Masumasu: NA iDola kina iVakadinadina kei na Veivakalesui mai

E sucu o Josefa Simici ena 23 ni Tiseba, 1805, e Sharon, Vermont, Amerika. E lako mai ki na dua na vuvale e daumasumasu ka vulica na iVolatabu. Ena gauna ni nona tabagone, e taleitaka vakalevu o koya baleta na lotu ka qai kunea ni “veileyaki levu” e yaco tu ena ivuna i Karisito, ni ra “sa veiqati vakataki ira nai talatala kei ira na saumaki mai” (Josefa Simici—Ai Tukutuku 1:6).

Na veilecayaki oqo … e tekivu mai na veigauna e liu ena ka sa vakatokai me Vukitani Levu. Ena sega ni “yaco” mai na siga oya, e kaya na iApositolo o Paula, “ni na yaco mada e liu na vuki tani” (2 Cesolonaika 2:3).

Ni oti e vica vata na yabaki mai na Tucake tale i Karisito, era vakamatei na Nona iApositolo, era sega ni taucoko tu na Nona ivakavuvuli, ka sa kau tani mai vuravura na nona matabete. Ia, o Paula, ni raica tu na noda gauna, e parofisaitaka ni “sa oti kecega na gauna me sa lokuci me soqona vata na ka kecega vei Karisito” (Efeso 1:10). Ena vakalesuya vakadua tale mai na Lotu dina i Karisito ki vuravura. …

Ena yabaki 14, e kunei koya o Josefa ena “ivalu vosa kei na sosa ni vakasama.” E dau tarogi koya wasoma, “Kevaka e dua vei ira [na matalotu oqo] e dina, ia ko cei, kau na kila beka vakacava? (Josefa Simici—Ai Tukutuku 1:10).

E vakasaqara o Josefa na isaunitaro ena iVola Tabu. “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua” (Jemesa 1:5).

iVakatakilakila

joseph praying

iVakaraitaki mai Na Gagadre ni Yaloqu II, mai vei Walter Rane.

Ni vakamuria tu na ivakaro i Jemesa, e lako o Josefa kina dua na veikau volekata nona vale ka masu. Ni kaci yani vua na Kalou, “au sa raica kina e dua na duru bukawaqa,” e sivia sara na rarama ni matanisiga, sa lako sobu tiko mai, “au sa raica e rua na Tamata”. “A sa kacivi au [Josefa] e dua vei rau, dusi koya na kena ikarua ka kaya—Oqo na Noqu Gone ni Toko. Mo Rogoci Koya!” (Ai Tukutuku—i Josefa Simici 1:16–17).

E a rairai kivua na Kalou na Tamada kei na Luvena, o Jisu Karisito, ka veitalanoa kei Josefa. Erau sauma na nona taro. Erau vakavulici koya ni sa yali mai vuravura na Lotu dina i Karisito. E vulica o Josefa ni ratou tolu na tamata duidui kece tu na lewe ni LeweTolu Vakalou, Eratou kilai koya ena yacana, ka ratou sa lomasoli me ratou sauma na nona masu. Esa tadola mai ko lomalagi, sa oti na bogi ni vuki tani, ka sa tekivu me cila yani na rarama ni kosipeli.

Me vakataki Josefa, e vuqa vei keda eda kunea ni da vakasaqara tiko na rarama ni dina. … Me vakataki Josefa, e dodonu meda vakasaqara na ivolanikalou, masu, … yalomalua [tiko], ka [vulica] me vakayagataka na vakabauta.

Ena loma ni tolu na yabaki ni tarava mai na Matai ni Raivotu, [e tukuna o Josefa ni vuqa na gauna e dau yalolailai baleta na nona malumalumu kei na itovo tawakilikili]. Ia, e sega ni yalolailai kina se guilecava na kaukauwa ni masu.

Ena ika 21 ni Sepiteba, 1823, ena yabaki 17, e tekiduru o [Josefa] ka kerea “meu vosoti ena noqu ivalavala ca” … ka [meu kila] “na vanua au tu kina e matana [Kalou]” (raica na Josefa Simici—Ai Tukutuku 1:29). Ni sa masu, esa basika mai na rarama, ka rarama cake tikoga “yacova ni sa uasivia na rarama ena sigalevu tutu” (tikina 30). Ena rarama oya e tucake tu e dua ka vakaisulu tu ena icurucuru balavu “e uasivi na vulavula ni veika vulavula kecega” (tikina 31). E kacivi Josefa ena yacana ka qai macalataka ni o koya o Moronai. E tukuna o koya “ni sa digitaki au na Kalou meu qarava e dua na cakacaka” ka qai tukuna vua me baleta e dua nai tukutuku makawa “ka volai ena peleti koula,” ni sa vakadewataki e yaco me iVola i Momani. Na ivola oqo e volaitukutukutaka tu na taucoko ni kosipeli. (raica na tikina 33–34.) … E dusimaki yani o Josefa kina vanua e buluti tu kina … na vola itukutuku oqori, … [ena dua na] Delana … o Kumora.

Ena siga e tarava e kunea o Josefa na peleti, ia e se bera ni gauna me taura mai kina. E dusimaki Josefa o Moronai me sotavi koya ena siga oya ena yabaki ka tarava ena va na yabaki veitaravi mai oya (raica na tikina e 52–53). A vakamuria o Josefa. Ena veiyabaki e lako yani o Moronai ki na delana oya ka “vakasalataki” koya o Moronai (tikina 54) me baleta na Vakalesui mai ni Lotu i Karisito. …

E ciqoma o Josefa na peleti ena 22 ni Sepiteba, 1827, ni yabaki 21. E ciqoma talega o koya na yaya ni cakacaka makawa ni vakavakadewa, ka vakatokai me Urimi kei na Cumimi. Ni vakayagataki na ivakavakadewa tabu oqo, kei na Yalo Tabu, esa tekivuna o Josefa na cakacaka ni vakavakadewa. …

Ena yabaki 23, e a vakadewataka tiko o Josefa na peleti ni rau wilika mai e dua na itukutuku kei [daunivolavola, Oliva [Kauderi] me baleta na papitaiso me bokoci na ivalavala ca. … Erau via kila vakalevu cake. E kila o Josefa na veika me cakava.

Ena 15 ni Me, 1829 e rau lako yani ki veikau o [Josefa kei Oliva] me vakatataro vua na Turaga. Ni rau masu tiko, e basika mai o Joni na Dauveipapitaisotaki ena “o lumilumisa” (Josefa Simici—Ai Tukutuku 1:68). E a papitaisotaka o koya na iVakabula ena bula oqo, [ka] taura tale tikoga o koya na idola vakamatabete e gadrevi me vakayacori kina na cakacaka vakalotu mai na ilesilesi ni Kalou.

… e vakotora o Joni na ligana ena [uludrau o Josefa kei Oliva] ka solia vei rau na Matabete Vaka Eroni (raica na V&V 13; Josefa Simici—Ai Tukutuku 1:68–69). … Ena mua ni vula o Me se na tekivu ni June ena 1829, e soli vei Josefa kei Oiva na Matabete i Melekiseteki, se mataabete cecere, mai vei iratou na iApositolo o Pita, Jemesa kei Joni.

iVakatakilakila

conferring the Aaronic Priesthood

Vakalesui tale mai ni Matabete i Melikiseteki, mai vei Walter Rane.

E vakacavari talega ena June oya na vakadewa ni Vola i Momani, ka qai tabaki ena 26 ni Maji, 1830. … Ena vica na siga ka tarava, ena ika 6 ni Epereli, e tauyavutaki na Lotu. … Me vaka ga e parofisaitaka o Paula, na Lotu makawa i Karisito esa tauyavutaki tale e vuravura.

Ia, e sega ni cava e keri na cakacaka ni Veivakalesui mai. … [Na Valetabu e Kirthland, na imatai ni valetabu me tara ena tabagauna oqo,] e a vakatabui … ena 27 ni Maji, 1836. Ni oti e dua na macawa, ena ika 3 ni Epereli, e yaco ekea e dua na bose. Ni oti e dua na masu gumatua vakanomodi, … e [basika mai vei Josefa kei Oliva] na Turaga o Jisu Karisito. … E basika talega mai o Mosese, Ilaisa, kei Ilaija [ena Valetabu e Kirthland] ka solia [na idola ni matabete] vei Josefa (raica na V&V 110).

iVakatakilakila

in the Kirtland Temple

Matailalai mai na E Basika mai o Jisu Karisito vua na Parofita o Josefa Simici kei Oliva Kaudari, mai vei Walter Rane

Kemuni na taciqu kei na ganequ, e rawa beka ni da raica eke e dua na iwalewale? Na veika kece e yaco ena Veivakalesui mai—na iMatai ni Raivotu, na rairai mai nei Moronai kei na tadu mai ni Vola i Momani, na vakalesui mai ni matabete, kei na rairai mai i Jisu Karisito [ena] Nona valetabu—e yaco mai ni oti na masu. …

[Ena vuqa na gauna] au sa vakila na ivakadinadina sega ni cakitaki rawa ni Yalo ni Kalou, me vaka na buka sa kama tiko e yaloqu, ni sa dina na kosipeli sa vakalesui mai. … [Kevaka o sega ni se kila na veika oqo vakataki iko,] meu vakatura mada mo ciqoma na veisureti e cakava o Moronai ena iVola i Momani: “Ia, ni dou sa wilika na itukutuku oqo, mo dou kerea vua na Kalou na Tamada Tawamudu ena yaca i Karisito, me vakatakila vei kemudou se dina se sega, ia kevaka dou sa kerea ena yalodina ena lomamudou taucoko, ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina. “Ia ena kaukauwa ni Yalo Tabu dou na kila kina na dina ni veika kecega” (Moronai 10:4–5). …

… Vakamuria na ivakaraitaki i Josefa Simici kei na iwalewale ni Veivakalesui mai. Gole ki na ivolanikalou. Tekiduru ena masumasu. Kerekere ena Vakabauta. Vakarogoca na Yalo Tabu. … Ena yaca i Jisu Karisito, au sa yalataka, “Kevaka dou na … kerei au ena vakabauta, ka nuitaka ni dou na ciqoma, ka gumatua ni maroroya na ivakaro [ni Turaga], ena vakatakilai vakaidina vei kemudou na veika oqo” (1 Nifai 15:11).