Na basikete kei na Tavaya

Mai vei Chieko N. Okazaki

iVakatakilakila

Sister Okazaki

Na itaba kei Sister Okazaki ka solia vakailoloma na Laiberi ni Tukutuku Makawa ni Lotu; kei na veitaba tale eso mai na Getty Images

Me baleti Sister Okazaki

E a susu mai Hawaii, e Amerika o Chieko Nishimura Okazaki (1926–2011) ena matavuvale lotu Buda ka kawa mai Japani. A lewena na Lotu o koya ni yabaki 15.

Sa vakila ena gauna oya, o Sister Okazaki, na vereverea ni ituvaki ni veika baleta na nona itovo kei na ivakarau. Ena nodra lomaleqataka na veika era na nanuma me baleti rau ni oti na ravuravu ni mataivalu ni Japani e Pearl Harbor, Hawaii, e kumuna kece o Sister Okazaki kei tinana na veika kece e ivakananumi kei Japani vei rau. Ia, a qai raici koya ena iloilo ka qai vakasamataka, “Au se sega vakadua ni lako ki Japani. Au sega niu kai Japani e yaloqu. Ia, au sega ni rawa ni drotaka na kequ ituvaki dina. Na mataqu, na kulini yagoqu, kei na uluqu e kai Japani.”¹

Ia a sotava tu ga o Sister Okazaki na veivakaduiduitaki vakamatatamata ena nona bula taucoko. E tekivu veivakavulici o koya ni oti na ika II ni Valu Levu ni se kaukauwa sara tu ga na veicacati vei ira na kai Japani mai Amerika. E tolu na tini eratou sega ni vinakata me tiko ena nona kalasi o iratou na luvedra. Ia, a qai rawati iratou mai o Sister Okazaki.²

Ei matai ni marama me veiqaravi ena matabose raraba ni mataisoqosoqo e tolu ni marama: imatai na Goneyalewa, Lalai, qai Soqosoqo ni Veivukei.³

E tiki ni nona itukutuku ena koniferedi raraba ni Epereli 1996 me baleta na duavata ena duidui (e vakatautauvatataki na matanivola).

iVakatakilakila

baskets and bottles of fruit

Esa solia vei keda e levu na isolisoli na Kalou, levu na duidui, ia e bibi meda kila baleti keda ni—Luvena kece.

Na noda dui bolebole vakalewe ni Lotu sai koya meda vuli vata vakataki keda, me rawa ni da veilomani ka tubu vata.

Na ivakavuvuli ni kosipeli e sega ni rawa ni vakatanitaki. Era bibi sara, ia na waqana e kani digidigi. Meu wasea mada e dua na ivakaraitaki rawarawa me vakaraitaki kina na duidui mai na ivakavuvuli ni Lotu kei na iolo vakavanua. Oqo e dua na tavaya peach, ka vakarautaka e dua na dauqaravi vuvale e Utah, me vakania kina na nona vuvale ena gauna batabata. O ira na dauqaravi vuvale e Hawaii era sega ni dau tawaitavayataka na vuata. Era tomika mai na vuata me rauta e vica na siga ka qai tawa tu ena basikete me vakaoqo, me baleta na nodra vuvale. Na basikete oqo e tiko kina e dua na maqo, jaina, painapiu, kei na weleti … e tomika tu mai e dua na dauqaravi vuvale vaka-Polinisia me vakania nona vuvale ena gauna e vua kina ena loma ni yabaki.

Na basikete kei na tavaya e mataqali itawatawa duidui, ia na veika e tiko e loma e tautau vata: na vuata me baleta na vuvale. E donu beka na tavaya ka cala na basikete? E sega, e rau donu ruarua. Era itawatawa ni kakana e veiganiti kei na vanua kei na nodra gagadre na tamata ena vanua oya. Ka rau veiganiti talega ena veika e tawa e lomadrau, sai koya na vuata.

Qo, na cava na vuata? Vola o Paula, “Ia na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, kei na ivalavala malua” [Kalatia 5:22–23]. Ena mataveitacini marama ni Soqosoqo ni Veivukei, ena mataveitacini tagane ni kuoramu ni matabete, ena vakarokovi ni soqoni vata mai me vakaivotavota ena sakaramede, e vakaduavatataki keda na Yalo ena loloma, reki, kei na vakacegu, kevaka e Soqosoqo ni Veivukei mai Taipei se Toga, na kuoramu ni matabete mai Montana se Mexico, se yaco tiko na soqoni ni sakaramede e Viti se mai na Yatu Filipaina.

… Niu a kacivi kina Mataveiliutaki ni Soqosoqo ni Veivukei, e vakasalataki au o Peresitedi [Gordon B.] Hinckley: “O kauta tiko mai kei iko e dua na ivakarau matalia kina mataveiliutaki oqo. O na kilai ni o matataka na veiyalayala ni vanua ena taudaku kei Amerika kei Kenada. … Era na raica vei iko na kena matataki na nodra duavata mai kei na Lotu.” E solia vei au e dua na veivakalougatataki ni na sereki na wa ni yamequ niu vosa vei ira na tamata.⁴

… [Niu vosa ena veivanua tale eso,] au rawa niu vakila na Yalo ni laveta na noqu vosa ki yalodra, kau vakila na “vua ni Yalotabu” ni sa kauta lesu mai vei au na nodra loloma, reki kei na vakabauta. Au rawa niu vakila na Yalo ni sa vakaduavatataki keimami.

Kemuni na taciqu kei na ganequ, kevaka e nomu vuata na peach se na weleti, ka kevaka o kauta mai ena tavaya se basikete, keitou vakavinavinakataki kemuni ni o vakauta mai ena vakabauta. Tamai keimami mai Lomalagi, me keimami se duavata ga ka me keimami nomuni,⁵ au masuta oqo ena yacana tabu noda iVakabula, o Jisu Karisito, emeni.