Ou te le Fia Ese!
E alala le tusitala i Iuta, ISA.
“Ia manatua ua tele lava le taua o agaga i le silafaga a le Atua” (MF&F 18:10).
Sa masani ona tulimatai atu Mika i vasega siva. Sa fiafia o ia e faalogologo i le musika. Sa fiafia o ia e faataitai lana oso pei o se pepe [butterfly skip] ma faia ia saʻo. Ma e faapitoa lava lona fiafia i ai pe a o faatasi le vasega atoa. Ina ua latou faia, sa pei e tutusa uma le au sisiva. Sa pei e le na’o ia na maua i le Down syndrome.
O le aso na latou aoaoina ai se laasaga fou o le siva. Sa matamata Mika a’o oso i luga i le ea lona faiaoga. Sa matamata o ia i isi teneiti a’o taumafai. Na vave ona maua e isi. O isi na faia ni nai taumafaiga. Sa taumafai ma taumafai Mika, ae na te le’i mauaina lava.
“Faiaoga, e mafai ona e fesoasoani mai ia te a’u?” O le fesili lea a Mika.
O le teine na sosoo ma ia na tilotilo atu ia Mika. Ona faasaga atu lea i lana uo. “Aisea e tautala ai faapena o ia?” sa ia musumusu atu ai. Sa faasaga atu teine ma tilotilo atu ia MIka.
A o agai i le fale mai le vasega, na filemu Mika i le taimi atoa.
Ina ua la taunuu i le fale, sa palu le falaoamata a Tina i le umukuka. Sa pipii falaoamata i lona alafau. I nisi taimi e masani ona ata ai Mika i le mea lena. Ae o le asō ua na o le faapau ifo o lana ato i luga o le fola ma faapau i se nofoa i le laulau.
“Na faapefea mai le vasega siva?” O le fesili lea a tina.
“Matautia,” na fai atu ai Mika. “Na ou fesili mo le fesoasoani, ae fai mai se teineitiiti e foliga malie la’u tautala. Ona ia sioa mai lea ia te au.” Sa tilotilo i lalo Mika. “Ou te le toe fia alu i le vasega siva.”
“Oi, Mika!” Na fai atu ai Tina. “Ou te matua faamalie atu. Ma te fiafia ma Tama e matamata ia te oe o siva. Ma te mitamita i le malosi o lou galue!”
Na lagonaina e Mika loimata ua amata ona oo mai. “Ou te le fiafia i le Down Syndrome lea ia te au. Ou te le fiafia i le ese o lo’u foliga. Maʻimau pe ana le faigata tele mo aʻu ona aʻoaʻoina mea fou. E tatau lava foi ona faataitai la’u tautala!”
Na nofo Tama i tafatafa o Mika ma tuu lona lima faataamilo ia te ia. “Mika, ma te alolofa tele ia te oe. Ma te le suia lava se mea se tasi e uiga ia te oe.”
Ae sa lulu le ulu o Mika ma pupuni ona foliga i ona lima. “Ou te le fia ese. Ou te manaʻo ia aveese loʻu Down syndrome mai ia te aʻu!”
Sa filemu Tina ma Tama mo sina taimi.
“E i ai so’u manatu,” o le tala lea a Tina. Sa pulapula mai Mika i luga ae o ona lima. “Aisea e te le tatalo ai ma ole atu i le Tama Faalelagi pe o le a Lona lagona e uiga ia te oe?”
Sa mafaufau Mika i lena mea. Sa fiafia o ia e tatalo. Sa lue lemu mai lona ulu. “E mafai ona e tusia i lalo le fesili ina ia ou manatua le fesili e fai?”
Sa tusi i lalo e Tina le fesili. Ona ave lea e Mika le pepa ma alu i lona potu e tatalo ai.
Ina ua sau o ia i le umukuka i ni nai minute mulimuli ane, na susulu foliga o Mika e pei o se matauila. “Sa tali mai le Tama Faalelagi!” o lana tali lea.
“O le a Lana tala?” O le fesili lea a tina.
“Na Ia fai mai, ‘Mika, Ou te alofa ia te oe i le tulaga o e i ai,’” o lana tala lea. “Ma sa Ia fai mai ai ma se SIUFOFOGA leotele!”
O le vaiaso na sosoo ai i le vasega siva, e le’i popole Mika i isi teine ma o latou manatu e uiga i lona Down syndrome. Nai lo lena, na ia matauina se isi teine, o Sara, o le na foliga faanoanoa. Sa faigata foi ia Sara ona aoaoina nisi o siva fou.
Ina ua taunuu mai Mika i le fale, sa ia filifili e tusi se tusi mo Sara. Sa ia tusia le tele o fatu. Sa fesoasoani Tina ia te ia i le sipelaina o upu.
“Mo Sara,” na tusia e Mika. “O oe o se tagata siva maoae. Ou te fia avea ma au uo. Ou te fiafia o e i ai i totonu o la’u vasega siva.”
Sa le mafai ona faatali Mika e ave lana tusi ia Sara. Sa manao foi Mika ia lagona e Sara le fiafia ma le alofagia i le vasega siva.