E Mafai Faapefea Ona Tatou Tetee Atu i Aoaoga Sese?

6–12 Iulai

O Korioa o se anetikeriso na talai atu “e faasaga i valoaga ia na fetalaia e perofeta, e uiga i le afio mai o Keriso” (Alema 30:6). Na ia talai atu isi aoaoga sese ma taitai “ese atu ai loto o le toatele” (Alema 30:18).

E ui lava o lenei mea na tupu i le silia ma le 2,000 tausaga ua mavae, ae o le toatele o tagata i aso nei ua talai atu foi mea faapena. O a ni mea e mafai ona tatou faia e puipuia ai i tatou mai aoaoga sese i o tatou aso?

E Mafai Ona Tatou Maua a Tatou Lava Molimau

Na aoao atu e Korioa tagata “o le a leai se Keriso” ma “e le mafai ona faia o se togiola,” ma sa ia faafitia le i ai o le Atua (tagai Alema 30:12, 17, 28).

E mafai faapefea ona tatou iloa o loo soifua le Atua ma Iesu Keriso? O a ni mau ma ni aafiaga faaletagata ua faamalosia ai lau molimau e uiga ia i Laua?

E Mafai Ona Tatou Faalagolago i Faaaliga

Na faafitia e Korioa le agaga o valoaga ma faaaliga. Sa ia taumafai ia talitonu tagata e “leai se tagata e mafai ona ia iloa se mea o le a oo mai” ma “e le mafai ona outou iloa e uiga i ni mea tou te le vaai atu i ai” (Alema 30:13, 15).

E mafai ona tatou vaai atu i perofeta ma aposetolo ina ia maua le afioga a le Atua mo o tatou taimi. E faapefea e le mulimuli i le perofeta ona puipuia oe mai aoaoga sese?

E Mafai Ona Tatou Manatua o le Upumoni o le Upumoni

Na tau atu e Korioa i tagata e leai se auala e mafai ai ona latou iloa le mea moni (tagai Alema 30:24), ae na aoao mai Peresitene Russell M. Nelson: “O nisi mea e moni lava. …

“… O le upumoni e faavae i luga o tulafono ua faavaeina e le Atua. … O tulafono e faavavau e faagaoioia ma aafia ai o tatou olaga taitoatasi, e tusa lava pe tatou te talitonu i ai pe leai” (“O le Alofa ma Tulafono a le Atua” [Faigalotu a le iunivesite o Polika Iaga, 17 Sete., 2019], speeches.byu.edu). E mafai faapefea ona tatou iloa upumoni a le Atua, ma pe faapefea ona faamanuiaina ai o tatou olaga?