Ena Mataka ni Sigatabu Rarama Oya

iVakatakilakila

Mary Magdalene at the tomb

Eda kila tu na cava na Tucake tale—na vakaduavatataki ni yalo kei na yago ena kena ituvaki taucoko. …

Ena rawa beka ni o vakasamataka oya? Na bula ena noda ituvaki bulabula? E sega ni tauvimate, sega na mosi, sega ni vakacolati tu ena tauvimate ka dau vakayalolailaitaki keda wasoma ena bula oqo?

Na Tucake tale esa tiko ena uto ni noda vakabauta Vakarisito. …

… Ena gauna sa tucake mai kina na iVakabula ena ibulubulu, … e cakava o Koya e dua na ka e sega ni rawata tale e dua. E voroka o Koya na ivau ni mate, e sega walega ni baleti Koya ia e baleti keda kece eda sa bau bula—na vinaka kei na ca. …

… E vakarautaka o Koya na isolisoli oqo me baleti keda kece. Ena ivakarau cecere duadua, e vakamalumalumutaka o Koya yaluma veirawai ka kakana e yalodra o ira era sa vakayalia na nodra daulomani.

Au vakasamataka na butobuto ni Vakaraubuka oya ni sa laveti cake o Karisito ena kauveilatai. …

… E yavavala na vuravura ka tubu na butobuto. …

Era marau o ira na tamata ivalavala ca era vakamatei Koya. …

Ena siga oya e sei rua na ilati ni valetabu.

Erau ologi ena yaluma o Meri Makitala kei Meri na tinai Jisu. … Na turaga cecere erau lomana ka rokova esa lili matemate tu ena kauveilatai. …

… Eratou sa rere na iApositolo. Na nodra iVakabula o Jisu—na tamata ka taubale e delani wai ka vakabula na mate—sa mai tu oqo ena nodra lewa na tamata valavala ca. …

E dua na siga Vakaraubuka ka vakasinaiti ena yaluma kei na rere. …

Au kila ena veisiga kece me tekivu mai nai vakatekivu kei vuravura, na siga Vakaraubuka oya e siga butobuto duadua.

[Ia] e sega ni dede na kena tu baleta ena Sigatabu, esa basuraka na ivau ni mate na Turaga. E sa lako cake mai ena i bulubulu ka qai basika mai ena qaqa kei na lagilagi na iVakabula ni tamata kecega.

Ena gauna totolo sara na mata ka tagi tu e sa mamaca. Na tebenigusu ka vakasolokakanataka na masu ni yaluma kei na rarawa esa vakasinaiti tu ena vakamuduo, vei Jisu Karisito, na Luve ni Kalou bula, ka tu e matadra ni sai … vakadinadina ni mate e tekitekivu ni dua na vuravura vou ka totoka.

Ena tiko na noda siga Vakaraubuka yadua—na veisiga oya ena vaka me kakaseresere tu kei na veitikina gagata e kabuacara tu e matada ni veika eda sotava tiko ena vuravura oqo. …

Ia, au vakadinadinataka vei iko ena yacai Koya sa qaqa mai na mate—ni na yaco mai na Sigatabu. Ena butobuto ni noda rarawa kei na yaluma, ena yaco mai na Sigatabu.

… Mani vakacava sara tu na nodra rarawa kei na yaluma ena yaco mai na Sigatabu. Ena bula oqo se na bula sa bera mai, ena yaco mai na Sigatabu.

Au vakadinadinataka vei kemuni ni Tucake tale mai na mate e sega ni dua na italanoa ni gonelalai. Esa tiko vei keda na nodra ivakadinadina yadua ko ira era a raici Koya. E udolu vakaudolu ena Vuravura Vou kei na Vuravura Makawa era vakadinadinataka na iVakabula sa vakaturi mai na mate. Era vakila na we ni mavoa ena Ligana, yavana kei na sarisarina. …

Ni oti na Tucake tale, era sa vakavoui na tisaipeli. Era veilakoyaki tu ena veiyasai vuravura … ka ra kacivaka tiko ni sai Jisu Karisito, na Luveni Kalou bula.

E vuqa vei ira … era vakamatei ena vuku ni lotu, na ivakadinadina ni Karisito sa vakaturi mai na mate e tebe ni gusudra ni ra sa mate.

E veisautaka na Tucake tale mai na mate na nodra bula o ira era vakadinadinataka. Kevaka e sega ni veisautaka na noda?

Eda na vakaturi kece mai nai bulubulu. …

Baleta na bula kei na solibula tawamudu ni Vakabula ni vuravura, eda na vakaduavatataki kei ira eda dau vakamareqeta.

… Ena siga oya eda na rekitaka na nona lako sivia na Mesaia na veika kece oqori me rawa ni da bula tawamudu.

Baleta na cakacaka vakalotu tabu eda ciqoma ena valetabu, na noda biuta na bula oqo ena gauna lekaleka walega, ka ni noda veibiu sa vesuki kaukauwa tu ena ivau esa vesuki tawamudu.

E noqu ivakadinadina tabu ni sega ni cavacava ni bula na mate. …

Meda qai kila vinaka ka bula ena vakavinavinaka baleta na isolisoli cecere esa lako mai vei keda na luvena yalewa kei na tagane na Tamada Vakalomalagi kei na yalayala ni siga rarama totoka oya ni da na tucake tale ena qaqa mai nai bulubulu.

… Mani vakacava sara tu na butobuto ni noda Vakaraubuka, ena yaco mai na Sigatabu.