O Mea e Manaomia e Maua ai o Tatou Manaoga Amiotonu

Ae ou te lei papatiso i Le Ekalesia a Iesu Keriso o le Au Paia o Aso e Gata Ai, sa ou manao e auauna atu i le Alii. Sa masani ona ou fai ifo ia te a’u lava, o le a ou tuuto atu lo’u taimi atoa ia te Ia e tusa lava po o le a. O le auauna ai ia te Ia i lo’u olaga atoa o la’u miti lea. Ma o le auai i le Ekalesia a Iesu Keriso na tuuina mai ai ia te a’u se avanoa sili atu i le mulimuli ai i la’u miti.

Ia Tesema 2017, sa ou papatiso ai. O le aso sili lea ona maoae i lo’u olaga. Na aoaoina a’u e le talalelei i le auala e ese ai ona mafaufau, le auala e musuia ai isi, le auala e foia ai lou fefe, ma le auala e faamalosia ai a’u taleni ma maua ai ni mea fou. Na iu foi ina ou aoao e uiga i le avanoa e auauna atu ai i se misiona tala’i. Sa ou iloaina vave o se mea lena sa ou manao e fai. O lea la, mai lea aso i lea aso, sa ou galue ai e saunia. Sa ou faitau i tusitusiga paia, auai i le inisitituti, ma faalauteleina lo’u valaauga. Ae peitai, sa i ai se faafitauli i lo’u aiga na mafua ai ona ou le mautonu e uiga i le lumanai.

Mativa.

Ina ua atoa lo’u 18, sa taia lo’u aiga e le mativa. Sa tau le mafai ona matou aai, alu i le aoga, pe totogi se taavale e alu ai i le lotu. Na pau lava le mea na matou uumauina o la matou faatuatuaga lea. O lenei tulaga e matua faatuai ai lava lo’u faagasologa o le auauna atu i se misiona. Sa ou talanoa atu ia tinā e uiga i lo’u manao, ae sa ia toe ta’ua se mea sa masani ona ia tau mai ia te a’u: “Faauma le aoga, ona mulimuli ai lea i au miti.” Ona o o matou tulaga tautupe, sa lei tele se filifiliga na ou maua. O lea sa ou galue malosi ai ina ia uma le aoga.

Na iu lava ina ou faauu ma na iu lava ina ou sauni e alu atu ma auauna atu i le Alii. Peitai sa aafia ai pea i matou i le mativa.

Sa ou le mautonu.

Sa ou mafaufau, “Ua uma la’u aoga, ma ua ou faia mea uma ou te mafaia. Aisea e le lelei ai pea lenei mea?” Ou te lei toe fia faatali mo la’u miti, ae ui i lo’u lotovaivai, sa ou faalagolago lava o le a sologa lelei mea uma i lea taimi.

Sa ou filifili e galue malosi ia sili atu mo le mauaina o tupe uma mo a’u tupe faaalu o le misiona. Sa ou tatalo i aso uma, asiasi atu i faifeautalai i le tele na mafai ai, ma faamalosia ai la’u molimau e ala i le suesueina o anomea a le Ekalesia.

O le toatele o tagata o lo’u aiga na tetee i la’u miti e auauna atu i se misiona. Latou te fai mai ia te a’u o le auauna atu i se misiona, o le a na ona faatele ai le leaga mo a’u ma lo’u aiga. Ae sa ou tumau i lo’u manao. Sa ou iloa sa ou manao e auauna atu i se misiona ma o le a saunia e le Tama Faalelagi se ala.

Ina ua mavae se taimi umi o le faigaluega ma le teuina o se tupe, sa iu lava ina ou auina atu a’u pepa o le misiona. Ina ua valaau mai lo’u epikopo ia te a’u ma tau mai ia te a’u ua taunuu atu lo’u valaauga, sa ou ee ma osooso i le olioli! Sa ou alu i le taimi lava lena i le ofisa o le siteki ma aumai le tusi. I lena afiafi, sa ou tatalaina lo’u valaauga o le misiona ma faailoa atu i lo’u aiga ua valaauina a’u e auauna atu i le Misiona a Filipaina Cabanatuan.

Sa ou tagi i loimata o le fiafia i lena po. E ui lava i na mea uma na tutupu, faatasi ai ma le faatuatua ma le galue malosi ma le faalagolago i le Alii, sa ou faamaeaina mea uma na tatau ona ou faia e auauna atu ai i se misiona ma faataunuu ai la’u miti. Sa ou iloaina afai ou te le iloaina lena faigata a o lei oo i la’u misiona, semanu ou te le saunia atoatoa i le faaletino, faalelagona, faaleagaga, faalemafaufau, ma tulaga tautupe. Ae peitai ona o o’u tulaga, sa mafai ai ona ou tuputupu ae i le tele o itu.

Ou te iloa o loo i ai se fuafuaga a le Tama Faalelagi mo i tatou uma. O mea uma o loo e oo i ai atonu e le o talafeagai i nisi taimi, ma atonu o le a e manao i ni mea ia tutupu vave mai nai lo se isi taimi, ae ia faalagolago i Lana taimi ae le o oe lava. Afai tatou te faatuatua ia te Ia ma faaaoga le faatuatua ma galue malosi, o le a Ia taitaia i tatou i o tatou manaoga amiotonu i le taimi sa’o ma fesoasoani ia i tatou ia tuputupu ae i le ala (tagai i le Enosa 1:12 ma le Alema 29:4).