Autalavou
Ata na pueina e Raul Sandoval
Ou te fiafia tele e kuka, e sili atu i lo se isi lava mea. Ou te faia paluga mo pau pai ma mea faapena, tamai keke, tamai kuki, kuka o aano o manufasi ma araisa—o le mea moni, o soo se mea lava! Ou te fiafia foi e faiaoga i vasega. Ou te fiafia i soo se taimi e valaaulia ai au e faiaoga i se vasega a Tamaitai Talavou.
Sa ou sau i le konafesi o le MMA aua sa i ai sa’u fesili sa ou fia maua se tali. E i ai sa’u sikolasipi ou te alu i le kolisi, ae ou te lagona e tatau ona ou auauna atu i se misiona. A ou alu, o le a leai sa’u sikolasipi. Ae afai ou te nofo ma avea ma se faiaoga, e mafai ona ou galue ma totogi la’u aoga i le taimi lava lea. I le taimi o le MMA, sa talanoa ai se tasi o uso e uiga i lona faamanuiaga faapeteriaka. O loo ou sauniuni e maua lo’u lava faamanuiaga faapeteriaka i le taimi nei, ma ou te faamoemoe a ou mauaina, o le a sili atu ona ou iloa ai le mea ua fuafuaina e le Tama Faalelagi mo au. Ou te fiafia i polokalama a le autalavou ma le MMA ona latou te faamalolosia le autalavou. Ona o le mea moni, tatou te manaomia uma lava le filemu.
Mo sina taimi ina ua uma ona ou papatiso, sa ou nofo ai ou te le’i toe alu i le lotu, ona ou toe alu lea mo sina taimi, ona toe nofo foi lea. Ae sa asiasi mai ia te au tagata o le uarota ma valaaulia au e toe foi mai. Sa latou tau mai ia te au ua misia ma manaomia au e le Ekalesia ma le au paia. Sa tonu ia te au e toe foi mai, ma ua ou toaga lava talu mai lena taimi. Sa ou iloaina le tele o lo’u manaomia o le Ekalesia. E mafai ona ou tatalo i le Tama Faalelagi ma maua se lagona lelei, ma e mafai ona ou lagonaina le Agaga. Ma o lea la ua ou i ai iinei!
Adriana T. (agavale i le pito), 17 tausaga, Repapelika o Tominika