Toʻu Tupu
ʻI he Mālōlō Hoku Kaungāmeʻá
ʻOku nofo ʻa e tokotaha naʻá ne faʻú ʻi ʻIutā, USA.
Lolotonga hoku taʻu tolu ʻi he ako māʻolungá, naʻe puke ai hoku kaungāmeʻá ko e pā e foʻi ngungu hono ʻutó peá ne mālōlō he ʻaho hono hokó. Neongo ko ha mēmipa au ʻo e Siasí, ka naʻá ku kei faingataʻaʻia pē. Naʻe akonekina au ʻi he kotoa ʻo ʻeku moʻuí te u lava ʻo tafoki ki he Tamai Hēvaní mo e Fakamoʻuí ki ha faʻahinga meʻa pē te u fie maʻu, ka naʻe teʻeki ʻaupito ke u fefaʻuhi mo ha meʻa peheni kimuʻa.
Naʻe lau houa ʻeku tangí, ʻi he feinga ke maʻu ha meʻa—ha faʻahinga meʻa pē—ke ne fakanonga au. Naʻá ku fekumi he tohi himí he pō ko ia hili ʻene mālōloó. ʻI heʻeku huke ʻa e ngaahi pēsí, naʻá ku huke ai ki he “Afe Mai Kuo Poʻuli” (Ngaahi Himí, fika 86). Naʻe mahuʻingamālie kiate au ʻa e veesi tolú:
[Afe mai kuo poʻuli,
Kuo longonoa ʻa e pō
Ka ʻikai te ta feohi
Pe Maʻu ʻiate koe ʻeku māmá,
Ko e fakapoʻuli ē,
Ke te ʻi ʻapi pē.
ʻEiki e tokoni mai ke ta nofo pē;
He kuo poʻuli.]
Naʻá ku maʻu ha loto nonga moʻoni ʻi he veesi ko ʻení. Naʻá ku ʻiloʻi naʻe ʻikai ngata pē ʻi he lava ʻa e Fakamoʻuí ʻo feʻao mo au he pō ko iá, ka naʻá Ne ʻafioʻi moʻoni e meʻa naʻá ku ongoʻí. ʻOku ou ʻiloʻi naʻe ʻikai ngata pē ʻi he hanga ʻe he ʻofa naʻá ku ongoʻi ʻo fakafou ʻi he himí ʻo tokoniʻi au ʻi he pō ko iá, ka kuó ne tokoniʻi foki au ʻi he ngaahi faingataʻa kehe lahi kuó u kātekiná.