O Le Valaauga Faateia o le Misiona

Ata

The Surprise Mission Call

Sa ataata Edwin Dharmaraju a o savali mai i fafo o le malae vaalele ma agai atu i le la susulu. Sa mafai ona ia vaai atu i niu o laina i le alatele ma le manogi o faamanogi meaai mai se maketi lata ane. Na toe foi atu i laua ma lona faletua o Elsie, i Initia! Sa latou nonofo i Samoa, ae o lenei ua toe foi mai i le aiga.

Ae ui i lea, o Edwin ma Elsie e le o iinei mo na o se asiasiga. Ua valaauina i laua e auauna atu o ni faifeautalai mo Le Ekalesia a Iesu Keriso o le Au Paia o Aso e Gata Ai. Sa lagona se popole laitiiti o Edwin. Ae sa ia iloa o le a fesoasoani le Tama Faalelagi ia i laua. Ua anoanoai ni mea na fesoasoani ai le Tama Faalelagi ia i laua.

Na fananau Edwin ma Elsie i Initia. Ae sa faalogo muamua Edwin e uiga i le Ekalesia a o aoga i le Iunaite Setete. E tasi le taimi na alu ai o ia i le lotu iina. Sa ia faitauina foi le Tusi a Mamona. Ae ina ua toe foi atu o ia i Initia, na galo ia te ia le Ekalesia.

I ni nai tausaga mulimuli ane, na lagona e Edwin ma Elsie e pei ua tatau ona la siitia atu i Samoa. O Edwin o se saienitisi o siama, ma sa ia maua se galuega i le motu e fai ai ana suesuega. O iina na feiloai ai Edwin ma Elsie i faifeautalai. Ina ua toe faitau e Edwin le Tusi a Mamona, sa ia lagonaina se mea faapitoa. Na faitau foi e Elsie le Tusi a Mamona. Sa la filifili e papatiso, faatasi ma o la atalii ma afafine.

Ina ua auai i le Ekalesia, o le mea sa sili ona manao ai Edwin, o lona aiga i Initia aoao e uiga i le talalelei. O le faafitauli o le leai o ni faifeautalai i Initia e aoaoina i latou! Sa tusia e Edwin ma Elsie se tusi i le laumua o le Ekalesia ma talosagaina i latou e auina atu ni faifeautalai i Initia.

O le mea na sosoo ai sa o se mea na tetei tele ai. Na valaauina i laua e Peresitene Spencer W. Kimball e auauna atu o ni faifeautalai i Initia!

Ma o lenei, ua iinei i laua.

O le la malologa muamua i Initia o le fale o le uso o Edwin. Na i ai foi iina matua o Edwin ma nai ou tei. I le taimi lava lena, sa amata ai ona aoaoina i latou e Edwin ma Elsie. Sa fiafia lo latou aiga e aoao e uiga i le talalelei.

I ni nai vaiaso mulimuli ane, sa faapotopoto faataamilo ai Edwin ma lona aiga i le vaitaele i le fanua o lona uso. Sa faamamaina, vali, ma faatumu le vaitaele i le vai fou. Sa ofu papae tagata uma. Sa laeiina e tamaitai ni sari totoso sa tautau mai i o latou tauau. Sa laeiina e alii ni peleue ma ni ofuvae ‘ō’ō faaInitia.

Sa tutū Edwin i le vaitaele ma lona tamā. “Samuelu Tavita,” na fai atu ai Edwin, “Ona ua tofia a’u e Iesu Keriso, ou te papatiso ia te oe i le suafa o le Tamā, ma le Alo, ma le Agaga Paia.”

Sa lagona e Edwin le fiafia a o ia papatisoina lona tamā. Sa ia lagonaina le fiafia sili atu ina ua sosoo ai ma lona papatisoina o lona tina. E oo ane i le faaiuga o le aso, ua 18 tagata na papatisoina e Edwin!

O le aso na sosoo ai, sa tietie atu ai Edwin ma Elsie i se nofoaafi mo le ono itula. Sa la asiasi atili atu i isi tagata o le aiga ma aoao i latou e uiga i le talalelei. Sa papatisoina e Edwin le isi toafa o tagata o lona aiga i se vaitafe lata ane.

Mulimuli lava, na tietie atu ai Edwin ma Elsie i le nofoaafi mo le 16-itula e asiasi i matua o Elsie. O le tamā o Elsie sa o se taitai i se isi ekalesia. E lei papatisoina o ia, ae sa ia manatu o le Tusi a Mamona o se tusi lelei. Sa ia fesoasoani e faaliliu le Tusi a Mamona i le gagana Telugu, o se tasi o gagana o loo tautatala ai tagata i Initia.

Ina ua maea le misiona a Edwin ma Elsie, sa lava tagata fou o le au paia e amata ai se tasi o uluai paranesi o le Ekalesia i Initia! Sa fiafia Edwin ma Elsie ina ua la toe foi i Samoa. Sa la faafetai na auina atu i laua e le Tama Faalelagi i se misiona! ●