រូបរាងគំរូព្រះវិហារបរិសុទ្ធបាងកកប្រទេសថៃបានបង្ហាញឡើងហើយ
ទីក្រុងបាងកក — រូបរាងគំរូលម្អិតនៃព្រះវិហារបរិសុទ្ធបាងកកប្រទេសថៃនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានចេញផ្សាយហើយនៅថ្ងៃនេះ ។ ព្រះវិហារបរិសុទ្ធមានរូបរាងគំរូដ៏វិចិត្រមានទំហំ ៤១២៥.៣៥៧ ម៉ែត្រការ៉េ មានកម្ពស់ប្រាំមួយជាន់ ដែលមានកំពូលជាច្រើនឆ្ពោះទៅរកស្ថានសួគ៌ ។ ព្រះវិហារបរិសុទ្ធនឹងត្រូវសាងសង់ឡើងដោយសម្ភារៈ និងក្បូរក្បាច់រចនាដ៏ប្រណិតបំផុតដែលមាន ហើយនឹងមានសោភ័ណភាពដ៏ទាក់ទាញដល់សហគមន៍ថាជាដំណាក់នៃការថ្វាយបង្គំខាងសាសនា ។
ប្រធាន រ័សុល អិម ណិលសុន ជាថ្នាក់ដឹកនាំទូទាំងពិភពលោករបស់សាសនាចក្រ បានមានប្រសាសន៍ថា « ព្រះវិហារបរិសុទ្ធបាងកកនឹងជាពរជ័យមួយចំពោះមនុស្សទាំងអស់នៅតំបន់នេះ ។ ព្រះវិហារបរិសុទ្ធនឹងជានិមិត្តរូបនៃសេចក្ដីជំនឿរបស់សមាជិករាប់រយពាន់នាក់ក្នុងសាសនាចក្រនៅក្នុងភូមិភាគ និងជាការតាំងចិត្តរបស់ពួកគេដើម្បីដើរតាមព្រះយេស៊ូវគ្រីស្ទ ។ ព្រះវិហារបរិសុទ្ធនឹងឈរជាការរំឭកមួយថា ព្រះស្រឡាញ់ ហើយមើលថែបុត្រាបុត្រីរបស់ទ្រង់ទាំងអស់ ។ អ្វីគ្រប់យ៉ាងដែលយើងធ្វើនៅក្នុងសាសនាចក្រដឹកនាំឆ្ពោះទៅរកព្រះអម្ចាស់ និងដំណាក់ដ៏បរិសុទ្ធរបស់ទ្រង់ » ។
មានដីទំហំ ៨៤៨៨.៥៤៧ ម៉ែត្រការ៉េទៀតសម្រាប់សំណង់ខាងសាសនា ដែលនឹងមានដូចជា សាលាប្រជុំសាសនាចំនួនពីរ មជ្ឈមណ្ឌលសេវាកម្មចំនួនមួយ អគារថ្នាក់សិក្ខាសាលា និងថ្នាក់វិទ្យាស្ថាន ការិយាល័យបេសកកម្ម និងផ្ទះសំណាក់សម្រាប់អ្នកចូលព្រះវិហារបរិសុទ្ធ ។ កន្លែងចំណតនៅខាងក្រោមដីដ៏ធំ គឺត្រូវបានរៀបចំនៅទីតាំងដែលមានទីតាំងនៅលើផ្លូវ ភិចាប៊ូរី នៅកណ្ដាលតំបន់ពាណិជ្ជកម្ម និងលំនៅដ្ឋានក្នុងទីក្រុងបាងកក ។
ព្រះវិហារបរិសុទ្ធបាងកកប្រទេសថៃ នឹងក្លាយជាព្រះវិហារបរិសុទ្ធទីមួយនៅក្នុងជាតិសាសន៍អាស៊ីនេះ ហើយនឹងបម្រើដល់សមាជិកនៃសាសនាចក្រនៅក្នុងប្រទេសថៃ និងប្រទេសទាំងអស់នៅក្នុងតំបន់អាស៊ីអាគ្នេយ៍ ។ ពីមុនព្រះវិហារបរិសុទ្ធត្រូវបានប្រកាសកាលពីខែមេសា ឆ្នាំ ២០១៥ ព្រះវិហារបរិសុទ្ធរបស់សាសនាចក្រដែលនៅជិតបំផុត គឺស្ថិតនៅទីក្រុងហុងកុង ដែលមានចម្ងាយជាង ១០០០ ម៉ែល ( ១៦០៩.៣៤៤ គ.ម ) ។
សមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយចាត់ទុកព្រះវិហារបរិសុទ្ធ គឺជា « ដំណាក់របស់ព្រះអម្ចាស់ » ជាទីកន្លែងដ៏ពិសិដ្ឋបំផុតនៅលើផែនដី ។ ព្រះវិហារបរិសុទ្ធមានបើកនៅពេញមួយសប្ដាហ៍ ហើយបិទនៅថ្ងៃអាទិត្យខុសពីសាលាប្រជុំនានា ដែលមានការថ្វាយបង្គំនៅថ្ងៃឈប់សម្រាក ហើយមានសកម្មភាពនានានៅប្រចាំសប្ដាហ៍ ។
មានព្រះវិហារបរិសុទ្ធដំណើរការចំនួន ១៥៩ នៅទូទាំងពិភពលោកបច្ចុប្បន្ននេះ ហើយមានព្រះវិហារបរិសុទ្ធចំនួន ២៣ បានប្រកាស ឬកំពុងសាងសង់ ។ ការសាងសង់ព្រះវិហារបរិសុទ្ធបាងកកប្រទេសថៃត្រូវបានរំពឹងទុកថានឹងចំណាយរយៈពេលបី និងបួនឆ្នាំ ៕