Na’o se Tatalo Lava
Sa fefe Prodi e toe alu e moe. Ae a pe afai ei ai se isi ana miti taufaafefe?
“Ole iā te Ia” (Tusipese a Tamaiti, 6).
Na vave ona nofo i luga Prodi mai le moega. Sa tata vave lona fatu.
Na pau timuga i luga o le taualuga ao nofo o ia i le pogisa. Sa mafai ona ia faalogoina le tafe mai o le vai mai le mati Aferika i fafo atu o lona faamalama, ma o le ea sa piipii ma mafanafana. Na manava i totonu Prodi ma taumafai e malolo. Sa na o se miti.
Sa ia tolotolo mai lona moega ma autilo atu i totonu o le potu o ona matua. Sa momoe filemu Mama ma Papa. O lona tuafafine laitiiti, o Célia, sa faapupuu foi i luga o lona moega. Sa lelei mea uma. Sa saogalemu lona aiga.
Sa toe oso Prodi i luga le moega ma taumafai e toe moe. Sa ia feliua’i solo. Sa ia iloa o lana miti e le moni, ae sa matuai fefe lava! E ui lava na vaivai o ia, ae na fefe o ia e toe moe. Ae a pe afai e i ai se isi ana miti taufaafefe?
Na taoto Prodi i lona tua ma tilotilo atu i le faalo. Na ia taumafai e mafaufau i ni mafaufauga fiafia. “Tama Faalelagi, pe o e i ai moni ea iina? E te faafofoga ma tali i tatalo a tamaiti uma?” Na oo mai se galu o le mafanafana ia Prodi ao ia mafaufau i upu o le pese Peraimeri e sili ona fiafia i ai. Na aoaoina i latou e Sister Kioska o le Tama Faalelagi o loo vaavaaia i latou i taimi uma. E mafai ona latou tatalo atu ia te Ia i soo se taimi, i soo se mea.
Sa iloa e Prodi le mea e tatau ona fai. Na oso ese o ia mai le moega ma tootuli e tatalo.
“Tamā Faalelagi pele e,” na ia tatalo ai, “Ua ou matua fefe lava. Faamolemole ia saogalemu loʻu aiga. Ma faamolemole fesoasoani ia te au ina ia mafai ona ou moe ma le toe i ai ni au miti taufaafefe.”
Na faaiu e Prodi lana tatalo ma toe oso i luga o le moega. Sa malolo lona tino, ma na lagona e lona mafaufau le toafilemu. E le’i umi ae moe o ia.
Ina ua oo mai le taeao, na ala mai Prodi i le la mafanafana o susulu atu i le faamalama. Na mafai ona ia faʻalogo atu i ulo o pao i le umukuka ma tu i luga e sue Mama. Sa i ai Celia i le laulau sa ai lana manioka na totoe. Na fa’amafanafana e Mama nisi meaai mo ia e ‘ai ai foi.
“Talofa,” na fai atu ai Mama. “Na a mai lau moe?”
“Na fai la’u miti taufaafefe,” o le tala lea a Prodi. “Ae na fai la’u tatalo. Na fesoasoani le Tama Faalelagi ia ou lagona le saogalemu.”
“Ou te faamalie atu na e maua se miti taufaafefe,” o le tala lea a Mama. Sa ia fusiina mai Prodi, ma ua i ai mo se taimi umi lava. “Ae ua ou fiafia na e faia se tatalo. E foliga mai na fesoasoani tele le Tama Faalelagi ia te oe.”
“Na Ia fesoasoani mai,” o le tala lea a Prodi. “Na mafai ona ou toe moe, ma e leʻi toe i ai ni a’u miti taufaafefe.” Sa fusi mau e Prodi ia Mama. Sa fiafia o ia e iloa e tusa lava po o le a le fefe sa ia lagonaina, ae na o se tatalo lava i le Tama Faalelagi.