Faneva te misiōnare
’Ua fa’ao ’o Faneva i rāpae i te fa’aramarama i ni’a i te purūmu tei ī i te ta’ata i rāpae i tōna fare. Tē ’ite atura ’oia i te ta’ata e tūra’i ra i te mau pere’o’o mā’a tupu, te raiti, te ’ahu, ’e te tahi atu mau tao’a nō te ho’o. E fa’aro’o ’oia i te mau pū pere’o’o ’e te ’aoa uri. I muri iho, ’ua fa’aro’o a’era ’oia i te tahi atu māniania.
« Mama, e ta’ata terā e pātōtō ra » ! Te pi’ira’a ïa a Faneva. ’Ua ’īriti a’era o māmā i te ’ōpani. I mua i te ’ūputa, te ti’a noa ra e piti nā feiā ’āpī tamāroa, ma te ’ahuhia i te pereue ’e te tā’amu arapo’a. ’Aitā ’o Faneva i ’ite a’e nei i te hō’ē ta’ata tei ’ahuhia mai te reira te huru i te vāhi tāna e fa’aea ra i Madegata.
« E misiōnare māua nō te ’Ēkālesia a Iesu Mesia i te Feiā Mo’a i te Mau Mahana Hope’a nei », te parau ïa a te hō’ē o rāua. « Tē haʼapiʼi nei māua i te ta’ata nō ni’a ia Iesu. E nehenehe ānei māua e fa’a’ite i te hō’ē parau poro’i ia ’outou » ?
’Ua ’oa’oa roa o Faneva i te anira’a o māmā ia rāua ’ia tomo mai i roto. ’Ua putuputu te ’utuāfare tā’āto’a nō te fa’aro’o i te parau nō ni’a ia Iesu Mesia, ’e e mea nāhea tāna ’Ēkālesia i tae fa’ahou mai ai i ni’a i te fenua nei.
I muri a’e i tāua mahana ra, ’ua ho’i mai nā misiōnare e fārerei i te ’utuāfare o Faneva e rave rahi taime. ’Ua hōpoi mai rāua i te hō’ē buka tei parauhia Te mau ’ā’amu nō te Buka a Moromona. ’Ua au roa o Faneva ’ia tai’o i te reira ’e tōna ’utuāfare !
Tē vai ra te mahana e riro vau ’ei misiōnare ’e e fa’a’ite au i te Buka a Moromona ia vetahi ’ē, Te parau ïa a Faneva iāna iho.
I te tahi atu taime, i te haerera’a mai te mau misiōnare, ’ua ha’api’i rāua i te ’utuāfare o Faneva nāhea ’ia pure. ’Ua ha’api’i mai o Faneva ē, e nehenehe tāna e paraparau i te Metua i te ao ra i te mau huru taime ato’a, i te mau huru vāhi ato’a.
Tē vai ra te mahana e riro vau ’ei misiōnare ’e e ha’api’i au i te ta’ata nō ni’a i te pure, te mana’o ïa o Faneva.
I te hō’ē mahana e uira’a faufa’a roa tā te mau misiōnare.
« E pe’e ānei ’oe i te hi’ora’a maita’i o Iesu Mesia ’e ’ia bāpetizohia » ? te uira’a ïa a te hō’ē o rāua.
’Ua tupu te ’oa’oa i roto i te ’ā’au o Faneva. ’Ua parau ’oia, « E ! ».
’Ua parau ato’a tōna taea’e ’e tōna māmā « E ! ».
Ua parau o pāpā ē, ’aita ’oia i ineine nō te bapetizo. Terā rā, e fa’ati’a ’oia ’ia bāpetizohia te toe’a o te ’utuāfare. ’E nō reira, ’ua bāpetizohia rātou ! ’Ua bāpetizohia o Faneva nā te hō’ē o te mau misiōnare tei ha’api’i iāna nō ni’a ia Iesu.
Tē vai ra te mahana e riro mai au ’ei misiōnare ’e e tauturu vau i te ta’ata ’ia bāpetizohia rātou, te mana’o ïa o Faneva.
Hō’ē o te mau tuha’a maita’i roa a’e nō te rirora’a ’ei melo nō te ’Ēkālesia ’o te haerera’a ïa i te Paraimere. E mea au roa nā Faneva te mau fa’a’oa’oara’a ’e te fārereira’a i te mau hoa ’āpī. Terā rā, tāna ’ohipa au roa a’e i te mau ’ohipa ato’a, o te hīmenera’a ïa i te mau hīmene Paraimere. I te hō’ē sābati i roto i te Paraimere, te hīmene ra rātou i te mau hīmene nō ni’a i te fa’a’itera’a i te ’evanelia.
’E ’ua hīmene ’o Faneva, « Hina’aro vau ’ia riro ’ei misiōnare i teie nei ». « ’Aita vau e hina’aro e tīa’i ’ia pa’ari au ».
E nehenehe au e ha’amata i te rave i te ’ohipa misiōnare i teie nei, te parau ïa a Faneva. ’Aita e tītauhia iā’u ’ia tīa’i e tae roa atu i te hō’ē mahana !
Mai tāua taime ra, ’ua ’imi ’o Faneva i te mau rāve’a e ti’a iāna ia fa’a’ite i te ’evanelia. ’Ua tāmata ’oia ’ia riro ’ei hi’ora’a maita’i. ’Ua ani manihini ’oia i te ta’ata ’ia haere mai i te purera’a. ’Ua tauturu ’oia i tōna mau ta’ata tupu. Tau matahiti i muri a’e, ’ua ti’a tōna pa’ari nō te tauturu i te mau misiōnare nō te ha’api’i i te ta’ata i roto i tōna ’oire. Tau matahiti i muri mai, ’ua tāvini ’oia iho i te hō’ē misiōni—’ua fārerei i te mau ta’ata ’āpī ’e ’ua fa’a’ite i te ’evanelia, mai tā te mau misiōnare i fa’a’ite mai iāna.