Taitaia ia Monica

Ata

woman standing on balcony watching other woman at window

Ata na tusia e Stan Fellows

A o ou nofo i São Paulo, Pasila, na ou masani ai i se tamaitai faapitoa e igoa ia Graça. O ia o se tamaitai agaalofa ma agalelei ma o se uo i tagata uma.

O Graça o laʻu soa faiaoga asiasi. O ia o se tina o se fanau e toatolu, sa galue faavaitaimi, ma e leai sana taavale po o se telefoni, ae e leai se mea na taofia ai o ia mai le auauna atu.

Mai loʻu polotito, e mafai ona ou iloa atu se faamalama e tasi o lona fale. A avanoa o ia, e tuʻu e Graça se fasi ie mumu i lena faamalama e faʻaalia ai ua sauni o ia e alu e asiasi. Na te leʻi mauaina lava se alofaga e le mafai ai ona auauna atu. E masani ona ou mafaufau e uiga i le faailo a Graça ma lana faataitaiga ofoofogia o auaunaga faamaoni ma faigofie.

E tasi se aafiaga e tu mai i loʻu mafaufau. Sa ma sauni ma tatalo ao lei o atu e asiasi i se tasi o ma uso. A o ma latalata atu i lona fale, na ma iloa ai sa ma agai atu i le fale o se isi uso! Sa tofia i maua e asiasi i lenei uso, o se tina e le toaga i le lotu e toalua lana fanau laiti, ae sa leʻi fuafuaina e asiasi ia te ia i lena aso. Talu ai sa ma i ai iina, sa ma tuʻituʻi, ae leai se tasi na tali mai.

Sa tonu ia i maua ia tumau ma faatalitali. Na iu lava ina sau le uso lea, o Monica, ma taʻu mai ia te i maua o loo pisi o ia. Na ma maitauina ua vaivai o ia ma toetoe lava a tagi. Ina ua ma fai atu sa ma i ai iina e fesoasoani, na ia faatagaina i maua e ulufale. Sa tagi lana pepe, o lea sa ma fai atu ai ia te ia e tausi muamua lana pepe ma o le a ma faatali. Ina ua alu Monica i le fogafale i luga ma lana pepe, sa amata ona ma galulue, sa faamama nai potu ma gaugau uma lavalava na ma vaai i ai.

Ina ua vaai Monica i le manaia o lona fale, sa amata ona tagi, ma tatala lona loto ia i maua, ma faasoa mai nisi o ona luitau. Na ma folafola atu e fesoasoani ia te ia, ma ma talanoa i le peresitene o le Aualofa e uiga i ona luitau. O le Aso Sa na sosoo ai, na auai ai Monica i le lotu.

Na avea Monica ma se tamaitai malosi, fiafia, ma sa faaauau pea ona ma auauna atu ia te ia ma le alofa ma le tausiga. Sa i ai pea ia te ia ia luitau lava e tasi, ae na mafai ona ia taulimaina ma le tele o le faatuatua ma le lototele ona o lona malosi i le Lotu.

Ou te matua faafetai mo faataitaiga a Graça ao ma auauna faatasi. Sa ma tatalo mo le taitaiga, ma na taitaiina i maua e le Atua ia Monica.