Ena Nona bula taucoko, na iVakabula e lakova na iVakabula nai lakolako e vuqa—na Nona ilakolako mai Peceliema ki Ijipita ni se gone, na Nona ilakolako kina lekutu ni 40-na siga, Nona ilakolako kina vei koro lelevu, vei korokoro, kei na veivuvale me veivakavulici, veivakabulai, ka veivakalougatataki ena gauna ni Nona ilesilesi, kei na vuqa tale. Ia e dua na ilakolako e lakova duadua ga na iVakabula, e dua na ilakolako e rawa ni vosota duadua ga o Koya.
“Ena Sigatabu ni Siganimate eda dau marautaka kina na soqo waraki balavu duadua ka lagilagi ena itukutuku kei vuravura.
“Sai koya na siga ka veisautaka na veika kece sara.
“A veisau na noqu bula ena siga oya.
“A veisau na nomu bula.
“A veisau kece sara na nodra icavacava na luve ni Kalou.”
Peresitedi Dieter F. Uchtdorf, iKarua ni Daunivakasala ena Mataveiliutaki Taumada “Na iNuinui ena Rarama ni Kalou,” Liaona, Me 2015, 107.
Na Rarawa e sega ni Vakatauvatani rawa
iVakatakilakila
Jesus in Gethsemane
O My Father, mai vei Simon Dewey
“E sega ni rawa ni dua na tamata me vakasamataka rawa na bibi ni veika kece a vakayacora na Karisito ena vukuda mai Kecisemani.
“Eda kila ni a bunotaka na dra o Koya mai na yagona kecega ena Nona sa gunu mai na bilo ni cudru sa solia Vua na Tamana.
“Eda kila ni a vakararawataki o Koya, na yagona kei na yalona, me yacova ni sa sega ni rawa vua e dua me vosota rawa, vakavo ga me yacova na mate.
“Eda kila ena sala eso, eda sega ni raica rawa, ni Nona vakararawataki sa veiraurau kei na lewa dodonu me tau, mera vakabulai na tamata veivutuni mai na rarawa kei na itotogi ni ivalavala ca, ka rawa kina na loloma veivueti vei ira era vakabauta na Yacana tabu.
“Eda kila ni a davo vakatoboicu ena qele ni sa kovuti Koya na mosi kei na rarawa ni dua na icolacola tawamudu ka vakavuna kina me sautaninini me rawa ni kakua kina ni gunuva na bilo ni cudru.”
O Elder Bruce R. McConkie (1915–85) ena Kuoramu ni iApositolo Le Tinikarua, “Na Kaukauwa Veivakasavasavataki mai Kecisemani,” Ensign, Me 1985, 9.
Bulataki Yadua ni Vakavuvuli: E dina ni da na sega ni vakila tu, e sotava na iVakabula na veivakatagedegede ni mosi kece ena gauna ni Veisorovaki. E kila tu o Koya na mosi kece vakayago, mai na ramusu ni sui ki na mate mosimosi duadua. E vakila o Koya na butobuto kei na yaluma ni veileqa ni vakasama me vaka na lauqa ni vakasama, nuiqawaqawa, galili kei na rarawa. E vakila o Koya na mavoa vakayalo kece baleta ni a taura Vua vakataki Koya na ivalavala ca ni kawatamata.
E vakatavulica o Elder David A. Bednar ena Kuoramu ni Apositolo Le Tinikarua, “Ena gauna ni malumalumu ena rawa ni da tagi caka yani, ‘E sega ni dua e kila na cava e yaco tiko. Sega ni dua e kila vakavinaka.’ Ia na Luve ni Kalou e kila vinaka tu, ni sa vakila oti o Koya ka vosota oti na noda icolacola yadua” (“Colata na Nodrai Colacola ena Loloma,” Liaona, Me 2014, 90).
O Koya Duadua ga E Rawata
iVakatakilakila
carrying the cross
Procession to Calvary, mai vei Bernardo Cavallino, Chrysler Museum o Art
“Na Veika e Cakava o Koya e rawa ni cakava duadua ga o Koya e Cecere. Ni sa Luvena Duabau ga na Tamana ena yago, e taukena o Jisu na ituvaki vakalou. E tamata duadua ga o Koya e sucu ena vuravura vakayago oqo ka na rawa ni cakava na veika cecere ka bibi vakaoqo. Ni tamata tawacala duadua me bula ena vuravura oqo, e sega ni rawati Koya na mate vakayalo. Baleta na Nona itutu vakalou, e tu Vua na kaukauwa me vorata na mate vakayago. A cakava o Koya kivei keda na ka eda sega ni rawa ni cakava vakaikeda. E sereka o Koya na ivau batabata nei mate. E cakava o Koya me rawa ni noda na vakacegu cecere ni solisoli ni Yalo Tabu.”
Peresitedi James E. Faust (1920–2007), iKarua ni Daunivakasala ena Mataveiliutaki Taumada, “Na Veisorovaki: Na Noda iNuinui Cecere,” Liaona, Janu. 2002, 20.
Na Bulataki Yadua ni Vakavuvuli: Ena Nona Veisorovaki, e sereka na ivau ni mate na iVakabula ka vueti keda kece mai na noda ivalavala ca me rawata na tamata yadua na bula tawamudu. O Koya duadua e rawata na itavi voravora ka tawavakacavari rawa. Ni da sotava na bolebole dredre sara, eda rawa ni vakacegu tiko ni da kila ni rawa ni rawata na iVakabula na veika ena sega ni vakacavari rawa.
E Sega ni Vakasuka o Koya
iVakatakilakila
the burial
The Burial, mai vei Carl Heinrich Bloch
“Ena dua na delana ka vakatokai ko Kalivari, ni ra rai o ira na Nona imuri, a lauvako ki na dua na kauveilatai na Yagona sa mavoa tu. E sega na loloma ni sa vakalialiai ka vosa vakacacani ka vosa beci. …
“Sa sivi yani na veiauwa ni yaluma ka sa malumalumu sara na Nona bula. E voqa mai na Tebenigusuna mavoa na vosa, ‘Tamaqu au sa solia na yagoqu ki na ligamuni: ia ni sa vosa oti vakakoya sa qai ciba.’ …
“A rawa vua na iVakavuvuli me vuki lesu ni vakarau me mai cava kece. Ia a sega. A sotava kina na veika kecega me vakabula na veika kecega. A biu yani vakatotolo na yagona mate ena dua na ibulubulu qaravatu kerei.”
Peresitedi Thomas S. Monson (1927–2018), “Sa Tucake Tale ko Koya! Liaona, Me 2010, 89.
Bulataki Yadua na iVakavuvuli: E sotava o Koya na veivakararawa mosimosi, galili, kei na yaluma, ia e vosota ga na iVakabula ka vakaotia nai lakolako ni Nona bula vakayago ena yalololoma—ka kerei Tamana tu me vosoti ira era sa vakoti Koya. Baleta na Nona iVakaraitaki sa taucoko sara, ena rawa ni da sotava na noda veivakatovolei kei na dredre ena yalololoma, ka ena Nona loloma ena rawa ni da vosota me yacova na ivakataotioti.
Na iVakadinadina e Vuqa ni Nona Tucake Tale
iVakatakilakila
Mary at the tomb
Woman, Why Weepest Thou? mai vei Mark R. Pugh
“Me yacova na gauna oya, au vakabauta na vuqa na ivakadinadina ni Tucaketale ni iVakabula ka sa kune ena Veiyalayalati Vou na veika era sotakaya kei na ivakadinadina—o Pita kei ira na nona itokani ni Tinikarua kei na lomani, ka savasava o Meri na marama ni Makitala, mai vei ira tale eso. Au vakabauta na ivakadinadina ka ra kune ena iVola i Momani—baleti Nifai na iApositolo vata kei na levu ni tamata tawa cavuti ena vanua o Vanuasautu, mai vei ira tale eso. Ka’u sa vakabauta na ivakadinadina i Josefa Simici kei Sidney Rigdon ka, ni oti e vuqa tale na ivakadinadina, a vakadeitaka na ivakadinadina levu ena iotioti ni itabagauna oqo raica ‘sa bula dina tiko ko Koya! Keirau a raici Koya vakaidina.’ Ena ruku ni wanono ni Matana ka sa raica na veika kecega, au duri me dua na ivakadinadina ni o Jisu na kai Nasereci sa noda Dauveivueti ka a tucake tale, ka’u vakadinadinataka na veika taucoko a salamuria na Nona Tucaketale vakairogorogo. Mo ni ciqoma na dina kece kei na logaloga vinaka ni vakadinadina vata oqori.”
Elder D. Todd Christofferson ena Kuoramu ni iApositolo Le Tinikarua, “Becoming a Witness of Christ,” Liaona, Me 2014, 114.
Na Bulataki Yadua ni Vakavuvuli: E dina ni da sega ni tiko maliwai ira era raica na yago tucake tale ka taucoko na Dauveivueti, ena rawa tikoga ni da tu me Nona ivakadinadina nikua. Ena rawa tikoga ni da vakanamata tiko Vua ena noda bula, ena vanua cava ga se gauna eda tiko kina. Ena veigauna eda solia na yaloda kei na ligada meda veiqaravi vei ira na tani; ni vakaraitaki na yalovinaka, yalololoma, kei na vakarokoroko vei ira kece; tutaka na dina; ka wasea na noda ivakadinadina ni kosipeli, eda sa tu meda vakadinadina i Jisu Karisito.
E Sega ni Dodonu meda Taubale Duadua
iVakatakilakila
Christ walking along the shores
Matailalai mai na Walk with Me, mai vei Greg Olsen, e sega ni rawa ni lavetaki
E dua na ka cecere e vakacegui keda ena gauna ni Siganimate oqo sa ikoya nona taubale o Jisu vakabalavu, galili na sala ni lako duadua voli, ka sega ni dodonu me da sotava talega. Na Nona ilakolako duadua e kauta mai vei keda na veitokani totoka ena ituvaki lalai ni noda sala—na veikaroni ni yalololoma na Tamada Vakalomalagi, na veitokani sega ni vakadrukai rawa ni Luvena Daulomani, na isolisoli cecere ni Yalo Tabu, agilosi e lomalagi, na lewe ni vuvale ena yasa ruarua ni lati, parofita kei na iapositolo, qasenivuli, veiliutaki, itokani. Na veika kece oqo kei na levu tale esa soli yani me itokani ena noda ilakolako ni bula oqo baleta na Veisorovaki i Jisu Karisito kei na Vakalesuimai ni Nona kosipeli. Rogovaki mai na veidelana e Kalivari na dina ni da na sega vakadua ni biu taudua tu ka sega ni vukei, kevaka madaga ena so na gauna eda vakila ni e vakakina. …
“… Me da qai tiko ena yasai Jisu Karisito ‘ena veigauna kece kei na veika kecega, kei na veivanua kecega [eda] tiko kina, me yacova na mate,’ ni sa vakaidina sara ni o Koya ena tikoga e yasada ni sa yaco sara yani ena mate kei na gauna talega e tutaudua saraga ga kina o Koya ena galilili.”
Elder Jeffrey R. Holland ena Kuoramu ni iApositolo Le Tinikarua, “E Sega Ka Tiko kei Koya,” Liaona, Me 2009, 88.
Bulataki Yadua ni Vakavuvuli: Ena Siganimate oqo, vakananuma na iotioti ni Nona ilakolako, na iVakabula. E solibulataka o Koya na veika kece e tiko vei Koya me rawa kina vei iko kei ira kece na tamata e vuravura me ra savai ka rawata na bula tawamudu. Vuli mai na Nona ivakaraitaki e taucoko. Maroroi Koya ena nomu vakanananu kei na lomamu. Sa dodonu meda nanuma dei tiko ni da sa sega ni tu duadua. Baleta ni a vosota rawa o Koya na iotioti ni Nona ilakolako ena taucoko ni galili, ena sega vakadua ni biuti iko tu o Koya. Na Nona loloma vei iko e tawamudu ka sega ni veiveisau, ka tu o Koya me solia vei iko na vakacegu, yalovinaka, kei na inuinui ena nomu tomana tiko na nomu ilakolako. Nona isolisoli ni Veisorovaki e ka tawamudu, ka sa soli tu vei iko.