Atatosi o le Faatuatua
Ignatius ma Adelaide Baidoo
Accra, Ghana,
Ua vaaia e Ignatius ma Adelaide le auala ua faamanuiaina ai tagata o la latou siteki ma aiga i le polokalama o le tusitusi ma faitautusi a le Ekalesia ma le faamamafa o le faaogatotonuina i le aiga o le aoaoina o le talalelei.
Christina Smith, pue ata
Ignatius:
Sa oo ina ou aafia i le polokalama o le tusitusi ma faitautusi a le talalelei o se tagata o le au peresitene o le siteki. Sa ou asia se vasega ma iloa ai e le na o i latou e le mafai ona faitau ma tusitusi. E mo i tatou uma lava ina ia malamalama lelei atili i le talalelei a Iesu Keriso.
Adelaide:
Ou te iloa le toatele o uso o le matou uarota na fesoasoani i ai le vasega tusitusi ma faitautusi a le talalelei. Sa leai se lagona lelei o se tasi o tuafafine ia te ia lava aua sa le mafai ona faitau, tusitusi, pe fesoasoani i lana fanau i ni meaaoga. Sa ia avea le vasega ma o lea ua mafai nei ona faitau ma fesoasoani. Ua matua fiafia o ia. Soo se taimi lava ou te vaai ai ia te ia, ou te faapea lava, “E moni lava lenei talalelei. E suia ma faamanuiaina ai olaga o tagata.”
Ignatius:
O le a fesoasoani foi leSau, Mulimuli Mai ia te Au ma le faaogatotonuina o le aoaoina o le talalelei i aiga e faitau faatasi ai tusitusiga paia ma aoao mai le tasi mma le isi.
O le maa’au’au o la tatou tapuaiga o le Tusi a Mamona. O iinei i Aferika, na matou iloa lava le Tusi Paia ao tuputupu ae. Peitai, e toatele e le iloa o loo i ai i le Tusi a Mamona ni upumoni manino ma taua. A o tatou faaaogaina le Sau, Mulimuli Mai ia te Au e suesue ai le Tusi a Mamona i le polokalama o le tusitusi ma faitautusi ma i le faaogatotonuina i le aiga o le aoaoina o le talalelei , ua tatou aoao ai ma malamalama i faamatalaga uma tatou te manaomia e fesoasoani ia i tatou ia alualu ai i luma i lenei olaga.
Adelaide:
Ina ua faasilasila mai le faaogatotonuina i le aiga o le aoaoina o le talalelei i le aiga i le konafesi aoao, sa ou mafaufau i nisi o tagata o la matou uarota ma sa ou popole teisi i ai. E faapefea ona latou faia lenei mea? Sa ou mafaufau ai. Sa ou tatalo ina ia talitonu ma mulimuli tagata o le ekalesia i lenei faaaliga. Ou te iloa afai latou te mulimuli i mea na fai mai ai le perofeta, o le a fesoasoani ia i latou i o latou aiga.
I lo matou aiga, matou te taumafai ma faia mea uma matou te mafaia. E aafia ai tagata uma. Ua matua ou fiafia lava i le ala e fesoasoani ai lau fanau i le tasi ma le isi a o matou faitauina faatasi le Tusi a Mamona. E fiafia tele i latou i le Tusi a Mamona. E manaia tele lo matou taimi e faitau ai ma faasoa atu faatasi a matou molimau.
Ignatius:
Na saunoa Peresitene Russell M. Nelson, “O le faaeaga o se mataupu faaleaiga.”1 Ou te alofa i lo’u toalua ma la’u fanau. Ou te fia faatasi ma i latou ma lo tatou Tama Faalelagi e faavavau, o lea e tatau ai ona tatou fesoasoani le tasi i le isi.
Adelaide:
O tamaitai i le Aualofa o loo fesoasoani foi le tasi i le isi. Pe a matou potopoto faatasi, matou te mafaufau, “E manaomia au e lenei uso” po o le, “Ou te manaomia o ia.” Matou te nonofo faatasi o le tasi ma le isi ma fesoasoani i le isi e faitau, malamalama, ma faasoa atu mea ua matou aoaoina. O loo matou faia le mea sili matou te mafaia e mafaufau ai, “Ana o i ai le Faaola iinei, o le a le mea o le a Ia faia?”
Ignatius:
O loo i ai se vaega i le polokalama o le tusitusi ma faitautusi o le talalelei lea e fai atu ai i tagata o le vasega e tusi se ata o le mea o le a latou faia e faaleleia atili ai le aoaoina o le talalelei ma le suesueina o tusitusiga paia. O se tasi o ata na tusia ai e se tagata se aiga o loo si’osi’o se laulau ma a latou tusitusiga paia i o latou luma o loo talanoaina le talalelei. Sa faagaeetia lava au i lena mea. O le tusitusi ma faitautusi e le na o le faitau ma tusitusi. E mafai foi ona fesoasoani ni ata ia i tatou e aoao ai. E tusa lava pe tatou te manatu ua tatou iloa mea uma, e mafai lava ona tatou aoao atili e uiga i le talalelei ma faateleina ai la tatou molimau i le Alii, o Iesu Keriso.
Ua fai mai le mau e faapea o lē ua malosi e tatau ona aveina lē e vaivai ina ia mafai ai foi ona malosi o ia (tagai Mataupu Faavae ma Feagaiga 84:106). Afai e i ai nisi ua manatu ua vaivai i latou i le talalelei, e mafai ona tatou auauna atu ia i latou, taitoatasi, ma fesoasoani e faamalosia i latou. O le a aoga tele le auaunaga e fesoasoani ai e faamalosia ia tagata.
Ua faamalosia e le aoaoina o le talalelei i le aiga ia molimau a atalii o Baidoo, o Jayden ma Hubert. E masani ona la taitaia talanoaga faaleaiga o le talalelei.
O le usuina o viiga o se aiga e fesoasoani e aumaia le Agaga i afiafi faaleaiga.
O tatalo faaleaiga e le aunoa na avea ai le aiga o Baidoo o se nofoaga o le faatuatua ma le alofa.
Na aoao Ignatia e uiga i le taua o le tatalo mai ona matua ma uso.
O le fesoasoani i feau i le fale, faatasi ai ma le aoaoina o le talalelei, ua faamanuiaina ai le sootaga i le va o uso ma tuafafine i le aiga o Baidoo.
O le aoaoina o le talalelei ma le auauna atu i totonu o le aiga ua faamalosia ai le alofa e lagona e le au Baidoo mo le isi ma ua faamanuiaina ai i latou i le tele o isi auala.
O le tatalo i le va o le tane ma le ava ua fesoasoani ia Ignatius ma Adelaide e taitai ai le la fanau i auala ua aoao mai e le perofeta ma aposetolo.