Āraira’a i te hāmani-’ino-ra’a
I roto i te mau auta’atira’a maita’i, e tātarahapa te ta’ata nō tā rātou mau parau ’e te mau ’ohipa au ’ore, ma te ti’aturi i ni’a i te pūai tāra’ehara o tō tātou Fa’aora nō te tauturu ia rātou ’ia ha’amaita’i ’e ia tātarahapa. I roto rā i te mau tupura’a au ’ore, e tāmau noa te ta’ata i te ’ino i ni’a i te tahi atu ta’ata, ’e e nehenehe te reira mau huru auta’atira’a e riro mai ’ei ’ohipa hāmani-’ino-ra’a.
« ’Aita tō te [hāmani-’ino-ra’a ’e te tahi atu] huru fa’a’inora’a e ti’ara’a i roto i te bāsileia o te Atua », te ha’api’ira’a ïa a te peresideni Russell M. Nelson (« Te mau tao’a pae Vārua », te ’āmuira’a rahi nō ’Ātopa 2019). E rave rahi mau parau pāpa’i nō te ve’a a te ’Ēkālesia i teie ’āva’e o tē tauturu ia ’outou ’ia ’ite ’e ia fa’a’ite i te hāmani-’ino-ra’a :
-
I roto i tā’u parau pāpa’i i ni’a i te ’api 18, te paraparau ra vau nō ni’a i te mau huru o te hāmani-’ino-ra’a ’e te fa’a’ite ra vau i te tahi mau rāve’a nō te tauturu ia ’outou ’aore rā, i te mau ta’ata tā ’outou i mātau ’ia ’ite ’e ’ia fa’aora i te mau auta’atira’a hāmani ’ino.
-
I ni’a i te ’api 58 te fa’a’ite ra te hō’ē tamāhine i tōna ’itera’a nō ni’a i tōna hāmani-’ino-ra’a-hia i te pae ’āpeni i tōna tamari’ira’a, ’e e mea nāhea i ti’a ai iāna ’ia roa’a te itoito ’e te pūai ’ia parau ’e ’ia ’imi i te tauturu i roto i te feiā pa’ari ti’aturihia ’e i te Fa’aora.
-
I roto i te Friend nō teie ’āva’e i ni’a i te ’api F12, e nehenehe ’outou e ’ite i te hō’ē ’ohipa pāpa’ira’a nō te tauturu ’ia ’āparau « ’ia parau ’aita » i tā ’outou mau tamari’i. E nehenehe ’outou e fa’a’ohipa i teie ’ohipara’a ’ei niu nō te hō’ē ha’api’ira’a nō te pō ’utuāfare nō ni’a i te āraira’a i te hāmani-’ino-ra’a.•E nehenehe te hāmani-ino-ra’a i te pae ferurira’a e fāito noa te ’ino ’e te tahi atu huru hāmani-ino-ra’a. ’A tai’o « Te ’itera’a i te hāmani-ino-ra’a i te pae ferurira’a » i roto i te nene’ira’a rorouira o teie ve’a nō te ha’api’i mai e pae tāpa’o fa’aara e nāhea ’ia fāri’i i te tauturu.
Mai te mea ē, ’ua pēpē ’outou, e nehenehe ’outou e fāriu atu i te Atua ra nō te mau arata’ira’a ’e te fa’aorara’a ’e ’ia ’imi ato’a i te tauturu i roto i te mau ta’ata ti’aturihia. E ta’a i te Fatu e aha tō tātou mana’o, ’e e arata’i ’oia ia tātou i roto i te pārurura’a ’e te ’oa’oa mai te mea ē, e fāriu atu tātou i iāna.
E mata na tātou i te ’ite i te here o te Atua ’e ’ia toro atu i te rima iāna ra i te mau mahana ato’a.
Jason Whiting, PhD
Ha’api’ira’a nō te orara’a ’utuāfare nō Brigham Young University