ស្វែងរក អំណោយទាន របស់អ្នក
អ្នកនិពន្ធរស់នៅទីក្រុង រ៉ៃឡែន ប៉ាឡាទីណែតប្រទេសអាល្លឺម៉ង់ ។
មនុស្សគ្រប់រូបហាក់ដូចជានិយាយបែបនេះជានិច្ចថា « លើកលែងតែអ្នកបានដឹងថា អ្នកអស្ចារ្យប៉ុណ្ណា » ។ ប្រាកដណាស់ ការពិតនោះគឺថា ជួនកាលអ្នកគ្រាន់តែពុំដឹងថា ខ្លួនអ្នកអស្ចារ្យខ្លាំងប៉ុណ្ណាប៉ុណ្ណោះ ។ ពេលយើងគ្មានអារម្មណ៍ថា ឆ្លាតខ្លាំង ចិត្តល្អខ្លាំង ស្អាតខ្លាំង កំប្លែងខ្លាំង និងមានទេពកោសល្យខ្លាំងបំផុតក្តី ការអះអាងរបស់ខ្លួនយើងហាក់ដូចជាគ្មានសោះឡើយ ។
ខ្ញុំបានគិតអំពីចំណុចនេះ ៖ យើងទាំងអស់គ្នាគឺជាបុត្រា និងបុត្រីរបស់ព្រះវរបិតាសួគ៌ ។ ដោយសារតែរឿងនោះ ទ្រង់បានប្រទានដល់យើងនូវអំណោយទាន និងទេពកោសល្យពិសេសៗ ដើម្បីជួយយើងបំពេញសក្តានុពលនៃភាពជាព្រះរបស់យើង ។ ពេលយើងរកឃើញអំណោយទានទាំងនេះ យើងត្រូវបានរំឭកអំពីភាពសក្តិសមដ៏ទេវភាពរបស់យើងក្នុងនាមជាបុត្រាបុត្រីរបស់ទ្រង់ ហើយយើងអាចខិតកាន់តែជិតទ្រង់ ហើយជួយអ្នកដទៃឲ្យធ្វើដូច្នោះផងដែរ ។
ស្វែងរកអំណោយទានរបស់អ្នក
នេះគឺជាយោបល់ចំនួនប្រាំបួនដើម្បីជួយអ្នកស្វែងរកអំណោយទានដែលមើលពុំឃើញជាក់ស្តែងមួយចំនួនរបស់អ្នក ។
-
សួរមនុស្សដទៃដើម្បីឲ្យអ្នកបានដឹង ។
ជួនកាលយើងមើលពុំឃើញនៅក្នុងខ្លួនយើងនូវអ្វីដែលអ្នកដទៃអាចឃើញនៅក្នុងខ្លួនយើងឡើយ ។ សូមសួរមិត្តភក្តិ សាច់ញាត្តិ ឬថ្នាក់ដឹកនាំសាសនាចក្រឲ្យសរសេរលិខិតខ្លីមួយអំពីអំណោយទាន ឬទេពកោសល្យដែលពួកគេឃើញនៅក្នុងខ្លួនអ្នក ។
-
រកមើលអំណោយទាននានានៅក្នុងពេលមានទុកលំបាក ។
អំឡុងគ្រាលំបាកៗ យើងអាចជ្រើសរើសរវាងការឲ្យគុណសម្បត្តិដ៏ល្អបំផុតរបស់យើង ឬគុណសម្បត្តិដ៍អាក្រក់បំផុតបង្ហាញចេញមក ។ នៅគ្រាណាដែលលំបាក សូមផ្តោតលើការស្វែងរក និងការប្រើប្រាស់គុណសម្បត្តិ និងអំណោយទានដ៏ល្អបំផុតរបស់អ្នក ។
-
អធិស្ឋានទូលសូមជំនួយឲ្យស្គាល់អំណោយទានរបស់អ្នក ។
ព្រះវរបិតាសួគ៌ជ្រាបដឹងពីសក្តានុពលនៃភាពជាព្រះរបស់យើង ។ ប្រសិនបើយើងមានការលំបាកក្នុងមើលឃើញចំណុចនេះនៅក្នុងខ្លួនរបស់យើង នោះទ្រង់អាចជួយបាន ។ អ្នកអាចអធិស្ឋានទូលសូមជំនួយឲ្យស្គាល់អំណោយទានរបស់អ្នក ។
-
សូមកុំខ្លាចក្នុងការសាកល្បងកិច្ចការថ្មីៗ ។
តើយើងអភិវឌ្ឍតែអំណោយទានរបស់យើងដែលយើងមានរួចហើយ ដោយសារយើងខ្លាចនឹងធ្វើអ្វីដែលយើងពុំធ្លាប់បានធ្វើពីមុនឬ ? ឥឡូវនេះវាដល់ពេលដើម្បីសាកល្បងអ្វីដែលថ្មីៗ ហើយស្វែងរកអំណោយទានដែលយើងមិនស្គាល់ ។
-
ស្រាវជ្រាវព្រះបន្ទូលនៃព្រះ ។
ព្រះវរបិតាសួគ៌ជួយយើងរកឃើញ និងអភិវឌ្ឍអំណោយទានរបស់យើងតាមរយៈតម្រុយដែលមាននៅក្នុងព្រះគម្ពីរ — ជាទូទៅគឺតាមរយៈការអញ្ជើញឲ្យអនុវត្ត ។ សូមយកខគម្ពីរនេះជាគំរូ ៖ « ចូរឈប់ទាស់ទែងនឹងគ្នា ចូរឈប់និយាយអាក្រក់ពីគ្នាទៅវិញទៅមក » ( គ. និង ស. ១៣៦:២៣ ) ។ តើមានអំណោយទានអ្វីខ្លះដែលអ្នកអាចអភិវឌ្ឍចេញមកពីការអញ្ជើញនេះ ? អំណោយទាននៃការនិយាយពាក្យពិរោះពិសារអំណោយទាននៃការរម្ងាប់កំហឹងមនុស្សដទៃ អំណោយទាននៃការអត់ធ្មត់ និងអ្វីៗជាច្រើនទៀត ។ ហើយនោះវាចេញមកពីខគម្ពីរតែមួយប៉ុណ្ណោះ ! ការអានព្រះគម្ពីរ និងស្ដាប់តាមការបំផុសគំនិតពីព្រះវិញ្ញាណអាចជួយអ្នកស្វែងរកអំណោយទានរបស់អ្នក ។
-
កុំផ្តោតតែលើខ្លួនអ្នក ។
ជួនកាលគុណសម្បត្តិដ៏ល្អបំផុតរបស់យើងកើតមាន ពេលយើងមិនផ្តោតតែលើខ្លួនឯង ប៉ុន្តែផ្តោតជំនួសវិញទៅលើរបៀបដែលយើងអាចធ្វើការជាមួយ និងជួយអ្នកដទៃ ។ ពេលយើងធ្វើដូច្នេះ យើងនឹងឃើញថា យើងមានអំណោយទានជាច្រើនដែលដូចព្រះគ្រីស្ទ ។
-
គិតអំពីមនុស្សដែលយើងយកធ្វើជាគំរូ ។
តើមាននរណាខ្លះដែលជាគំរូរបស់អ្នក ? អ្នកអាចធ្វើបញ្ជីមួយអំពីអំណោយទានទាំងអស់នៃមនុស្សដែលអ្នកយកធ្វើជាគំរូ សូមសង្កេតរកមើលអំណោយទាននានាដែលអ្នកមាន ជំនួសឲ្យការផ្តោតលើអំណោយទានណាមួយដែលអ្នកគ្មានជារួមជាមួយបុគ្គលនោះ ។
-
សញ្ជឹងគិតពីគ្រួសាររបស់អ្នក ។
តើមានអំណោយទានអ្វីខ្លះដែលអ្នកមាន ហើយបងប្អូន ឪពុកម្ដាយ ឬតាយាយរបស់អ្នកក៏មានផងដែរនោះ ? ចូរបន្តទៅមុខទៀត ! ស្រាវជ្រាវពង្សប្រវត្តិគ្រួសារ ស្វែងរករឿងនានា និងរកមើលអំណោយទានបន្ថែមទៀតដែលអ្នកមានដូចគ្រួសាររបស់អ្នក ។
-
ទទួល ឬអានពរលោកអយ្យកោររបស់អ្នក ។
ពររបស់អ្នកអាចនិយាយអំពីអំណោយទានដែលអ្នកមាន និងអំណោយទានដែលគួរតែអភិវឌ្ឍឲ្យមាន ហើយវាក៏ចង្អុលបង្ហាញដល់អ្នកនូវផ្លូវដែលនឹងដឹកនាំទៅរកអំណោយទាន និងទេពកោសល្យថ្មីៗដទៃទៀតផងដែរ ។
ចូរឲ្យបានល្អឥតខ្ចោះនៅក្នុងទ្រង់
យើងពុំចាំបាច់ត្រូវពូកែគ្រប់កិច្ចការទាំងអស់ដើម្បីដឹងថា យើងគឺជាបុត្រាបុត្រីដ៏សក្តិសមរបស់ព្រះឡើយ ។ យើងត្រូវតែលះបង់ក្នុងការស្វែងរក និងអភិវឌ្ឍអំណោយទាន និងទេពកោសល្យរបស់យើង — បន្ទាប់មក តាមរយៈដង្វាយធួនរបស់ព្រះយេស៊ូវគ្រីស្ទ នោះយើងអាចបានល្អឥតខ្ចោះនៅក្នុងទ្រង់ ( សូមមើល មរ៉ូណៃ ១០:៣២ ) ។