Ua Latou Tuuese o Latou Tofotofoga

Ata

people at the door

Tatou te oo uma i ni taimi lelei ma leaga i le olaga, ae o le 2013 o se tausaga sili ona faigata mo lo matou aiga. Sa matou oo i le tele o mea sa lei faamoemoeina ma taugata o le lipeaina o le fale ma taavale. O lou toalua, o Ryan, na lei toe i ai sana galuega, ma o le ma atalii laitiiti na fanau mai ma ni faafitauli ma na tatau ai ona faaalu ni nai vaiaso i le potu tigaina o pepe fou. Sa ou tauivi foi ma le atuatuvale o se tina failele. O nei tulaga, tuufaatasi ai ma le avea o ni matua o se fanau laiti e toafa, na matou pagatia ai i mea tautupe ma faalelagona.

Sa maua e Ryan se galuega fou, ae sa umi ni itula faigaluega ma sa alu ese atu ma le taulaga mo ni vaiaso i isi taimi. Na amata ona popole tele lo ma atalii e lima tausaga le matua o Uesele, i le alu ese soo o lona tama. Sa ala soo o ia i le po mai miti taufaafefe.

Sa lagolagoina au e lo matou aiga lautele pe a latou mafaia, ae sa ou lagona pea le vaivai ma le tuuatoatasi i le tele o le taimi. Sa ou iloa e alofa ma e silafia e le Tama Faalelagi lou aiga, ae sa ou lagonaina na pei ua matou malelemo.

I se tasi o aoauli, a o i ai Ryan i fafo atu o le aai mo galuega, sa ou aveina atu lau fanau mai le aoga ma tatalo faatauanau mo se fesoasoani. I se taimi mulimuli ane i lena po, na tuitui mai ai Kendra lou tuaoi i lo matou faitotoa. Sa ia iloaina lo matou tulaga ma fesili mai pe o faapefea mai au. Sa leai sou faamoemoe e faitio ia te ia, ma o ia foi le tagata mulimuli sa ono mafai ona ou fesili atu i ai mo se fesoasoani. O lona toalua o Brent, sa tauivi ma le kanesa mo le fa nei tausaga.

Sa ou tau atu ia Kendra o loo lelei a au, ae sa toe fesili mai ma le faamaoni. I loimata, sa ou talanoa atu ia te ia e uiga i ou tauiviga. Ina ua ou tau atu ia te ia e uiga i le atuatuvale ma miti taufaafefe a Uesele, sa ia fesili mai pe ou te manao ia Brent na te faia se faamanuiaga o Uesele.

O se taimi mulimuli ane, na oo mai ai Kendra, Brent, ma lo la atalii matua, o Tyson, i lo matou faitotoa o loo laei i ofu lotu. Sa vaivai Brent. Ou te mautinoa na alu atoa lona malosi sa i ai e sau ai i lo matou fale. Sa ia tuuina atu ia Uesele se faamanuiaga, ma sa tuuina mai e Tyson sou faamanuiaga.

O lena aso, o Kendra, Brent, ma Tyson o ni faataitaiga moni o auaunaga faaKeriso. Ua latou faataatia ese o latou lava tofotofoga ina ia ofoina mai ma le faamaoni le alofa ma le agalelei ia i matou. Sa ou lagonaina le faamanuiaina ona sa tali mai e le Tama Faalelagi lau tatalo i lenei auala faamomoiloto. Na maliu Brent i le lua vaiaso mulimuli ane.

I lena aso i lo matou aiga, na tu ai Brent o se molimau a le Atua e ala i le faaaogaina ma le amiotonu o le perisitua (tagai Mosaea 18:9). Ia te au, e paia lana auaunaga i lo matou aiga o se tasi lea o ana galuega mulimuli i le fogaeleele.