Naʻe ʻOmi ʻe he Kau ʻĀngeló ha Maama ki Hoku ʻApí

Naʻe fehuʻi mai kiate au ʻi ha pongipongi Sāpate ʻe taha pe te u saiʻia ke ʻaʻahi mai ha kau faiako fakaʻapi kiate au. Naʻá ku toki māvae pē mo hoku malí pea naʻá ku faifeinga ke kamata foʻou ʻeku moʻuí ʻi heʻeku hoko ko ha faʻē taautaha ki ha fānau iiki ʻe toko ua. Naʻá ku talaange ʻe hounga kiate au ha ʻaʻahi. ʻI he taimi ko iá, naʻá ku ongoʻi lotomamahi ʻaupito ʻi he meʻa naʻe hokó pea naʻá ku ongoʻi tuenoa ʻi hoku ngaahi faingataʻá.

ʻI he uike hono hokó, naʻe haʻu ha ongo tangata lelei ʻe toko ua ki hoku ʻapí. Lolotonga ʻena ʻaʻahí naʻá na ʻeke mai ʻa e ngaahi fehuʻi angamahení peá na vahevahe ha pōpoaki nounou ʻo e ongoongoleleí ki hoku fāmilí.

Hili iá naʻe fehuʻi mai leva ʻe he ongo tangata lelei ko ʻení, “Sisitā Neleita, ko e hā te ma lava ʻo fai ke tokoni atu ai kiate koe?”

Ne ʻikai ke u fuʻu fakakaukau ki ai, naʻá ku talaange ʻoku mate ʻa e ngaahi foʻi maama ʻi he sitepu ki he fungavaka uá. Naʻe ʻi ai pē ʻeku ngaahi foʻi maama ke fetongi ʻaki, ka naʻe ʻikai ke u lava ʻo aʻu ki ai, pea ʻoku ou manavasiʻi ʻi hono ngāue ʻaki ʻa e tuʻungá ʻi he sitepú. Naʻá ku toe talaange foki ʻoku ʻikai ha foʻi maama ia ʻe ulo ʻi he tafaʻaki ki muí.

Naʻe tuaiekemo ʻena tuʻu ki ʻolunga. Naʻe hū e toko taha ki tuʻa ki heʻene meʻalelé ʻo haʻu mo ha puha meʻangāue. Naʻe mei fute ʻe ono mo e konga (1.9m) hono māʻolungá, pea naʻe ʻikai ko ha palopalema ke ne kaka he sitepú ʻo fetongi e foʻi māmá. Lolotonga iá, naʻe ʻalu hono hoá ki mui peá ne fakatokangaʻi naʻe fehalaaki hono fakafehokotaki ʻo e uaeá. Naʻe ʻikai hano taimi kuó ne lava ʻo fakaleleiʻi ia.

Kuó u houngaʻia ʻaupito ʻi heʻeku kau faiako fakaʻapi ʻi he kuohilí koeʻuhí ko ʻenau fakahā ʻa e angaʻofá, ʻofá, mo e mateakí kae pehē ki he lēsoni fakaʻofoʻofa kuo nau akoʻi kiate aú. Ko ha ongo ʻāngelo moʻoni ʻeku ongo faiako fakaʻapí naʻe ʻikai ngata pē ʻi heʻena ʻomi ʻa e māmá ki homau ʻapí ka naʻá na ʻomi foki ʻa e nongá, ʻamanaki leleí, mo e malu ʻo e ongoongoleleí, ʻa ia ʻokú ne fakamaama ha faʻahinga fakapoʻuli pē.