ដំណើរទៅកាន់ព្រះវិហារបរិសុទ្ធរបស់ខ្ញុំ
ដោយ ងិន សុផន សមាជិកសាខាចំការមន
នៅថ្ងៃចន្ទ ទី៣ ខែកក្កដា ឆ្នាំ ២០១៧ ខ្ញុំបាទឈ្មោះ ងិន សុផន និងភរិយាខ្ញុំឈ្មោះ កែវ ចាន់ធឿន បានធ្វើដំណើរទៅព្រះវិហារបរិសុទ្ធហុងកុង ជាមួយនឹងបងប្អូនសមាជិកជាច្រើនផ្សេងទៀត ។ ហើយនៅថ្ងៃបន្ទាប់ គឺជាថ្ងៃអង្គារ៍ទី ៤ ខែកក្កដា នៅវេលាម៉ោង ៨ ព្រឹក នោះគឺជាគ្រាដំបូងបំផុតដែលខ្ញុំ និងប្រពន្ធខ្ញុំបោះជំហានជើងចូលទៅកាន់ព្រះវិហារបរិសុទ្ធ ។ ពួកយើងមានអារម្មណ៍សប្បាយផង ភ័យផង អរផង ។ វាជាសេចក្ដីសុខសាន្ដណាស់ ដែលខ្ញុំនឹងប្រពន្ធខ្ញុំបានមកដល់កន្លែងពិសិដ្ឋដើម្បីធ្វើពិធីបរិសុទ្ធនោះ ។
នៅថ្ងៃបន្ទាប់ ខ្ញុំនឹងប្រពន្ធខ្ញុំបានចូលទៅព្រះវិហារបរិសុទ្ធធ្វើពិធីបរិសុទ្ធសម្រាប់ខ្លួនពួកយើងផ្ទាល់ ។ ហើយនៅថ្ងៃបន្ទាប់មកទៀត ពួកយើងបានចូលទៅព្រះវិហារបរិសុទ្ធម្ដងទៀត ដើម្បីធ្វើពិធីបរិសុទ្ធសម្រាប់ក្រុមគ្រួសាររបស់ពួកយើងទាំងសង្ខាង ។
រីឯនៅថ្ងៃព្រហស្បតិ៍ ខ្ញុំនឹងប្រពន្ធខ្ញុំបានទៅព្រះវិហារបរិសុទ្ធទៀតដើម្បីធ្វើពិធីបរិសុទ្ធសម្រាប់ជីដូនជីតារបស់ពួកយើង ហើយនៅថ្ងៃសុក្រ វេលាម៉ោង ១០ ព្រឹក នោះគឺជាថ្ងៃដ៏សំខាន់ដែលខ្ញុំនឹងប្រពន្ធខ្ញុំធ្វើពិធីផ្សារភ្ជាប់នឹងគ្នាសម្រាប់ភាពអស់កល្បជានិច្ច ។ ហើយពួកយើងក៏បានធ្វើពិធីបរិសុទ្ធសម្រាប់អ្នកដទៃទៀតដែលពុំមែនជាគ្រួសាររបស់ពួកយើងផងដែរ ។ វាគឺជាឱកាសដ៏អស្ចារ្យ ហើយខ្ញុំមានអារម្មណ៍ល្អណាស់នៅពេលខ្ញុំបានធ្វើដូច្នោះ ។ ពួកយើងបានចងចាំសេចក្ដីសញ្ញាដែលពួកយើងបានធ្វើនៅក្នុងព្រះវិហារបរិសុទ្ធ ហើយការទៅព្រះវិហារបរិសុទ្ធ បានជួយដល់ខ្ញុំ និងប្រពន្ធខ្ញុំអាចជំនះលើបញ្ហាជីវិតប្រចាំថ្ងៃរបស់ពួកយើង ៕