Ata

woman talking with missionaries

Ata na tusia e Toby Newsome

I se tasi aso a o faia le galuega faafaifeautalai i magaala pefu o Kenya, sa ma talanoa atu ma lau soa i se tamaitai. Sa ia taliaina le tamaitusi sa ma tuuina atu ia te ia ae sa fai mai e aua le toe foi mai.

I ni nai aso mulimuli ane sa ma oo atu ai i lena lava auala e tasi, ma sa ma maua se uunaiga e tulitatao atu ia te ia. Sa ou fesili ifo ia te au lava, “Aisea o le a ma toe foi ai i tua ae ua ia fai mai e aua nei toe foi mai?” Ae sa ma usiusitai i le uunaiga.

Sa te’i o ia ina ua ma taunuu iina ae sa fai mai sa fiafia o ia ua vaai mai ia i maua. Sa amata ona ma aoao atu se lesona, ae e lei umi ae liua i se finauga. Sa ma tapunia ma lau soa le lesona i se tatalo ma o ese atu, ma vave lava ona ioeina e le toe foi mai. Ae o le aso lava na sosoo ai, na ma toe maua ai se uunaiga malosi e toe foi atu. Ou te lei toe fia foi, ae na fai mai lau soa e tatau ona ma faalogo i le Agaga. O lea na ou puleaina ai lo’u faamaualuga, ma ma toe foi atu. Ina ua ma taunuu iina, sa faateia a’u. Na foliga mai le tamaitai o se tagata ese. Na suia ona foliga, ma sa naunau o ia e faalogo i mea sa ma fai atu ai. I le taimi o le isi a ma asiasiga, sa ia fesili mai po o afea e mafai ai ona papatiso o ia.

O le fa vaiaso mulimuli ane, na papatiso ai o ia o se tagata O Le Ekalesia a Iesu Keriso o le Au Paia o Aso e Gata Ai. Ina ua maea lona faamauga, sa ia opoina i maua ma fai mai sa matua faafetai lava o ia ona na ma toe foi mai. Ua ou aoaoina e tatau ona tatou faalogo atu e le aunoa ma faatino i luga o uunaiga. E saunia e le Tama Faalelagi Ana fanau e talia le talalelei, ma Na te faaaogaina uma i tatou ina ia maua i latou e ala i le Agaga Paia.

Ata

woman getting baptized

Ina ua tusa ma le lima tausaga o lou matua, sa leai se faatuatua o lo’u tama ma filifili ai e tuua le Ekalesia. Sa matuai faigata lava, ae maise lava ina ua atoa lou valu tausaga. Sa ou matuai fiafia lava e papatiso, ae na fai mai lou tama leai. Sa manao o ia ou te faatali seia ou matua ina ia ou iloa lelei lava sa ou manao e tuuto atu. Ma o lea sa ou matamata ai a o papatiso au uo.

Ou te manatua lo’u le mautonu—afai e moni le Ekalesia, aisea ua taofia ai au mai le papatisoina? I le avea ai o se tagata talavou, sa ese le faigata o le vaaia o le autalavou ua o atu uma i le malumalu ona sa ou matuai fia alu lava. Sa faigata ona le mafai ona auai, ae sa ou iloa lava o le a maua sou avanoa!

Ia Me 2019, na iu lava ina ou papatiso i le 16 o ou tausaga. Sa ou manatuaina le mau aafiaga e tele sa ou lagonaina ai le olioli mamā o le talalelei ma le mauaina o se molimau. O se aafiaga faapitoa lava, ma e ala i faafitauli uma sa ou maua seia oo atu i lena aso, sa ou iloa ai ma lou loto atoa e moni le talalelei ma o loo moni pea i taimi uma.

Ata

classroom

Sa ou fiafia lava ou te alu i le konafesi a le autalavou, ae sa ou iloaina sa tele ni tulafono—mo se faataitaiga, leai ni telefoni feaveai ma e leai se alu toatasi i fafo. Sa foliga mai sa vaavaaia pea i taimi uma i matou e tagata matutua. Ae sa ou maua se taimi sili, tele ni uo na maua, galue i se galuega auauna atu, ma aoao e uiga i le talalelei.

I le taimi o se sauniga molimau i le aso mulimuli o le konafesi a le autalavou, sa talanoa ai se tasi o taitai e uiga i le tele o lona alofa ia i matou, le autalavou i le siteki.

Afai tou te alolofa ia i matou, aisea ua tele naunau ai nei papupuni iinei? Sa ou mafaufau ai. I lena lava taimi, e pei sa mafai ona ia faitauina lou mafaufau, sa ia taliina lau fesili.

Sa faatulaga e taitai ia tulafono, sa ia fai mai ai, e le ina ia faaita ai i matou ae mo lo matou saogalemu. O le taimi na ia fai mai ai lena mea, sa ootia au i le Agaga. Sa ou malamalama e tuuina mai e le Tama Faalelagi ia i tatou poloaiga mo le mafuaaga lava e tasi. E le ina ia faaita i tatou; e tatau ona latou fesoasoani ia i tatou e toe foi atu ma le saogalemu ia te Ia (tagai i le Mataupu Faavae ma Feagaiga 82:2–9).

Sa pai mai le Agaga Paia ia te au ma fesoasoani mai ia te au ia ou iloa e moni lenei mea.