Pe Tatau Ona Ou Faitau Pea?
I le tausaga ua mavae na ou filifilia ai se tusi i le faletusi e uiga i se teineitiiti na amataina sana tusigatala i luga o le initoneti [blog]. Na ou manatu o le a avea o se tusi fiafia ona o le tagata autu o le tusi ma te tupulaga, ma o loʻu tina o se tusitala foi i luga o le initoneti. O lea sa ou manatu ai o se tusi e mafai ona ou fesootai i ai.
Na faatoa ou faitauina ni nai itulau o le tusi ae tau fua e le teineitiiti le suafa o le Alii. Ou te lei lagonaina le fiafia i totonu ina ua uma ona ou faitauina lena vaega. Ae sa ou faitau pea, ma le faamoemoe o se mea na o le faa-tasi ona tupu. Sa ou faitauina ni nai itulau, ma sa ia toe faia foi.
Na ou alu ma taʻu i loʻu tina mea na ou mauaina. Ou te leʻi iloa pe e tatau ona ou faitau pea pe leai. Sa fai mai loʻu tina o laʻu filifiliga lena. Ae na ioe o ia atonu e le o se mea lelei le faaauau pea ona faitau pe a fai e le teine mea na ma iloa e sese. Na fai mai loʻu tina aemaise lava pe afai na te taʻu fua le suafa o le Alii.
Sa ou manatu o le a sue pe toe tupu, o lea na ou sueina ai totonu o le tusi. Sa ou iloa o le taʻu fua o le suafa o le Alii o le auala lea e masani ona talanoa ai lenei teineitiiti. Sa ou filifili e toe faafoi le tusi i le faletusi e aunoa ma le toe faitauina.
Na ou lagona le faanoanoa ona ua tau fua e le tusitala le suafa o le Alii. Ae ina ua ou toe faafoiina le tusi i le faletusi, sa ou lagona le fiafia na ou faia le filifiliga saʻo. Ou te iloa sa ou mulimuli i le “O O’u Tulaga Faatonuina Faatalalelei” mai le tusi Faatuatua i le Atua o loo faapea mai, “O le a ou faitau ma matamata i na o mea e fiafia i ai le Tama Faalelagi.” Ou te iloa e tatau ona tatou faaaogaina suafa o le Tama Faalelagi ma Iesu ma le migao ma le faaaloalo.