Faataitaiga Lototele
Auauna atu i le Alii i le FaaSipaniolo
E alala le tusitala i Iuta, ISA.
Vaai faalemafaufau na tuʻuina atu e lau uo le tusi e sili ona lelei na ia faitauina. E te susuea le faavaa … ma iloa ai e le mafai ona e faitauina le tusi. E ese le gagana o loo tusia ai! O le a le mea e te faia?
I uluai tausaga o le Ekalesia, na lolomiina le Tusi a Mamona i le Igilisi. Na valaauina e Peresitene Polika Iaga ni faifeautalai se toalua e talai le talalelei i Mekisiko ma faaliliuina le Tusi a Mamona i le faaSipaniolo. Ae na latou manaʻomia se fesoasoani tele e faia ai. Na latou le iloa i le isi itu o le vasa, na saunia e le Atua se tagata e mafai ona avatu ia i latou le fesoasoani tonu latou te manaomia.
O Meliton Gonzalez Trejo na sau mai se aiga mauoa i Sepania. Sa ia suesue malosi i le aoga ma avea ma se fitafita i le autau Sipaniolo. Sa masani ona fiafia o ia i lotu, ae leai se mea na ia mauaina na maua ai ni lagona lelei. I se tasi aso na ia faalogo ai i se isi fitafita o talanoa e uiga i se vaega o tagata o e na ta’ua i latou lava o le “Au Paia.” Na latou auai i Le Ekalesia a Iesu Keriso o le Au Paia o Aso e Gata Ai, ma o se perofeta a le Atua na taitaiina atu i latou i Mauga Papa i le Iunaite Setete. Na lagona e Meliton se naunautaiga malosi e feiloai ia i latou. Na auai atu o ia i le militeli agai atu i Filipaina, ma le faamoemoe o le a fesoasoani ia te ia e oo atu ai i le Iunaite Setete mulimuli ane. Ae na matua pisi lava Meliton i lana galuega lea na foliga mai ai o le asiasi atu i le Au Paia ua amata ona lagona le le taua.
Ona ma’i tigaina lea o Meliton. Na ia manatua pe aisea na sau ai i Filipaina ma tatalo i le Atua e uiga i le mea e tatau ona ia faia. O lena po, na maua ai e Meliton se miti faapitoa. Sa ia iloa e tatau ona alu o ia mo Mauga Papa.
Ina ua toe malosi Meliton mai lona maʻi, sa faaauau lana malaga i le Iunaite Setete. Na taunuu o ia i Kalefonia i le aso 4 Iulai, 1874, ma agai atu i le Aai o Sate Leki.
Ina ua taunuu atu Meliton i Sate Leki, sa feagai o ia ma se faafitauli: e mafai ona ia faitau i le Igilisi ae lei tautala ai. Na le mafai ona ia fesootai ma se tasi! Ae na tonu ia te ia afai e le mafai ona ia talanoa i tagata, o le a ia taumafai atu i se isi auala. Sa tui e Meliton lana toniga o le autau a Sepania ma savali i luga ma lalo o auala o le aai. E pei o lona faamoemoega, e toatele tagata na latou matauina o ia! Na iu lava ina iloa atu o ia e se tasi o le Ekalesia e igoa ia Brother Blanchard, o se polofesa o iunivesite o le sa tautala faaSipaniolo. Sa fesoasoani Brother Blanchard ia Meliton e faamautu i Sate Leki ma aoao ia te ia le talalelei. E lei leva ae papatisoina Meliton.
Na faalauiloa foi e Brother Blanchard ia Meliton ia Peresitene Polika Iaga. Na tau atu e Meliton ia Peresitene Iaga e sili atu nai lo se isi lava mea, na ia manao e faaliliu le Tusi a Mamona i le faaSipaniolo.
Na talosaga atu Peresitene Iaga ia Meliton e fesoasoani i faifeautalai o le a o atu i Mekisiko e faaliliu ni vaega o le Tusi a Mamona i le faaSipaniolo. Sa faaaluina e Meliton le tele o vaiaso i le faaliliuina o upu Peretania i le faaSipaniolo. O po taitasi sa ia toe iloilo ai lana faaliliuga ma faifeautalai. Sa latou tautatala i le faaSipaniolo ae na latou lagona o lenei faaliliuga taua e manaomia ai se tagatanuu tautala faaSipaniolo. Na latou iloaina o Meliton o se tali ia latou tatalo. I le 1875 na lomia ai le faaliliuga. Sa faaigoaina Trozos Selectos del Libro de Mormon (Fuaitau Filifilia mai le Tusi a Mamona).
Ua sauni nei faifeautalai e malaga atu i Mekisiko. Na latou utaina le 1,500 kopi o mau faaliliuina i luga o le solofanua ma amata la latou faigamalaga. Mo le taimi muamua, na mafai e tagata tautatala Sipaniolo ona faitau le Tusi a Mamona i la latou lava gagana! E ui lava ina ola Meliton i le afe ma afe maila le mamao i Sepania, ae na taitaiina o ia e le Tama Faalelagi i le mea tonu e tatau ona ia i ai. Ona o le lototoa ma le faatuatua o Meliton, na ia fesoasoani e aumaia le afioga a le Atua i tagata e le mafaitaulia.