iYaloyalo ni Vakabauta
Rakotomalala Alphonse
Sarodroa, Madagascar
Ena gauna e malele mai kina o Rakotolomalala ena kosipeli, na valenilotu voleka duadua e tiko mai Antsirabe, e dua na tauni levu e 30 na maile (50 km) mai na nona koro o Saradroa. E rau kunea e dua na sala o Rakotomalala kei nona itokani me rau lakova na ilakolako oqori ena veisigatabu.
Nikua, e tiko e Sarodroa e dua na valenisoqoni lailai era dau lotu tiko kina e rauta ni 100 na lewenilotu ena vei Sigatabu. Esa raica o Rakotomalala ni sa ciqoma na kosipeli na nona koro. E va na daukaulotu era veiqaravi mai Saradroa ka sa tubu tikoga na Lotu.
Cody Bell, dau ni veitaba
Ena gauna a tauvimate kina o noqu tutu, au a gole yani ki Antsirabe meu tiko kei koya. Erau sikova vakavica vata na daukalotu na nona itikotiko. Keirau a sega ni lewenilotu kei Tutu, ia e dau taleitaka o koya ni rau dauveisiko yani na daukaulotu. Ena dua na bogi, erau solia vei tutu e dua na veivakalougatataki, ka oti e dua na lotu vakamatavuvale, erau solia vei keirau na iVola i Momani.
“Yalovinaka wilika na ivola oqo ka taroga vua na Kalou kevaka e dina,” erau kaya mai.
Ena gauna au lesu ki Sarodroa, au a sega ni vinakata meu wilika nai Vola i Momani baleta niu nanuma ni sega ni dina. Qai dua na siga au sa tauvimate sara vakalevu, kau sa tiko voliga e vale ena vica vata na siga. Au vakasaqara eso na ka meu cakava, kau kunea na Vola i Momani kau sa tekivu wilika sara.
Au qai sotavi rau e muri na daukaulotu niu sa lesu tale ki Antsirabu. Erau vakavulica vakalevu cake na Vola i Momani kei na Parofita o Josefa Simici. Au tukuna vei rau ni sega ni da gadreva na parofita ka sega ni dua tu na parofita ena gauna oqo. Erau kerei au na daukaulotu meu masu ka taroga vua na Kalou kevaka e tiko e dua na parofita ena gauna oqo. Erau yalataka ni na sauma na Kalou. Au masu kau vakila ni veika rau kaya vei au na daukaulotu e dina.
Au via lako ki lotu, ka sega na ilavo meu vodo basi kina. Au veitalanoa kei noqu itokani o Razafindravaonasolo, ka qai tukuna o koya ni keirau rawa ni vodoka nona baisikeli. Keirau vodo tu ka rauta ni rua na auwa dua na sala mai Sarodroa ki Antsirabe ena vei Sigatabu. Ena gauna au sa oca kina, keirau na veisau kina, ka veivukevukei. Ena gauna e oca kina o koya keirau na veisau tale.
Sa qai yaco, me lewena na Lotu na matavuvale nei Razafindravaonasolo kei au. Keitou daulotu tikoga i Antsirabe me yaco sa dola e dua na tabana e Sarodroa. Keitou a marau vakalevu sara ni rawa me keitou lotu ga ena neitou koro!
E kacivi me peresitedi ni tabana o tamai Razafindravaonasolo. Dua na siga e sota vata kei au ka vakauqeti au meu vakavakarau ki na kaulotu. Au sega ni nanuma niu na rawa ni veiqaravi, ia e vakadeitaka vei au niu na rawa. Au ciqoma na veikacivi meu laki veiqaravi ena Tabana ni Kaulotu na Madagascar Antananarivo. Au sa vakamau ka sa rua na luvequ. Au vakavinavinakataka na noqu matavuvale, ka sa levu cake sara na veika au sotava ka sa vukei au me kila ni sa dina na Lotu.
Ni sa lewena oti na Lotu, e veiqaravi o Rakotomalala (matau) ena Tabana ni Kaulotu e Madagascar Antananarivo, ka veiqaravi o Razafindravaonasolo (mawi) ena Tabana ni Kaulotu ena Repaublic mai Congo Kinshasa.
Ena 2013, o ira na lewenilotu mai Sarodroa era tara e dua na valenilotu kau lailai me ra sokalou kina. E marautaka o Rakotomalala na veisau ki na valenilotu lailai oya.
E kakani laukana wasoma na raisi mai Madagascar. Voleka ni o ira kece mai Sarodroa era cakacaka ena veiraisi me ra qarava rawa kina na nodra matavuvale.
Ni sa tubu tiko na Lotu, era sa gadreva na lewenilotu mai Sarodroa e dua na valenilotu vou. Era cakacaka ena valenilotu vou, o Rakotomalala kei ira tale eso me ra veisautaka na valenilotu kau makawa me rumu ni vuli kei na valenivolavola ni bisopi.
Mai na veisiga era dau vodo voli me rua na auwa dua na sala ki valenilotu ena vei Sigatabu, erau sa mai veitokani vinaka sara o Rakotomalala kei Razafindravaonasolo. Erau sa vakavinavinakataka vakalevu na veivakalougatataki esa kauta mai na kosipeli ki na nodrau matavuvale.
Erau tucake tu e mata ni valenilotu vou e Saradroa o Rakotomalala kei Razafindravaonasolo. Na valenilotu oqo e tara mai na buluko, era taraga na lewenilotu.