Nona iLakolako ni Rawa-ka e Dua na Loya

Era soqoni vata mai na matavuvale kei na itokani, ni mai marautaka tiko o Mohini Pillai na kena tavoci na nona kabani ni lawa vou e Suva, Viti.

Ni oti na veiyabaki ni cakacaka kaukauwa, vuli kei na sokota yani na ibolebole dredre, sa mai vakavotukana na nona tatadra ni sa dolava oqo na nona kabani ni lawa.

A sucu o Mohini mai Etatoko, Ba, e dua na koro lailai ena Ra kei Viti Levu, e Viti.

Ni se qai yabaki dua ka gone duadua ki na ciwa na gone, a mate o tinana, ka sa qaravi koya mai o tamana kei na veivuke ni matavuvale. A mai takali o tamana ni a yabaki 18 tiko.

Ni oti mai na vuli ena sekandri, a laki vuli o Mohini ena Fiji Institute of Technology e Ba ka taura mai kina na nona diploma ena Vuli Sekeriteri.

A laki cakacaka vunivola sara ena dua na kabani ni lawa, ka kila mai kina vakacakacaka na lawa ni cakava tiko na nona ilesilesi o ya.

Ena vica na yabaki sa oti, ena veivakayaloqaqataki nei watina, a laki vuli sara ena Univesiti ni Ceva ni Pasifika me taura mai kina na nona Setivikiti ni Lawa ka tarava sara na Bachelor ni Law Degree.

Ena gauna osooso ka veibolei oqo ena koronivuli ni lawa, a vulica o Mohini me veidutaitaka vinaka nona veisiga kei na veimacawa ni marama vakawati ka tina.

Na qaravi ni vale, gauna ni kana kei na nodra vuli na gone rau a wasea vata kei watina na kena cakacaka.

Me vaka ni lewe ni lotu yalodina, e titobu ka qaqaco na nona vakabauta.

“Au sa vakararavi ga ena vakabauta … ni sega na noqu gauna ni vuli lesoni kei na gauna au sega ni kila vinaka kina na cakacaka ni vuli, au sa biuta ga vua na Turaga me na vukei au yani,” a kaya.

E dau raici watina o Mrs. Pillai me nona ivakaraitaki vinaka. “Na nona ivakasala kei na veivakayaloqaqataki e solia vei au na kaukauwa meu toso tiko ga ki liu niu sa dau via soro mai.”

Na nona itukutuku vei ira na itabagone, vakabibi vei ira na goneyalewa: “Sa rawa mo laki bula vinaka vakailavo ka dodonu ena veisiga ni mataka. E sega ni ka ni yabaki ni bula na vuli, ko na kila kina na veika e yaco tiko ena veisiga. Na vuli ena veivuke ena bula-rawati koya—ni oqo e dua vei ira na ivakavuvuli ni Lotu i Jisu Karisito ni Yalododonu Edaidai.”