O Le Auala o loo Ou Sauniuni ai mo se Malumalu i Initia

I le ola ae ai i Initia, o a’u ma lo’u aiga o tagata Hindu. Sa siomia pea au e le talitonuga e faapea sa toatele atua e tapuai i ai. A o ou talavou, sa i ai foi au uo o ni Kerisiano. Sa latou tau mai ia te au e toatasi le Atua na foafoaina le lalolagi ma tagata uma. Sa amata ona ou mafaufau pe aisea na ou tapuai ai i le toatele o atua, ae na o le tasi lava le atua na talitonu ai isi.

Ina ua ou i ai i le aoga maualuga, sa ou oo ai i ni mausa le lelei. Sa malosi la’u inu, sa ou le mafaufau, ma sa le fiafia lou aiga i au amioga. O lea na ou me’i ai ma amataina se olaga fou i Hyderabad, o se aai e tele avanoa e faigaluega ai.

Sa amata ona ou faanoanoa ma tuuatoatasi ona o lou olaga. Ae i se tasi aso na ou tau ai i ni alii se toalua. Sa la faamalamalama mai o i la’ua o ni faifeautalai mai Le Ekalesia a Iesu Keriso o le Au Paia o Aso e Gata Ai ma ta’u mai ia te au e uiga i le talalelei a Iesu Keriso. Ma sa ou toe aoao foi e uiga i le na’o le tasi o le Atua, o le na foafoaina se fuafuaga o le fiafia mo Ana fanau uma. O le la sāvali na vave lava ona faatumulia ai au i le fiafia ma le faamoemoe. Sa ou manao e iloa atili.

Ua fitu nei tausaga talu ona avea au ma se tagata o le Ekalesia. Ua ou sui, ua ou molimauina ni vavega i lou olaga, ma ua tele mea ua ou aoaoina e uiga i le talalelei. Ou te fiafia i le olioli ua ia aumaia ia te au. Ae o loo i ai se isi vaega taua o le talalelei ou te lei oo i ai — le malumalu.

Mai le taimi na ou aoao muamua ai e uiga i le malumalu, sa ou fia alu ai iina e aoao ma lagona le Agaga, ia faamauina mo le faavavau i lou aiga, ma osia feagaiga ma le Alii. Ae e leai ni malumalu i Initia, ma ou te lei maua le avanoa e malaga ai i se isi taimi. O a’u faatasi ai ma le toatele o Au Paia o Aso e Gata Ai i Initia sa faia ni tatalo le mafaitaulia, sa matou anapopogi, ma sa matou taofimau i le onosai ma le faatuatua ma o le a i ai se aso o le a fausia ai se malumalu i Initia.

I le taimi o le konafesi aoao o Aperila 2018, na tali mai ai le Atua i a matou tatalo, a o fofogaina e Peresitene Russell M. Nelson o le a fausia se malumalu i Bengaluru, Initia. O le a le galo ia te au lena aso. Sa faatumulia lou loto i le Agaga i le fiafia ma le maligi o ou loimata i upu a le perofeta. Sa vave ona ou faafetai atu i le Tama Faalelagi mo le taliina o a matou tatalo. Ua ou fiafia lava o le a ou vaai ma ulu atu i le malumalu i ni nai tausaga.

Ua ou matua fiafia ma mitamita i le avea ai ma se tagata o le Ekalesia a Iesu Keriso. Ou te iloa na toefuatai mai e le Alii le talalelei moni i luga o lenei fogaeleele e ala mai i le Perofeta o Iosefa Samita. Ou te iloa o le malumalu o loo i ai i le mea e mafai ona tatou ola latalata atili atu ai i le Atua, faamauina i o tatou aiga, ma aoao atili ai e uiga i lo tatou faamoemoega. Ma a o ou faatali mo le malumalu o le a fausia iinei i Initia, o loo ou galue malosi e saunia au lava e ulu atu i ai.

• O loo ou tatalo ma aoao i le tele ou te mafaia e uiga i le malumalu, feagaiga o le a ou osia, ma sauniga o le a ou mauaina iina.

• Ou te fesili atu i isi tagata o le Ekalesia ua leva ona i ai i le malumalu mo fautuaga i auala e saunia ai faaleagaga.

• O lea ou te aoao i le faiga o le galuega o talafaasolopito o aiga ina ia mafai ona ou aumaia igoa o ou tuaa i le malumalu.

• O loo ou auai i se vasega e sauniuni ai mo le malumalu.

Ou te fia saunia mo le aso e mafai ona ou ulufale atu ai i le malumalu ma avea o se mea e faamuamua i lou olaga. O le a ou taumafai ia agavaa i taimi uma e ulu atu ina ia mafai ona ou maua faamanuiaga ua folafola mai, faatonuga, ma tali i au tatalo sa ou faatalitali ai mo se taimi umi. Ua le mafai ona ou faatali mo lena aso.