O Oe E Alofa, O Ia E Laveai
E alala le tusitala i Iuta, ISA.
Sa ma tatalo ina ia suia loto o la ma fanau. Ona oo mai ai lea o se iloa le lagolelei (ma le faasaolotoga).
Sa ma tausia ma lou toalua le ma fanau i le talalelei. Sa faia a matou suesuega faaleaiga i tusitusiga paia i taeao uma, tatalo faaleaiga, ma afiafi faaleaiga i vaiaso taitasi. Sa matou auai i le lotu, aai faatasi i le afiafi, ma matou o i tafaoga faaleaiga. Sa auai e le aunoa le ma fanau i le malumalu e faataunuu papatisoga mo e ua maliliu, sa latou faauu mai le seminare, ma e toalua i latou na faamisiona.
Ma i le avea ai ma tagata matutua, sa amata ona latou sailiili i auala ma manatu na ese mai mea na ma aoaoina ai i latou. Sa taitoatasi, ona le toe auai le ma fanau i le Ekalesia seia oo ina na o le toatasi o le ma fanau e toalima na filifili pea e auai. Sa tele ni loimata sa ma faamaligiina i le ma fanau ma mafaufau ai pe na ma toilalo i le avea ai o ni matua, pe sa i ai se mea sa tatau ona ese le ala ma te faia ai.
Mo se taimi umi, sa ma aioi atu ai i le Alii ina ia sui o latou loto, ma iu ina tali mai le Alii i a ma tatalo. Ae e le o le ala na ma mafaufauina.
Nai lo le na o le suia o loto o le ma fanau, na Ia faaali mai ia i maua e manaomia ona ma amata i le suia o o maua lava loto. A o faia e matua se matafaioi taua i le aoaoina o a latou fanau, sa Ia faamanatu mai ia i maua o Iesu Keriso o lo latou Faaola ma le Faamasino.
I lou naunautaiga e laveai lau fanau, sa ou faaaluina ai le tele o itula e tatalo ai, faitau au tusitusiga paia, ma alu i le malumalu, ma mafaufau faapea afai ou te faia mea sao uma, o le a ou agavaa mo le fesoasoani a le Atua—e pei o au taga o le a taitai atu ai le Atua e pulea lo latou faitalia ma faamalosia i latou e talitonu e pei ona ou faia.
Sa ma matuai mananao lava ma lou toalua e laveai i latou, ae o le ma vaega o le laveai sa pei e tele lava o le lauga, otegia, po o le faaalia o le lē fiafia i a latou filifiliga, lea na iu lava i finauga. Sa ma iloaina o lo ma naunautai e toe aumai le ma fanau, sa ma tuliesea moni ai lava i latou. O le tele o lo latou lagonaina o le ma faamasinoga ma le lē fiafia, o le tele foi lena o lo latou aloese mai ia i maua.
Na suia au tatalo i se aioiga mo lou lava loto ina ia suia. Na ou iloaina o au mafuaaga mo le manao ia suia lau fanau na sau mai le nofoaga sese. Sa ou tatalo mo le alofa faateleina. Sa ou tatalo foi ina ia ou faatoilaloina ou lagona o le maasiasi ma le mā ona sa lei foliga lou aiga e pei o aiga atoatoa na faaalia e au uo i luga o faasalalauga faaagafesootai faatasi ai ma ata o faaipoipoga i le malumalu a o latou fanau po o papatisoga a fanau a a latou fanau.
A o ou liliu atu i le Faaola mo le faamalologa, sa amata ona faamaluluina lou loto i lau fanau. Sa ou iloaina o le alofa ia i latou e pei ona Ia alofa ia i latou, o lona uiga o le faia o ni suiga. Ia te Ia, o le alofa sa le o se auala—sa o le faaosofiaga lea na faamalosia ai mea uma na Ia faia. Na Ia fetalai Na te lei faia: “se mea vagana ai ua mo le manuia o le lalolagi; ona uaalofa o ia i le lalolagi” (2 Nifae 26:24).
O le faalagolago i le gafatia o le Faaola e fai Lana galuega (tagai i le 2 Nifae 27:20) na mafai ai ona ou taulai atu i le alofa i lau fanau ma tuu atu le laveaiga i le Alii. E le faapea o le le toe taumafai e fesoasoani ia i latou, a o le alofa ia i latou na avea ma malosiaga i tua atu o au fegalegaleaiga ma i latou, na suia ai le ala na ou fesootai ai.
Sa amata ona ou vaai ia i latou i se malamalama e ese mai. Sa amata ona ou taulai atu i o latou malosiaga ma taleni ma amata ona vaaia i latou o ni tagata agaalofa, agalelei, atamamai, ma lelei.
Sa faateleina le ma faalogo ma lou toalua ae itiiti le tautala. Sa ma fesili atu i o latou olaga ma mea latou te fiafia i ai. Nai lo le faamasinoina, sa ma faaalia le fia iloa. Sa ma suia faitioga ma le le fiafia i le faaalia o le alofa, ma sa mafai e le ma fanau ona lagona le moni.
Sa avea lo matou fale o se nofoaga e mafai ona latou lagona ai le alofa ma le taliaina. Sa latou le toe nanaina mea mai ia i maua ma amata ona faamaoni ma talanoa sao mai i mea o loo tutupu i o latou olaga. Sa sili atu lo matou vavalalata.
O loo avea pea lo matou aiga ma se galuega o loo faagasolo, ae ua fiafia le ma fanau e o mai i lo matou fale ma faaalu nei le taimi ma i maua. Latou te lagonaina le saogalemu i o ma luma, ma e ala i lo ma alofa, ou te faamoemoe e mafai ai ona latou lagonaina le alofa o le Atua mo i latou. Ou te le iloa pe o le olaga lenei o le a latou toe foi mai ai i mea sa aoaoina ai i latou o ni fanau, ae ou te iloa o loo i ai i latou i aao o le Faaola.