakafokifā ʻeku ʻiloʻi naʻe ʻikai ke u tuenoa; ne ʻikai pea he ʻikai ʻaupito ke u teitei tuenoa he ʻe ʻiate au maʻu ai pē ʻa e Laumālie ʻo e Fakamoʻuí ʻi heʻeku feinga ke u muimui kiate Iá. He toki fiemālie māʻongoʻonga moʻoni ne u maʻu he momeniti pē ko iá.

Shannon S,. 19, Senē, ʻAositelēlia

ʻI heʻeku fanongo ki he lotu tāpuakiʻi ʻo e sākalamēnití, ʻoku ou manatuʻi kapau te u tauhi ʻeku fuakava ʻi he paptaisó, te u lava ʻo maʻu maʻu pē e Laumālié. ʻOku faingofua ange ʻa e uike ko iá ʻi heʻeku maʻu ʻa e Laumālié. Hangē ko ʻení, ʻoku tokolahi e tamaiki ʻi he akó ʻoku nau fakaʻaongaʻi e lea kapekapé mo e lea taʻetāú. ʻOku tokoni ʻeku manatuʻi ʻeku ngaahi fuakavá ke u tukunoaʻi e meʻa ʻoku ou fanongo ki aí pea tākiekina hoku ngaahi kaungāmeʻá ke taʻofi ʻenau lea taʻetāú

Jacob B., 14, Kololato, USA

Naʻe ʻi ai ha taʻahine ʻi he akó naʻá ne faingataʻaʻia fakaesino. Naʻe manukiʻi ia ʻe he niʻihi tokolahi koeʻuhí ko hono faingataʻaʻiá. Ko au pē mo hoku ngaahi kaungāmeʻá ne mau feinga ke tokoniʻi iá. Ko e taimi ʻe niʻihi naʻe hangē naʻe fehiʻa kotoa e kalasí kiate iá. Naʻe faingataʻa ke u ʻilo ʻa e meʻa ke faí. Ne u meimei loto-foʻi, ka naʻá ku fili ke u manatuʻi ko ha ʻofefine ia ʻo e ʻOtuá pea mo fakakaukau ki he founga ne mei fakahoko ʻe Sīsuú. Naʻá ku ongoʻi ʻa e mālohi ʻo e Laumālie Māʻoniʻoní ʻokú ne fakanonga au. Ne u manatuʻi te u lava ʻo fai ha lelei. Naʻe tokoni lahi ʻeku muimui ki he tā sīpinga ʻa e Fakamoʻuí, pea naʻá ku ʻiloʻi ʻe lelei ʻa e meʻa kotoa pē.

ʻOku talaʻofa mai ʻe he fuakava ʻi he papitaisó kapau te u ngāue hangē ko e Fakamoʻuí te u maʻu maʻu pē ʻa e Laumālie Māʻoniʻoní. ʻOku ou houngaʻia ke u maʻu ʻa e fakafiemālie mo e mālohi ko iá mei he Laumālie Māʻoniʻoní.

Alexis L., 13, Kenisesi, USA

ʻI heʻeku ʻiloʻi kuó u fuakava ke toʻo kiate au ʻa e huafa ʻo Kalaisí ʻoku ou ongoʻi ai ha fatongia ke u muimui kiate Ia, ka ʻoku ʻikai faʻa faingofua maʻu pē. ʻI ha ʻekitivitī fakakulupu naʻe fai naʻá ku sio ai ki ha leka naʻe ʻikai ha taha ke na feohi. Naʻá ku ongoʻi ʻoku totonu ke u ʻalu ʻo fakatalanoa kiate ia. Ka naʻe ʻikai ke u fie fai ia. ʻOku ʻikai ke u manako ke fakamaheni ki ha niʻihi foʻou. Ka ʻi heʻeku manatuʻi e meʻa ne mei fai ʻe Kalaisí, naʻá ku maʻu ai ha mālohi ke u fakakaumeʻa ki ha taha foʻou. ʻI heʻeku talanoa mo iá, naʻá ku ongoʻi e ueʻi ʻa e Laumālié ke u fai ange ha ngaahi fehuʻi pea fiefia.

Evan W., 16, ʻIutā, USA

Lolotonga e taimi sākalamēnití, ʻoku ou faʻa fakakaukau ki ha ngaahi meʻa kehe hangē ko e meʻa kuo pau ke fai ʻi he lolotonga e uiké, meʻa ʻi he akó, pe ko hoku ngaahi kaungāmeʻá. Ka ʻoku kamata mahino kiate au, fakafou ʻi he kalasi Lautohi Faka-Sāpaté mo e ngaahi pōpoaki ʻo ʻetau kau palōfitá, ʻa e ʻuhinga ʻo e sākalamēnití. ʻOku ou fakakaukau leva he taimí ni ki he Fakalelei ʻa Sīsū Kalaisí, naʻá Ne foaki ʻEne moʻuí maʻatautolu, huhuʻi ʻetau ngaahi angahalá, pea kātakiʻi ʻa e ngaahi faingataʻa kotoa pē. ʻOkú ne fakaʻaiʻai au ʻi he ʻaho kotoa pē ke u pehē, te u feinga ke u hangē pē ko Iá pea fakahā ʻa e ʻofa tatau naʻá Ne fakahā ki he niʻihi kehe. Te u lava ʻo vahevahe ʻa e ongoongoleleí ki he niʻihi kehé. Te u lava ʻo fai ha meʻa ke u taau ange ai ke hū ki he temipalé pea mo maʻu ʻa e sākalamēnití.

Alessandra B., 17, Sanitiako, Silei

Ko e sākalamēnití ko ha maʻuʻanga ivi fakalaumālie ia ki he lolotonga ʻo e uiké. ʻOkú ne fakamanatu kiate au ʻa e ngaahi fuakava kuó u fakahoko mo ʻeku Tamai Hēvaní pea ʻokú ne tataki au ʻi he lolotonga e uiké. ʻOkú ne langaki ke u fakakaukau ki he feilaulau ʻa Sīsū Kalaisi maʻatautolú, pea ʻokú ne teuteuʻi fakalaumālie au ki he uike hono hokó.

ʻI ha taimi ʻe taha naʻá ku ongoʻi mafasia ai mo loto-foʻi, ka ʻi heʻeku maʻu e sākalamēnití mo lau ʻa e himi sākalamēnití, naʻá ku fonu ʻi he Laumālié. Naʻá ku tokanga ki he Fakamoʻuí kae ngalo ʻiate au ʻeku mafasiá.

Brett B., 17, Kololato, USA

Ko ʻeku fakaʻuhinga ki hono toʻo kiate kita ʻa e huafa ʻo Sīsū Kalaisí ko ʻetau manatuʻi ʻe lava ke tau maʻu maʻu pē ʻa Hono Laumālié pea kuo pau ke tau fili ke fai ʻa ia ʻoku totonú. ʻI ha paati faiʻaho ʻe taha, naʻe inu ʻolokaholo ai hoku ngaahi kaungāmeʻá, naʻa nau fakaafe mai ke mau inu fakataha. Ne u talaange ʻikai. Naʻe haʻu leva hoku kaungāmeʻa Siasí ʻo talaange kiate kinautolu ʻoku ʻikai ke ma inu ʻolokaholo koeʻuhí ko ʻema tui fakalotú. ʻOku hanga ʻe he manatu ki he Fakamoʻuí ʻo tohoakiʻi mai e Laumālié mo taʻofi e ngaahi faingataʻá.

Mikaele C., 16, Palana, Palāsila

ʻI heʻeku maʻu ʻa e sākalamēnití ʻoku ou maʻu ai ha ongoʻi nonga mo ha fakakaukau ʻokú ne fakalotoʻi au te u lava ʻo ikunaʻi ha meʻa pē te u fehangahangai mo ia. ʻI Sune ʻo e taʻu kuo ʻosí, ne faingataʻaʻia lahi ai ʻeku moʻuí. Ne hiki ha taha ʻo hoku ngaahi kaumeʻa mamaé ki ha feituʻu ʻe taha, ne u fefaʻuhi mo e loto-mafasiá, pea ne u maʻu ha ngaahi fakakaukau ʻoku fuʻu tōtuʻa ki he fōtunga ʻo e sinó. Ne u maʻu e sākalamēnití ʻi ha Sāpate ʻe taha pea naʻe fakafokifā pē ʻeku ongoʻi ha nongá. Ne u ongoʻi fiefia moʻoni.

Olivia T., 14, Veisinia, USA