O Le Filifiliga a Lila
E alala le tusitala i Corrientes, Atenitina.
“Ia tuu mai e le Alii se malumalu” (Tusipese a Tamaiti, 73).
Sa manao Lila e filifili le mea sa’o.
“O le taimi o tusitusiga paia!” Na fai mai ai Lila.
Sa fiafia Lila e faitau i lona uso laitiiti o Ánika, ma lona tuagane pepe, o Svetan. E le o toe mamao ae papatiso Lila! Ina ia saunia, sa manao o ia e faitau tusitusiga paia i aso uma.
Na tatala e Lila le tusitala o tusitusiga paia i le itulau muamua. Sa faapupuu faatasi Ánika ma Svetan ina ia mafai ona la vaai i ata.
“Faalogo lelei aua o le a ou fesili atu ia te oulua ni fesili pea uma,” o le tala lea a Lila. Ona amata lea ona ia faitauina le mataupu muamua.
“Ae tatou te lei fananau mai, sa tatou nonofo i le lagi,” sa faitau ai Lila. “Sa leai ni o tatou tino i lena taimi. Sa na o ni agaga i tatou.”
Sa tilotilo atu Lila, Ánika, ma Svetan i ata o tagata o loo laei papae.
“Ua saunia mo la oulua fesili muamua?” Na liliu atu Lila i a Ánika. “O fea na e sau ai ae e te lei fanau mai?”
Sa pati e Ánika ona lima. “Lagi!”
“E sao lena,” na fai atu ai Lila. “Ao fea sa sau mai ai Svetan?”
“Na sau foi o ia mai le lagi,” o le tala lea a Ánika. Sa ataata Svetan ma tuu lana moto i lona gutu. Na taliē Lila ma Ánika. O Svetan o le [tamaitiiti] tasi le tausaga le matua e aupito sili ona aulelei i Atenitina!
“O le tatou aiga atoa na o mai le lagi,” o le tala lea a Lila. “Faapena foi Iesu. Na afio mai o Ia e fesoasoani ia i tatou ina ia mafai ona tatou toe nonofo faatasi ma Tama Faalelagi.” Na tusi atu Lila i le ata o Iesu i luga o le itulau.
Ina ua uma ona ia faitau, sa mafaufau pea Lila pe mata sa faapeī le nonofo faatasi ai ma Iesu i le lagi. Sa ia manao e avea e pei o Ia. Sa ia manao e filifili i taimi uma le mea tonu!
O le aso na sosoo ai i le aoga, sa gogolo mai le manava o Lila ao faatalitali o ia i le laina mo le meaai o le taeao. Na toetoe lava a ia tofo i le empanadas [pai aano manufasi] a o tuu mai e Señora Ruiz i luga o lana ipu. E ese le manogi manaia!
Ona ligi mai lea e Señora Ruiz mo Lila se ipu susu. Oi aue, o le manatu lea a Lila. Sa foliga paauli mai le susu nai lo le mea masani. O nisi taimi e faaopoopo ai e lana aoga le kofe po o le lauti i meainu.
“O i ai ea se kofe po o se lauti i le susu o le aso?” Sa fesili atu ai Lila.
Sa talotalo atu le lima o Señora Ruiz. “O sina kofe laitiiti,” o lana tala lea. “O le a e le tofo lava i ai.”
Sa mafaufau Lila mo sina taimi. Sa ia manatua lona manao ia faapei o Iesu ma filifili le mea tonu. Sa ia iloaina o le inu kofe o se mea na saunoa mai perofeta e aua le faia.
“Leai, faafetai. O le a leai sa’u susu nei,” o le tala lea a Lila. Sa ia ataata atu ia Señora Ruiz. Ona ia saofai lea i lalo e ai.
O lena po, sa fesoasoani ai Lila ia Papa e fufulu ipu i le umukuka. Sa mafaufau lava o ia e uiga i le tala faatusi paia. Sa mafaufau foi o ia i le susu.
“Papa?”
“Ia?” Na fai mai ai Papa.
“Aisea na finagalo ai le Tama Faalelagi tatou te maua ni tino?”
Sa mafaufau Papa a o ia vaimamaina se isi ipu. “Ia, ua ia tuuina mai ia i tatou ni tino ina ia mafai ai ona avea i tatou e faapei o Ia,” o lana tala lea. “O lou tino o le fale mo lou agaga. O le uiga lena pe a tatou faapea atu o o tatou tino o malumalu.”
Sa luelue le ulu o Lila. Sa ia usuina se pese e uiga i lena mea i le Peraimeri i nisi o taimi! “O le mea la lena e finagalo ai le Tama Faalelagi ia tatou tausia lelei o tatou tino?”
“Na tonu lava!” na fai atu ai Papa.
“O ananei i le aoga, sa latou tuu ai se kofe i le susu,” o le tala lea a Lila. “E ui lava i lea, ou te lei inua. O lea ou te taumafai e tausia lo’u malumalu.”
“Ua ou mitamita lava ia oe,” na fai atu ai Papa. Sa ia soloina ona lima i se solo ma opo mai Lila.
Sa fusi mau e Lila ia Papa. Sa fiafia o ia e tausia le tino na tuuina mai e le Tama Faalelagi ia te ia.