Ina ua Ou Lagona le Faaseseina e uiga i le Ekalesia
Pogai na ou aluese ai. Ma le pogai na ou toe foi mai ai.
Ata na tusia e Mark Smith
I le tele o tausaga ua mavae, sa ou mulimuli ai i se talanoaga i luga o ala o faasalalauga faaagafesootai i le va o ni [alii] se toa lua sa avea ma au soa faamisiona. O nei alii sa ou alofa ma faaaloalo i ai.
Sa la talanoaina ni a la fesili sa i ai e uiga i le Ekalesia ma ona aoaoga faavae. E lei umi ae oo ina manino mai na la tuua uma le Ekalesia. Sa faateia au ma ou popole ai. Ou te lei faalogo lava i nisi o mea sa la talanoaina. Sa ou lagona e tatau ona ou iloa pe o nei mea na moni. O lea na amata ai ona ou vaai atu i finauga a i latou sa i ai ni popolega e uiga i le Ekalesia.
O nisi o mea na ou faitauina i le lua tausaga na sosoo ai na taitai atu ai au e fesiligia mea uma e uiga i le Ekalesia. O nisi e faia lenei mea e lagona le faanoanoa. Latou te faanoanoa i le aveesea o lo latou faatuatua. Sa ou ita. Sa ou lagona le faaseseina o au e le Ekalesia. Sa ou le mautinoa po o le a le mea moni po o ai foi e mafai ona ou talitonuina.
Sa faigata lava ia te au ona ou alu i le lotu. Sa ou talosaga atu ina ia faamaloloina au mai lou valaauga. Sa faapea ona faaletonu le ma va ma lou toalua, o Cheri ma lou aiga. Sa faaauau ona ou alu i le lotu, ae sa na o le vaaiga a tagata ma taumafai e faatumau faatasi lou aiga. Na gasu le olaga. Sa le mafai ona ou lagonaina le Agaga ma fesiligia pe na ou lagonaina moni ea le Agaga Paia pe leai.
Ina ua alu ese atu lou atalii matua, o Kayson, i lana misiona, sa ou fatuina se siosiomaga le lelei ae sa tatau ona avea ma se taimi fiafia. Ina ua mavae le lua tausaga, sa toatele lou aiga na iloa le mea na tupu ia te au. Ina ua latou o atu uma i le malumalu ma Kayson mo lona taimi muamua, ou te lei i ai iina.
I na mea uma, sa ou lagonaina le tuua toatasi na o au.
Lagolago Au i Mea Uma
I se tasi aso na faatasitasi ai ou uso e talanoa mai ia te au e uiga i le mea sa feagai ma au. Ou te le manatua pe o le a se mea na latou fai mai ai, ae na ou iloaina na faia i le alofa. A o matou talanoa, sa amata ona ou iloa le mea na ou misia. Na avea ma uunaiga mo suiga. O au sa tatau ona faauuina Kayson o se toeaina. O au sa tatau ona faafeaoina o ia i le malumalu. O au sa tatau ona tuuina atu ia te ia se faamanuiaga faatamā a o lei aluese. O na mea aupito sili ona taua i lona olaga na faatatau lea ia te au ia i ai iina, ae le o se isi tagata. Ou te manatua le fesili ia te au lava, “O le a la’u mea o fai?”
E lei leva, ae musuia se uo lelei e faafeiloai atu au i se tasi o lana au peresitene o le siteki. Sa faalogo ma le totoa lenei alii agalelei i lau tala ma na foliga mai na ia iloa mea o le a ou fai atu ai ae ou te lei fai atua. Sa ma talanoa mo le tele o itula. O lau tala, o au fesili, o manatu sa ou aafia ai, sa talitutusa lava ma mea na faasoa atu e isi ia te ia. Sa amata ona ou iloa o loo i ai ni tali talafeagai mo le tele o ou atugaluga ma o le tele o au fesili, ao faamaoni, sa totoina e tagata i le faamoemoe e faaleaga ai le faatuatua.
Pe na foia vave uma au fesili ma atugaluga i le taimi lava lea? Leai, e leai lava. Ae na faamaluluina lava lou loto ina ia iloa se upumoni sili: o fesili e lelei, ae o nisi fesili e sili atu ona taua nai lo isi.1 Pe mata o le lē mauaina o lou aiga ma le tu i luma o le Atua e taua mo ni nai fesili e lei taliina? Ina ua ou taulai muamua atu i fesili sa sili ona taua ma toe tuu faamuamua le Atua i lou loto, sa amata ona ou maua tali na faamautinoa mai ai ia te au o loo ou toe foi i le ala sao.
Sa aapa mai foi lou peresitene o le siteki ma le epikopo ia te au. Sa avea i latou ma fesoasoani tele ia maua ma Cheri i le aluga o nisi o taimi pogisa. Latou te lei faavaivai lava. O i latou ma lou aiga i itu uma e lua o le veli sa saofagā i le fesoasoani ia te au. Ou te iloa e silafia ma alofa le Tama Faalelagi ia i tatou. Na te tuu tagata i lo tatou ala pe a tatou manaomia i latou. Pau lava le mea tatou te manaomia o le naunau e talia la latou fesoasoani.
O le Mea e Fai pe Afai o Oe
Ou te iloa e i ai isi iina atonu o loo feagai ma se mea faapena. Atonu o oe po o se tasi e te iloa.
Ou te iloa na faavaeina e le Faaola Lana Ekalesia i le pule e tuuina atu ai sauniga ma feagaiga tatou te manaomia e toe foi atu ia te Ia. O loo galue faasoloatoa Satani e faaleaga le Ekalesia a le Alii i le faaaogaina o soo se auala e mafai ai. O faia o fesili ma le fatuina o masalosaloga e faigofie. O pau atu i ana mailei e mafai ona tupu i soo se tasi. O le faalagolago i faamatalaga ma tali e tuuina mai e isi e mafai ona sili atu ona faigofie nai lo le faia o le galuega o le sailia o upumoni mo i tatou lava “e ala lava lea i le suesue ma le faatuatua foi” (Mataupu Faavae ma Feagaiga 88:118; ua faaopoopo le faamamafa). Ae o le iuga, o le mea lena e manaomia e le Atua.
Afai o loo e tauivi ma ni fesili po o masalosaloga e uiga i le Ekalesia po o lou faatuatua, e te le mauaina le upumoni e ala i le faitauina o se poloka po o le faalogologo i faasalalauga mai ia i latou e tetee i le Ekalesia pe ua o ese. Ae atonu foi o le a le faamalieina oe i ni tali papau, ma atonu e te le manao i le fautuaga e “faatali mo se tali mulimuli ane.”
Sa ou aoaoina e le mafai ona tatou ola i taimi uma i se malamalama nonō, ae nai lo lena e tatau ona tatou liliu atu i le Atua o le puna o le malamalama uma ma le upumoni (tagai i le Mataupu Faavae ma Feagaiga 93:26). E ao ina tatou suesue i ai i o tatou lava mafaufau, ae e tatau foi ona tatou ole atu i le Atua pe ua sa’o le mea ua tatou mafaufau i ai (tagai Mataupu Faavae ma Feagaiga 9:8). E tatau ona tatou aoao mo i tatou lava e pei ona faia e Iosefa Samita (tagai i le Iosefa Samita—talafaasolopito 1:20) ma ia onosai i la tatou sailiiliga (tagai i le Alema 32:41). Ae o le aoao e ala i le faatuatua o lona uiga e tatau ona tatou faamaonia le upumoni e ala i le ola ai (tagai i le Ioane 7:17; 1 Tesalonia 5:21).
A o ou suesue i mea sa tetee i le Ekalesia, sa ou lagonaina na pei o loo ou i ai moni i puao o le pogisa (tagai i le 1 Nifae 8:23–24; 12:17). Ina ua ou uumau i le afioga a le Atua ma laa atu i le laasaga muamua e agai atu ia te Ia, na pau lava lena o le mea sa Ia manaomia e auina mai ai Lona Agaga e pai mai i lou loto.
Pe ua Lava le Faamoemoe?
I ni nai vaiaso talu ona alu Kayson i lana misiona, na asiasi mai lau peresitene o le siteki ia te au. Sa ou faailoa ia te ia le mea na tupu i na vaiaso ina ua uma ona talanoa mai ou uso ia te au. Sa ou fai atu ou te fia mauaina se pepa faataga fou o le malumalu. Sa fesili mai pe mafai ona ou taliina lelei ia fesili o le pepa faataga. Sa ou tautino atu, “Peresitene, ou te manatu e le mafai nei ona ou fai atu ou te iloa e moni le Ekalesia, ae ou te mautinoa ma le faamoemoe ma lou loto atoa e moni. Ma o le a ou ola i lou olaga e tusa ai ma lena faamoemoe. Pe ua Lava Lena?
Sa malolo o ia mo se taimi ona faapea mai lea, “Travis, o le a lava lena i taimi uma lava.”
O loo i ai lava nisi o mea o loo ou faatalitali pea e malamalama i ai, ae o nisi mea ua matua manino lelei lava ia te au. Ou te iloa e alofa lou Tama Faalelagi ia te au. Ou te iloa atonu tatou te feseseai ma tauivi mo se taimi. Ae ou te iloa e ala mai ia Keriso, Lana Togiola, ma le faamoemoe na te aumaia, e mafai lava ona tatou toe foi i le ala e toe foi atu ai ia te Ia.
E alala le tusitala i Iuta, ISA.