Ua Na’o Tusiga Faatekinolosi: Talavou Matutua
Agai i Luma i le Mavae ai Ona Iloa le Faaaoga e la’u Uo o le a Faaipoipo i Ai o Ponokalafi
Na tautino mai e la’u uo o le a faaipoipo i ai e i ai sona faafitauli i ponokalafi. Pe mafai ona ou faaipoipo pea ia te ia?
E alala le tusitala i Falani Polenisia.
Na ma feiloai ma lou toalua a o avea uma i ma’ua o ni faufautua o le EFY. Sa ou fiafia i le malosi o lana molimau ma le ala na ia aoao ma fetufaai ai ma le autalavou.
Ina ua amata ona ma tafafao faamasani, sa ma lagonaina e peiseai o loo faamoemoeina e le Alii se mea mai i la ma’ua fegalegaleaiga. Ae, a o faagasolo le ma faigauo, sa atili ona ia tumau i ala sa faaalia ai lona alofa. Sa amata ona ou masalosalo sa i ai ni faigata ia te ia e faatatau i ponokalafi, ae na ia faafitia le i ai o ni faafitauli o i ai.
Na amata ona ma faatulagaina ni tulafono patino e puipuia ai i ma’ua. Ina ua ia talosaga mai e faaipoipo ia te a’u, sa ou taliaina ma na amata ona lelei mea uma—seia oo i se tasi aso, i lena taimi, sa amata ona ia taumafai e faaali mai e alofa ia te au i auala sa ou le maua ai ni lagona lelei.
Sa i ai pea ou masalosaloga e uiga i lona faaaogaina o ponokalafi, o se tasi la o aso na ou ta’u atu ai ia te ia e uiga i se tasi o a’u soa i le misiona o le sa tauivi ma ponokalafi a o lumanai lana misiona. Sa ou faia le mea sili ia atagia atu ai o a’u o se tagata e malamalama, alofa, ma e le faamasino atu, aua o ia moni lava o se tagata lelei. Ona ou toe fesili atu lea ia te ia pe o ia te ia se mausa i ponokalafi, ma na iu ai lava ina ia ta’u mai ia te a’u e i ai.
Tiga ma le Faamalologa
I le taimi muamua lava, sa faigata ia te a’u ona talanoa atu ia te ia ma vaai sa’o atu i ona mata. Na toetoe lava a ou le gafatia ona tatali o’u lagona ona sa ou lagonaina na faailoa mai e le Alii ia te a’u o le alii lenei e mafai ona avea ma a’u soa e faavavau. Ae e ui sa ou tiga, sa ou iloa e tatau ona ou galue agai atu i le faamagalo atu ia te ia, ma na ou lagona le uunaiga ia aua nei o’u toilalo i la ma’ua mafutaga.
Sa tele ina ou tatalo ma suesue saunoaga e uiga i le faamagalo atu ma le faaaoga o ponakalafi. Sa ou faitau i le tele o tusiga ma molimau a i latou ua faaipoipo ia sa tauivi o latou taitoalua ma lenei vai oona. A’o o’u faitauina, sa ou lagona le alofa o le Faaola mo a’u ma la’u uo o le a faaipoipo i ai, ma na ou mauaina se isi faamautinoaga e faapea o lenei alii o ia moni lava o la’u soa e faavavau. Sa ou aoaoina mai ai foi se vaega e ese mai o le Togiola a le Faaola—le ala e mafai ona Ia faamaloloina ai se agaga salamo (o la’u uo o le a faaipoipo i ai) ma se loto ua faamanu’alia (o a’u).
O se mea taua i la ma faigamalaga o le talanoa lea i le epikopo a la’u uo o le a faaipoipo i ai. O lana taitaiga sa fesoasoani ia i ma’ua ia faamaloloina ma ola vavalalata o se ulugalii. Sa sili ona onosai o ia ina ua toe vaivai lo’u to’alua, ma o lana faataitaiga faaKeriso sa musuia ma fesoasoani ia te a’u e faamagalo ma galue ai i lenei faafitauli ma la’u uo o le a faaipoipo i ai.
Mo sina taimi, sa faigata la mo la’u uo o le a faaipoipo i ai le vaai mai ia te a’u o mafatia ona o ana filifiliga lea na toe toe lava a ia le toe mana’o e faaipoipo ia te a’u! Ae i le mavae ai o le galulue faatasi mo nai masina mo ia ina ia mama, na ia lagona mulimuli ane ua faamagaloina o ia e le Alii faapea foi a’u.
Na iu lava ina ma faaipoipo, ma ua sili atu ona malosi la maua mafutaga na i lo le mea na i ai. O lenei aafiaga na fesoasoani ia i ma’ua ia aua le ma e talanoa i le tasi ma le isi e uiga i o ma’ua faafitauli. Ma e ui lava e le o toe aafia o ia i ponokalafi, o loo ma gauai atu pea ma tali atu le tasi i le isi.
E Mafai Ona Faatinoina la Oulua Mafutaga
Afai ua faaleagaina le lua mafutaga e aafiaga tau ponokalafi, ia iloa e mafai ona faamagalo atu. E mafai ona faaauau ona alofa le tasi i le isi ma galulue faatasi ia maua tali ma faatoilaloina. Tatou te agavaa uma mo le faamalologa a le Togiola a le Faaola. E tatau ona tatou taliaina ua faamanu’alia i tatou ma ua na’o le fesoasoani lava a le Faaola e mafai ai ona faamaloloina atoatoa i tatou.
E tulaga ese tala a tagata taitoatasi, ma e tulaga ese foi mafutaga taitasi. Mo nisi tagata, o le faamutaina o le mafutaga atonu o le mea sa’o lea e fai. Ae ou te faamoemoe o le a mafai ona fesoasoani atu la ma’ua tala i isi o talitutusa tulaga o loo i ai. Talu ai sa ou mauaina lena faamautinoaga mai le Agaga Paia, faatasi ai ma le fesoasoani a le Faaola ma Lana Togiola, sa mafai ai ona ou faamagaloina la’u uo o le a faaipoipo i ai ma faaauau ai la ma’ua mafutaga. Ou te iloa sa o se filifiliga sa’o lea mo a’u.
Afai o e feagai ma se tulaga talitutusa, manatunatu ma le agaga tatalo i tulaga o loo e i ai i le taimi nei ma le tulaga e ono oo i ai i le lumanai. Afai ua e maua se faamautinoaga mai le Agaga faapea o le faaauauina o le lua mafutaga o le mea sa’o lea e tatau ona fai ma ua e lagona le mautinoa, o le iloaina o le i ai o ni taumafaiga mai ia te oulua uma ma le faalagolago atu i le Tama Faalelagi, e mafai ai ona faaauau le lua mafutaga.
O lo’u toalua o se alii lelei, ma ua sili atu lo’u alofa ia te ia! E le lava la’u faafetai i le Alii mo le fesoasoani mai e faamalolo i ma’ua ma mafai ai e i ma’ua ona faaipoipo. Na fesoasoani mai le Alii ia i ma’ua ia tuputupua’e faatasi o se ulugalii ua saunia e feagai ma soo se mea ua ia fuafuaina mo le faatasia o o ma olaga.