“Kevaka au sa vakila niu sa vakayalia na noqu vakabauta, na cava meu cakava meu rawata tale mai kina?”

Kevaka au sa sotava tiko e dua na gauna dredre meu vakila na Yalo, ena vukei au kevaka au raica na ivolanikalou ka raica na nodra vakabauta e tiko vei ira na tukuni tiko kina. E solia vei au na vakabauta. Esa lekaleka beka na nomu masu. Tovolea mo vakayacora ena yalodina ka na vukei iko na Tamada Vakalomalagi mo rawata na nomu vakabauta.

Au kila ni rawa niu masu vei Tamada ka kere Vua me vukei au meu vakabulabulataka tiko na itei ni vakabauta au sa vakatubura tiko. E gadrevi meu cakava na veika me vakabulabulataka tiko, me vaka na wili ivolanikalou, vakasaqara na veika sotavi vakayalo, wilika noqu kalougata, ka kerea na veivuke mai na noqu vuvale. Ena sala oya, ena rawa ni tubu tale na noqu vakabauta. Ena sega ni yaco ena loma ni dua na siga ki na kena e tarava—oqo e dua na iwalewale e taura na gauna. Sa gadrevi meu na dau vosota vakadede ka nuitaka na Turaga.

Ena gauna au vakila kina ni sa lailai noqu vakabauta, au veitalanoa keirau na tamaqu kei na tinaqu, ka keitou rawa ni dau walia vata na ka. Ena so na gauna keitou lagata na sere e veilaveti me rawa ni keitou vakila na Yalo.

Me ikuri ni masu vua na Tamada Vakalomalagi, e rawa ni da kerei ira na noda itubutubu me rawa ni da lesu Vua ka rawata tale mai na noda vakabauta.

Me vaka niu tamata sa malumalumu na vakabauta, e tolu na ka e tiko meu rawata tale. iMatai, au masu. Au masuta meu vakaqaqacotaki meu kila kevaka esa cakacaka vinaka na veika au vakayacora. iKarua, au tukuna vei ira na itokani voleka, ka ra qai vukei au vakalevu ena gauna au gadreva kina. iKatolu, au wilika na ivolanikalou. E vuqa vei ira era semati kina vakabauta ka vukei keda meda rawata tale.