Auaunaga e ala i Gaoioiga a le Ekalesia

Na oo mai le taumalulu, ma sa le iloa e Tavita Tikisone pe o le a faapefea ona faamafanafana lona aiga.

E lei leva ona siitia atu Tavita, lana avā, ma lana fanau teine e toalua i le aai maotua o Fredonia, Arisona, ISA, o se laufanua toafa maualuga sa siomia e ni tofē tetele lanumumu, ni togavao, ma laufanua lanulauvao.

O le fale na mautotogi ai le au Tikisone sa faalagolago i se ogaumu e tafu i fafie e avea ma puna o lona vevela autu. Na vave ona aoaoina e Tavita faapea o le faapotopotoina o fafie o se tomai talafeagai aua o taumalulu i Fredonia e tumu i le kiona ma le aisa.

“Ou te lei mauaina se fafie po o se ili tipi laau po o se malamalama i le auala e faaaoga ai!” Ua fai mai ai Tavita. Ou te le’i iloa po o le a la’u mea o le a fai.”

Sa fesili nisi o tagata o le uarota ia Tavita pe na lava ni fafie a lona aiga mo le taumalulu. “E lei umi se taimi ae latou iloa na leai ni au fafie,” o le tala lea a Tavita. “Na vave lava ae ofo mai le korama a toeaina e fesoasoani ia te au e ao mai ni fafie. I le lofituina i le agaga faafetai, sa ou taliaina la latou ofo.”

E lei umi ae iloa e Tavita o lenei malaga e faaputu fafie o se mea masani a le toatele o tagata na fuafuaina lelei, e faatulagaina lelei, ma o ni gaoioiga e fiafia i ai le uarota. I le taeao o se tasi Aso Toonai, na agai atu ai Tavita, le korama a toeaina, ma isi tagata o le uarota i atumauga i se solo o loli ma taavale toso.

“I se aoauli se tasi, faafetai ia latou meafaigaluega ma le iloa ona faaaoga, na saunia ai e tagata o le uarota se faaputuga fafie mo lou aiga lea na matou faaaogaina i le sili atu ma le lua taumalulu lelei lava,” o le tala lea a Tavita. “O le mea e sili atu ona taua, sa aoaoina au i mea uma sa manaomia ona ou iloa e uiga i le aoina mai o fafie e au lava ia. E oo atu i le taimi na ou tuua ai Fredonia, ua ou iloa le auala e taulima ai se ili tipi laau, ma sa ou fesoasoani i isi gaoioiga e faaputu mai fafie a le uarota i le tele o taimi e le mafai ona ou faitauina.”

O na gaoioiga faaleuarota e le gata ina fausia ai ni mafutaga lelei i tagata o le Ekalesia, ae na fausia foi ni sootaga lelei ma tagata uma o le nuu.

“Ou te manatua se tasi tamaitai, e le auai i le Ekalesia, e fou mai i le eria,” o le tala lea a Tavita. “Na iu ina faaaoga puipui mai lona fale e faamafanafana ai lona aiga. O le taimi lava na matou iloa ai lona tulaga pagatia, na matou faamautinoa ua lava ana fafie mo le taumalulu atoa. Sa matuai faafetai o ia ma sa tau le mafai ona tautala.”

O taumafaiga e auauna atu i Fredonia na faamautinoa ai sa tumau le saogalemu o tagata uma ma mafanafana i le taumalulu atoa.

A o auauna ai i se misiona i Romania, sa asiasi soo atu Meki Yost ma lana soa i se aiga ua leva e lei toe auai i le lotu. “O le au Stanica o nisi ia o uluai tagata o le Ekalesia i Romania,” o le tala lea a Meki, “ma sa matou alolofa ia i latou.”

Ina ua oo mai le taimi e fuafua ma faatulaga ai se gaoioiga a le paranesi, sa tonu i taitai o le a faia e le paranesi se “Po o Paionia.” O se afiafi e faamanatuina ai paionia lototetele o e na sopoia le Iunaite Setete ina ia oo atu i le Vanu o Sate Leki. O le a avea foi o se avanoa e faamamaluina ai paionia o le Ekalesia i Romania.

“Sa ma manatu o se auala sili lea mo nisi o tagata e molimau atu ai i lo latou liua ma le auala ua latou vaaia ai le ola o le Ekalesia i Romania,” o le tala lea a Meki. “Sa vave ona ma mafaufau e tatau ona aofia ai le aiga o Stanica. Sa ma valaaulia i latou ina ia auai, ma sa fiafia lava i latou!”

I le po o le gaoioiga, e lei taunuu lava le au Stanica ae ua oo i le taimi e amata ai.

“Sa ma popole nei le mafai ona latou o mai,” o le tala lea a Meki. “Ae o le taimi lava lena, sa latou savavali atu ai i le faitotoa. Sa tuuina atu e le au Stanica se molimau matagofie e uiga i le talalelei ma le Ekalesia. Sa latou faamasani ma isi tagata o e latou te lei vaai i ai i se taimi umi lava.”

Sa faamafola e tagata o le paranesi o latou lima ma faafeiloai i le au Stanica. O le aso Sa na sosoo ai, na fiafia ai Meki i lona tei i le vaaia o Sister Stanica i le lotu.

“Ina ua ou asiasi i le paranesi i ni nai masina mulimuli ane, sa sau pea o ia!” Ua fai mai ai Meki. “Ou te manatu o le avanoa e tuu atu ai lana molimau ma lagona ai le aofia ma le manaomia i le paranesi na fesoasoani tele ia te ia.”

Ata

women talking

• Fuafua ni gaoioiga e fetaui ma mea e manaomia: O gaoioiga o se auala sili lea e ausia ai le tele o manaoga eseese. E mafai ona fuafua e taulimaina manaoga faapitoa o se tagata po o se vaega. E tatau foi ona latou faafetaiaia manaoga o i latou o e auai, pe tatau ona iloa lelei e le tasi le isi, aoao atili i le talalelei, pe lagona foi le Agaga.

• Valaaulia tagata uma: A o e fuafuaina ni gaoioiga, fai se taumafaiga faapitoa e valaaulia ai i latou o le a manuia mai le auai. Manatua tagata fou, tagata ua le toaaga mai, autalavou, tagata nofofua matutua, tagata e i ai manaoga faapitoa, faapea ma tagata o isi faatuatuaga. Tuu atu i ai le valaaulia i le mea e sili ona fiafia i ai le mafaufau, ma faailoa atu lou fiafia pe a latou o mai.

• Uunaia le auai: O i latou e te valaauliaina o le a tele atu mea e maua mai i gaoioiga pe afai latou te maua le avanoa e auai ai. O se tasi auala e uunaia ai le auai o le faaaoga lea e tagata o a latou meaalofa, tomai, ma taleni i le taimi o le gaoioiga.

• Faafeiloai atu i tagata uma: Afai e auai au uo i se gaoioiga, ia fai mea uma e te mafaia ina ia latou lagona ai le taliaina. E faapena foi, afai e te vaai i tagata e te le iloa, ia faauo ma talia lelei i latou!