Na Marau: E Levu Cake mai na dua ga na Draki ni Bula

Ena kena rawarawa duadua, na marau sai koya na kena laveti cake nai vakatagedegede ni vakasama kina dua na ivakatagedegede cecere mai na kena ituvaki e toka kina na veika o vakila tiko ena levu na gauna.¹ E dau tale na kena tukutukuni ni, noda vakila na veika vinaka.

E levu na sala e rawa nida yacova yani na veika e vakilai e cecere—noda veiwali kei na dua na itokani, qitora e dua na qito lasa, se kena laukana e dua na tiki ni keke jisi—ia, e sega ni dau dede. Sa tinitini eda dau veiladeyaki mai na dua na vuna ki na kena kadua ena vaqarai ni lasa ni da saga meda vesuka rawa tale na veika e vakilai cecere oqori. Ia, e sega beka ni dua na marau e dau tu vakabalavu?

Io—e dau vakamalua mai, sai koya oya eda dau calata kina na kena maka. E tukuna vei keda o vuravura ni dua na bula sa vakavotukana e vakasinaiti kina na veika e marautaki, ni nomu veisiga e dodonu me dua na vodo vakarise uto ka rawarawa, na gaunisala e vakatawani tu ena marau. Ia na kena dina, e sega ni o gadreva na veilasamaki wasoma me rawa ni o bula tiko kina “ena ivalavala ni bula marau” (2 Nifai 5:27). Na marau tawayalani—eda vakatoka beka me marau dina —e dua na ka e yaco malua, e dua na ivakarau e tudei ka sega walega ni dua na ka e vakilai ni marau levu ka laurai e matana votu. Na marau kei na lasa ena seyavu yani, ia, na marau dina e sega ni dua na ka eda vakila wale tu ga—e balavu sara na kena tu. Na vakilai ni lasa kevaka e laveta cake na ivakatagedegede ni veika o vakila, ia na kena rawatai ni marau dina e vaka na kena laveti cake vakataki koya na ivakatagedegede.²

O na nanuma beka ni marau tawayavalati e gadrevi kina na sautu tawayavalati kei na galala mai na mosi kei na veivakatovolei. Ia, na vakadidike e vakaraitaka ni veituvaki vinaka e sega ni vakadeitaka na marau, ka sega ni vakacacana talega na veituvaki sega ni vinaka. Ia, mai na veika kece e vakayarayarataka na nomu marau, na nomu veidigidigi e tiko kina eso na veivakayarayarataki kaukauwa.³ E vakatavulica, o Elder Ulisses Soares ena Mataveiliutaki ni Vitusagavulu na, “E kune ni marau ena vakavotukanataki mai na itovo matau, ivakarau tudei, kei na iwalewale ni vakasama eda rawa ni veivosaki kina ni da vakayacora ena lomada dina.” Na marau e levu cake mai na dua na gauna vinaka se na bula se tu na kena leqa—e dua na ivakarau ni vakasama kei na bulataki ni bula eda rawa ni lewa. Na veika eda vakila raraba e vakayarayarataki mai na veituvaki ni tuvatuva ni noda dra kei na noda susugi caki mai, ia na noda digidigi yadua e tiki bibi ni tavi oqo. Me vakalekalekataki, “na marau e dua na idigidigi ena rawa ni da cakava.”⁴

Sa na rawa vakacava meda “digia” meda marau? Na cava na isaluwaki vunitaki ni na noda keke jisi ni marau? Me vaka e vakamacalataka o Elder Soares, na marau dina e gadrevi kina na “e dua na veitokoni balavu sara ni veisasaga ni dua na ka e cecere cake ka bibi cake ena bula.” Me tautauvata ga, e dua na vuniwai ni vakasama kilai levu ka bula mai ena Holocaust, e vakatura ni marau e “dua na irevurevu ni nona gumatua ka yalodina dua na tamata kina sasaga e levu cake mai vua e dua ga.”⁵

Ena vakacava na kena cecere na sasaga oqo mai na kena e tuva tu vei keda na Kalou? Ni vakasaqarai na marau, e sega ni dodonu meda rai sivita na ituvatuva ni Tamada Vakalomalagi. E yacana dina ga na “ituvatuva ni marau” e dua na kena ibalebale! (Alama 42:8, 16). Na ivolanikalou kece e vakadinadinataka na ituvatuva ni Kalou e kauta mai na marau (raica na 2 Nifai 2:13; Ilamani 13:38). E dina ga ni na sega ni vakabulai keda na bula dodonu ena sega ni vakuwai keda mai na mosi ni yalo, ena biuti keda donu na vanua meda rawa ni vakila kina na marau ena bula oqo, ena veimuataki kina na bula vakacerecerei kei na reki tawamudu ena vuravura sa bera mai.

Me vakaga na vakabauta, na marau ena rawa ni vakamalumalumutaki se vakaqaqacotaki, ka na vakatau ena nomu ivalavala. Kevaka o vakayagataka na nomu gauna ena vakasaqarai ni marau ga ni gauna oqo, na nomu marau ena “veikauyaki ka veitosoyaki ena cagi kecega” (Efeso 4:14). Kevaka o sa saga mo bula dodonu tiko, o na tauyavutaka na yavu tudei ni vakacegu ka na rawa ni lako curuma na cava cavaga. Ena gauna o sa vakaliuca kina na nomu vakabauta mai na lasa, o na rawa ni raica na reki dina—na kena ena rawa ni kune walega na “veivutuni vakaidina ka yalomalumalumu ena vakasaqarai ni marau” (Alama 27:18).